1Nao King Deved i stap gud long haos blong hem, mo wan dei, hem i singaot Profet Natan blong i kam luk hem, mo i talem long hem se, “?Olsem wanem? Naoia mi mi stap long wan gudfala haos we oli wokem long wud ya sida,* be Bokis ya we i Saen blong Promes blong Hae God, hem i stap long wan haos tapolen nomo.”
2Nao profet i talem long hem se, “King. Sipos yu tingbaot blong mekem wan samting, yu gohed, yu mekem, from we Hae God i stap wetem yu.”
3Be long naet ya, Hae God i toktok long profet ya,
4i talem long hem blong i go talemaot long Deved we hem i talem se, “Deved. Yu yu man blong wok blong mi, be i no yu we bambae i wokem wan haos* blong mi, blong mi stap long hem, narafala man bambae i wokem.
5I stat long taem ya bifo we mi tekemaot ol bubu blong yufala long Ijip, kam kasem naoia, be mi mi no stap long wan haos olsem samtaem. Oltaem, mi stap muf long wan ples i go long narafala ples, mo oltaem, mi stap long haos tapolen nomo.
6Mo long olgeta ples ya we mi mi pas long hem wetem olgeta, mi mi stap jusumaot ol lida blong oli lukaot gud long olgeta, be neva mi talem long wan long ol lida ya se, ‘?From wanem yu yu no wokem wan haos blong mi long wud ya sida?’ ”
7Mo bakegen, Hae God i talem long profet ya se, “Mo yu go talemaot long hem tu we mi mi talem se, ‘Mi mi Hae God, mi gat olgeta paoa. Yufala ya we i laen* blong Isrel* ya bifo, yufala i man blong mi. Mo yu, mi mi tekemaot yu long wok ya we yu stap lukaot long ol sipsip long open ples, mi putumap yu yu kam king blong ol man ya blong mi.
8I stat bifo i kam, long weples we yu yu pas long hem, oltaem mi mi stap wetem yu, mo taem yu stap go long faet, oltaem mi stap winim ol enemi blong yu. Bambae mi mekem nem blong yu i go antap, blong olgeta man bambae oli save nem blong yu, olsem we oli save nem blong ol narafala bigbigfala lida olbaot long wol.
9-10Bifo olgeta, mi mi bin jusumaot wan kantri blong yufala, mo mi putum yufala finis long kantri ya. Mo long ples ya, bambae i no gat man i save mekem yufala i harem nogud bakegen. I stat long taem ya bifo we yufala i kam stap long kantri ya, oltaem i gat ol strong man blong faet oli stap kam blong mekem faet long yufala, be samting ya bambae i no moa save kasem yufala bakegen. Naoia mi mi promes blong lukaot gud long yu, mo blong blokem olgeta enemi blong yu blong oli no kam spolem yu, mo oltaem bambae mi mekem we yu yu gat plante pikinini we bambae oli stap kamaot biaen long yu.
11Mo sipos yu ded, yu go stap long beregraon wetem ol olfala bubu blong yu, bambae mi mekem wan long ol pikinini blong yu i kam king, mo bambae mi stap lukaot gud long kingdom blong hem blong i stanap strong oltaem.
12King ya nao bambae i wokem haos blong mi, mo oltaem, ol man we bambae oli kam king blong yufala, bambae oli stap kamaot long ol olgeta ya we bambae oli stap kamaot biaen long hem.
13’ ”
15Nao olgeta tok ya we Hae God i talem long profet ya, profet i go talemaot long king.
King Deved i prea blong talem tangkiu long Hae God(2 Samuel 7.18-29)16Nao King Deved i go insaed long haos tapolen ya we Bokis ya we i Saen blong Promes blong Hae God i stap long hem, nao i sidaon, i prea, i talem se, “Hae God, yu yu God blong mi. Ol samting ya we yu yu mekem finis long mi oli gudfala tumas. Mi mi no wan gudfala man, mo ol famle blong mi tu oli olsem mi. I no stret blong yu yu mekem long mi olsem.
17Hae God, yu yu God blong mi. Ol samting we yu stap mekem long mi naoia, i moa gud i winim ol samting ya we yu stap mekem long mi bifo. Naoia, yu yu promes se long ol yia we bambae i kam, bambae mi mi gat ol pikinini we bambae oli stap kamaot biaen long mi. Mo yu stap mekem long mi olsem we mi wan haeman.
18!Ol tok blong mi i no naf blong talem tangkiu long yu! Mi mi man blong wok nomo blong yu, mo yu yu savegud mi, be yu stap ona long mi tumas.
19Ol bigbigfala samting ya we yu yu mekem long mi oli kamaot long plan blong yu nomo, mo oli samting we yu yu wantem mekem. Mo yu mekem olgeta blong soemaot long mi we bambae mi mi gat hae nem long fiuja.
20!Hae God, i no gat man we i olsem yu! Mo mifala i save longtaem finis we yu nomo yu God.
21Mo i no gat wan narafala neson long wol we oli olsem mifala ya, we i laen* blong Isrel* ya bifo. Fastaem mifala i slef,* be yu yu mekem mifala i fri, blong mifala i kam man blong yu. Mo ol bigbigfala samting ya we oli gud tumas we yu yu mekem long mifala, i mekem nius blong yu i go long olgeta ples long wol. Ol olfala ya blong mifala we yu yu tekemaot olgeta long Ijip, taem olgeta oli kam long ples ya, yu yu stap ronemaot ol narafala man we oli stap long ples ya fastaem.
22Hae God, yu yu mekem mifala i man blong yu finis, nao oltaem nomo, bambae mifala i man blong yu mo yu bambae yu God blong mifala, gogo i no save finis.
23“Hae God, promes ya blong yu we yu mekem from mi wetem olgeta we bambae oli stap kamaot biaen long mi, plis yu mekem i stanap naoia, we bambae i stap kamtru oltaem nomo. Mi mi wantem tumas blong yu mekem ol samting ya we yu talem se bambae yu mekem.
24Sipos yu mekem olsem, olgeta man bambae oli stap leftemap nem blong yu oltaem nomo. Bambae oli stap talem se, ‘!Hae God i gat olgeta paoa! !Hem nao i God blong ol laen blong Isrel ya!’ Mo oltaem nomo, ol king blong mifala bambae oli stap kamaot long olgeta we bambae oli stap kamaot biaen long mi.
25God blong mi, mi mi man blong wok nomo blong yu, be mi no fraet blong kam mekem prea ya long yu, from we yu yu bin soemaot olgeta samting ya long mi, mo yu bin talem long mi, se bambae yu mekem olgeta we bambae oli stap kamaot biaen long mi oli kam king.
26“Hae God, yu yu God blong mi, mo promes ya we yu mekem long mi i gudfala tumas.
27Naoia mi askem long yu blong yu blesem olgeta ya we bambae oli stap kamaot biaen long mi, blong bambae oli stap harem gud oltaem nomo long ol gudgudfala samting we bambae yu yu stap givim long olgeta. Hae God, yu yu bin blesem olgeta long promes ya, mo ol gudgudfala samting blong yu bambae oli stap kamtru long olgeta, gogo i no save finis.”
Who We AreWhat We EelieveWhat We Do
2025 by iamachristian.org,Inc All rights reserved.
