Levitikas 7 - Bislama Bible Revised 2012

Ol spesel sakrefaes blong tekemaot sin blong man we i ravem Hae God, no i ravem narafala man

1Bakegen, Hae God i givim tok blong hem long Moses blong i go talemaot long Eron wetem ol pikinini blong hem, blong makemaot ol fasin blong wok blong pris. Hem i talem se, “Sipos wan man i wantem mekem spesel sakrefaes blong tekemaot sin blong hem from we i ravem mi, no i ravem narafala man, ol rul blong sakrefaes ya i olsem. Ol mit blong ol sakrefaes ya i tabu we i tabu.

2Anamol we bambae hem i kilim blong mekem sakrefaes olsem, bambae hem i mas kilim klosap long Olta, long saed blong hem i go long not, long ples blong kilim anamol blong mekem sakrefaes ya we i blong bonem i bon evriwan, mo blad blong hem, bambae pris we i wok long taem ya i mas kafsaedem i go long ol fo saed blong Olta ya blong givim i kam long mi.

3-4Bambae man ya i mas katemaot olgeta gris blong hem we i blong bonem long Olta. Hemia tel blong hem we i gat gris long hem, wetem ol gris blong gat blong hem, mo tufala kidni wetem ol gris blong tufala, mo gudfala haf blong leva blong hem.

5Nao pris i mas bonem ol samting ya long Olta, blong givim i kam long mi. Hemia i wan presen we i blong bonem long Olta blong givim i kam long mi. Sakrefaes ya i blong tekemaot sin blong man we i ravem mi no i ravem narafala man,

6mo ol pris wetem ol pikinini boe blong olgeta oli save kakae haf mit blong hem we i stap, be oli mas kakae insaed long yad blong Haos Tapolen blong mi nomo, from we sakrefaes ya i tabu we i tabu.

7“I gat wan rul i stap we i kavremap sakrefaes ya we i blong tekemaot sin blong man, mo spesel sakrefaes ya tu we i blong tekemaot sin blong man we i ravem mi, no i ravem narafala man. Rul ya i kavremap tu kaen sakrefaes ya wantaem, mo i talem se haf mit blong tufala sakrefaes ya we i stap i blong pris we i mekem sakrefaes.

8Anamol blong sakrefaes ya we i blong bonem i bon evriwan, skin blong hem bambae oli no mas bonem, hem i blong pris we i bonem sakrefaes ya.

9Mo ol presen long kakae blong garen* we oli kukum long sospen, no long fraepan, no long aean we i flat, hem i blong pris we i prea long hem blong givim i kam long mi.

10Be ol presen long kakae blong garen ya we oli no kukum, nating we oli tantanem wetem olifoel,* no i no gat olifoel long hem, oli blong ol pris mo oli mas seraot ol kakae ya sem mak nomo long olgeta evriwan.”

Ol sakrefaes we man i mekem blong soemaot we i stap fren gud wetem Hae God

11Mo bakegen, Hae God i talem se, “Moses. Sipos wan man i wantem mekem sakrefaes ya we i soemaot we hem i stap fren gud wetem mi, we i kilim anamol, nao pris i bonem haf, man i kakae haf, ol rul blong hem bambae i olsem.

12“Sipos wan man i mekem sakrefaes olsem blong talem tangkiu long mi, bambae hem i mas mekem presen tu long fo kaen kakae. Long presen ya, bambae i gat bred* we i no gat is long hem, we oli tantanem flaoa blong hem wetem olifoel,* mo bisket* we oli ravem olifoel long hem, mo flaoa ya we taem oli wokem, oli tekem flaoa we i beswan, oli tantanemgud wetem olifoel mo oli fraenem.

13Mo antap long trifala samting ya, bambae hem i mas givim sam bred tu long hem.

14Hem i mas tekemaot wanwan long ol fo kaen kakae ya we i mekem presen long hem, i mekem wan spesel presen long hem, i givim i kam long mi. Spesel presen ya bambae i blong pris we i tekem blad blong anamol blong sakrefaes ya, i kafsaedem i go long saed blong Olta.

15Mit blong anamol ya, olgeta we oli mekem sakrefaes oli mas kakae we bambae oli finisim long sem dei ya nomo, i no mas gat haf i stap gogo kasem long nekis dei blong hem.

16“Sipos wan man i mekem sakrefaes olsem blong soemaot we hem i finisim ol samting blong wan promes we hem i mekem long mi, no blong givim presen long mi long gladhat blong hem nomo, be bambae i no gat rul ya se olgeta we oli mekem sakrefaes oli mas kakae olgeta mit blong sakrefaes ya evriwan long sem dei ya nomo. Sipos i gat haf mit i stap, oli save kakae long nekis dei blong hem.

