Esikel 13 - Bislama Bible Revised 2012

Hae God i tok agens long ol profet we oli stap giaman

1Hae God i Masta* blong yumi, mo hem i talem long mi se,

2“Man blong wol ya. Yu go tok agens long ol profet ya blong ol laen* blong Isrel* we oli stap talemaot ol tok we i kamaot long tingting blong olgeta nomo, be oli stap talem se i tok blong mi. Yu talem long olgeta blong oli lesin long tok blong mi.

3“Mi mi talem se, ‘Ol profet. !Yufala i no gat hed nating! Bambae yufala i kasem panis we bambae yufala i ded from. Yufala i stap talemaot ol tingting blong yufala nomo, mo yufala i stap talem se yufala i luk ol samting long ol vison blong yufala, be yufala i stap giaman nomo.

4Ol laen blong Isrel. Ol profet blong yufala oli olsem ol wael dog ya, we oli stap haed long ol stonwol blong taon we i brobrok. Oli no save givhan long yufala nating.

5Ol Profet. Ol ples we stonwol blong taon ya i brobrok long hem, be yufala i no save gad nating long hem, mo yufala i no stanemap stonwol ya bakegen. Dei ya blong mi blong jajem ol man bambae i kam, be long taem ya, taem ol enemi oli kam blong faet long yufala, bambae ol stonwol ya oli no save blokem yufala nating.

6Ol laen blong Isrel. Ol profet ya blong yufala oli stap luk ol rabis vison, mo oli stap giaman nomo se ol samting ya bambae oli kamtru. Oli talem se oli stap talemaot ol tok we mi mi givim long olgeta, be oli stap giaman nomo, mi mi no sanem olgeta. Be oli stap tingting se tok ya blong olgeta bambae i kamtru.

7!Ol profet! Yufala i stap luk ol rabis vison, mo yufala i stap giaman nomo se ol samting we yufala i stap talem bambae oli kamtru. Yufala i stap talem se tok we yufala i stap talemaot i tok blong mi, be mi no givim tok ya long yufala.

8Ol toktok blong yufala oli blong giaman nomo, mo ol vison* we yufala i stap luk oli rabis vison nomo. From ol samting ya, mi mi agensem yufala.

9Yufala i stap giaman, mo ol tok blong yufala i stap mekem ol man oli gorong. From samting ya, mi bambae mi panisim yufala. Sipos ol lida blong ol man blong mi oli kam wanples blong mekem miting, bambae yufala i no moa save joen wetem olgeta. Ol nem blong yufala bambae oli no moa stap long lis blong ol man blong mi, mo bambae yufala i no save gobak long ples blong yufala bakegen samtaem. Nao bambae yufala i savegud we mi mi Hae God, mi Masta blong yufala.

10 Jer 6.14; 8.11 “Olgeta. Ol profet ya oli stap lidim yufala i gorong. Olgeta oli stap talem se ol samting i oraet nomo, be ol samting oli no stret nating. I olsem we yufala i wokem wan stonwol we i no strong nating, mo ol profet ya oli kam, oli pentem long laem blong mekem i waet gud.

11Be yufala i mas talem long olgeta, se stonwol ya bambae i foldaon. Bambae bigfala ren i kam, mo ol ston blong aes* bambae i folfoldaon long hem, mo bigfala win bambae i blu long hem,

12nao bambae hem i brobrok, i folfoldaon, i kam nogud olgeta. Nao bambae yufala i stap talem long olgeta se, ‘!A! Laem ya i no givhan nating long stonwol ya.’ ”

13Nao from samting ya, Hae God we i Masta blong yumi, hem i talem se, “Mi mi kros we mi kros. Bambae mi sanem strong win, mo bigfala ren, mo ol ston blong aes i kam blong spolem stonwol ya.

14Mi bambae mi brebrekem stonwol ya, mi flatemgud, nao bambae mi livim fandesen blong hem i stap nating nomo olsem. Taem stonwol ya i brobrok i foldaon, bambae i kilim yufala evriwan i ded. Nao bambae yufala evriwan i savegud we mi mi Hae God.

15“Ol profet ya mo stonwol ya we oli pentem long laem, bambae oli harem paoa blong kros blong mi. Nao mi bambae mi talemaot long yufala, se stonwol ya i brobrok finis, mo ol profet ya evriwan oli ded finis.

16Hemia olgeta ya we oli stap talem long ol man Jerusalem,* se evri samting i oraet nomo, be ol samting oli no stret nating. Mi mi Hae God mi Masta blong yufala, mo hemia tok blong mi.”

Hae God i tok agens long ol woman profet we oli stap giaman

17Hae God i Masta* blong yumi, mo hem i talem long mi se, “Man blong wol ya. Naoia yu mas tok agens long ol woman ples blong yu we oli profet. Olgeta oli stap talemaot ol samting, se bambae oli kamtru long fiuja, be hemia tingting blong olgeta nomo.

18Yu talemaot long olgeta we mi mi talem se, ‘Yufala ol woman, bambae yufala i kasem panis we bambae yufala i ded from. Yufala i stap somap ol kaliko blong fasem long han blong mekem majik, blong man i save yusum, mo yufala i stap somap ol angkejif blong majik, we man i save putum long hed blong hem, blong hem i gat paoa blong spolem laef blong narafala man. Yufala i wantem se yufala i gat paoa blong holem laef blong ol man blong mi, blong yufala i save kilim sam i ded, mo yufala i save holem sam i stap laef, blong yufala i winim mane long fasin ya.

19Yufala i wantem kasem kakae blong yufala, be yufala i stap spolem nem blong mi nomo long fes blong ol man blong mi. Yufala i kilim ol man we oli no blong ded, mo olgeta we i stret blong oli ded, yufala i holem olgeta oli stap laef. Yufala i stap giaman long ol man blong mi, nao oli stap bilif long yufala.

20“Mi mi no wantem nating ol kaliko ya we yufala i stap yusum blong traem holem paoa blong laef mo paoa blong ded. Bambae mi teremaot ol kaliko ya i gowe long han blong yufala, nao ol man ya we yufala i holem olgeta, yufala i stap bos long laef blong olgeta, mi bambae mi letem olgeta oli go fri.

21Mo bambae mi teremaot ol angkejif ya, nao mi letem ol man blong mi oli ronwe long paoa blong yufala we bambae yufala i no moa save holem olgeta bakegen samtaem. Nao bambae yufala i savegud we mi mi Hae God.

22“Ol man ya we mi mi no wantem spolem olgeta, yufala i stap giaman long olgeta, nao yufala i mekem tingting blong olgeta i foldaon. Mo yufala i stap givhan long ol man nogud, blong oli gohed long ol rabis fasin blong olgeta, blong oli no sevem laef blong olgeta.

23Nao from samting ya, i stat naoia, ol rabis vison ya blong yufala, mo ol giaman toktok blong yufala we yufala i stap talem se bambae oli kamtru, bambae oli finis olgeta. Bambae mi sevem ol man blong mi, mi tekemaot olgeta i gowe long han blong yufala, blong bambae yufala i savegud we mi mi Hae God.”