Maeka Sotfala stori blong buk ya - Bislama Bible Revised 2012

Sotfala stori blong buk yaProfet Maeka, hem i stap long semtaem we Profet Aesea i stap. Hem i wan man Juda,* mo vilej blong hem, nem blong hem Moreset. Mo hem i savegud se i no longtaem, ol man Juda bambae oli kasem semkaen trabol we Profet Amos i talemaot bifo, se olgeta long kantri ya Isrel* long not bambae oli kasem, from we olgeta long Juda tu oli gowe long Hae God. Hem i save se Hae God bambae i givim panis long olgeta, from we fasin blong olgeta i no stret, mo oltaem oli stap mekem i strong long ol narafala man. Tok we profet ya i talem, i mekem i klia gud, se nating we Hae God bambae i panisim ol man blong hem from ol sin blong olgeta, be biaen, bambae hem i mekem i gud long ol pikinini we bambae oli kamaot biaen long olgeta.I gat ol gudfala tok i kamaot long buk ya, we i blong tingbaot. Long japta 4.1-4, i gat tok blong pis we God bambae i givim long olgeta man long wol. Mo long japta 5.2-5, profet i talemaot we bambae i gat wan king* i kamaot biaen long King Deved ya bifo, we bambae i givim pis long ol man blong hem. Mo bakegen, long japta 6.8, tok blong profet ya i kavremap olgeta poen we ol profet blong God long taem ya oli stap talem. Hem i talem se, “Ol samting we i gud blong mekem, Hae God i talemaot finis long yumi. Hem i God blong yumi, mo hem i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon.”Ol haf blong buk yaHae God bambae i panisim ol man Isrel mo ol man Juda 1.1—3.12

Hae God bambae i tekemolgeta we bambae oli kamaot biaen long olgetaoli kambak bakegen long ples blong olgeta, oli gat pis 4.1—5.15

Profet i tok strong blong wonem olgeta,mo blong mekem tingting blong olgeta i stap strong long God 6.1—7.20