17Be sipos haf mit ya i stap yet go kasem namba tri dei blong hem, bambae oli no mas kakae, oli mas bonem.

18Sipos mit ya i stap kasem namba tri dei blong hem, nao man i kakae, bambae mi mi no save glad long sakrefaes ya we man ya i mekem. Bambae mi no kaontem se i wan gudfala samting long saed blong hem, bambae mi luk sakrefaes ya, se wan samting we i doti long fes blong mi, mo man we i kakae mit ya, hem bambae i mas karem panis from.

19Mo sipos mit blong sakrefaes ya i tajem wan samting we i no klin long fes blong mi, bambae ol man oli no mas kakae, oli mas bonem nomo long faea.

“Ol man we oli klin finis long fes blong mi, olgeta ya nomo bambae oli save kakae mit ya.

20Be sipos man we i no klin long fes blong mi i kakae mit ya, bambae mi mi no moa save kaontem hem, se i man blong mi.

21Mo sipos man i tajem wan samting we i no klin long fes blong mi, nating we i tajem anamol, no samting we i kamaot long bodi blong man, no long bodi blong woman, nao biaen i kakae mit ya, bambae mi no moa save kaontem hem tu, se i man blong mi.”

I tabu blong man i kakae gris blong anamol, mo blad blong anamol

22Nao Hae God i givim tok blong hem long Moses bakegen,

23blong i talemaot long ol laen* blong Isrel.* Hem i talem se, “Moses. I tabu blong yufala i kakae gris blong buluk, mo gris blong sipsip, mo gris blong nani.

24Mo gris blong anamol we i ded hem wan, wetem gris blong anamol we wael anamol i kilim i ded, yufala i no mas kakae. Maet yufala i save yusum long sam narafala rod, be i tabu blong yufala i kakae.

25Sipos wan man i mekem sakrefaes long anamol we gris blong hem i wan presen we i blong bonem blong givim i kam long mi, nao wan man i kakae gris ya, bambae mi mi no moa save kaontem hem, se i man blong mi.

26 i bonem haf, man i kakae haf, bambae man ya i mas mekem wan spesel presen long mi.

30Haf blong sakrefaes ya i blong bonem blong givim i kam long mi, mo man ya nomo i mas karem i kam. Bambae hem i mas karem ol gris blong anamol ya i kam, wetem jes blong hem, mo i mas leftemap jes ya long fes blong mi blong makemaot se i spesel presen blong mi.

31-33Nao pris we i kafsaedem blad blong anamol ya i go long Olta blong givim i kam long mi, hem i mas bonem ol gris ya long Olta blong givim i kam long mi, be jes ya, mi mi givim long ol pris. Mo bakegen, raet leg blong anamol ya tu i wan spesel presen we man ya i mas givim i go long pris ya.

34Jes blong anamol ya we yufala i leftemap long fes blong mi blong makemaot se i spesel presen blong mi, wetem raet leg blong hem we i spesel presen we yufala i givim long mi, mi mi makemaot tufala mit ya long ol narafala mit blong sakrefaes ya, mi givim i go long ol pris. Mo oltaem nomo, tufala mit ya bambae i haf blong ol pris long ol sakrefaes olsem.”

35Nao i stat long dei ya we Moses i putumap Eron wetem ol pikinini blong hem oli kam pris, Hae God i makemaot tufala haf ya blong olgeta anamol we ol man bambae oli kilim blong mekem sakrefaes, se tufala i blong Eron olgeta.

36Long dei ya, Hae God i talem long ol laen blong Isrel, se sipos oli mekem sakrefaes, oli mas givim tufala haf ya blong hem i go long olgeta, mo hemia i wan rul we olgeta bambae oli mas obei long hem oltaem nomo, gogo i no save finis.

37Ol rul ya i kavremap olgeta sakrefaes olsem. I gat sakrefaes ya we oli bonem anamol i bon evriwan blong mekem wosip long Hae God, mo sakrefaes ya we oli mekem blong givim presen long Hae God long ol kakae blong garen.* Mo i gat sakrefaes ya we oli bonem anamol blong tekemaot sin blong man, mo spesel sakrefaes ya we oli bonem anamol blong tekemaot sin blong man we i ravem Hae God no i ravem narafala man. Mo i gat sakrefaes ya we oli mekem blong putumap ol pris, mo sakrefaes ya we man i kilim anamol, nao pris i bonem haf, mo man ya i kakae haf blong soemaot we hem i stap fren gud wetem Hae God. Hemia nao ol rul blong mekem sakrefaes,

38we Hae God i givim long hem long draeples, long bigfala hil ya Sinae, long dei ya we hem i talem long ol laen blong Isrel, se oli mas mekem sakrefaes blong mekem wosip long hem.