Aesea 31 - Bislama Bible Revised 2012

Hae God bambae i blokem Jerusalem

1Bakegen, Profet Aesea i talem long olgeta we oli stap resis i go long Ijip, blong lukaot man blong givhan long olgeta se, “Olgeta. !Sore tumas long yufala! !Bambae yufala i lus ya! Yufala i luk we Ijip i wan kantri we i gat plante samting blong faet, nao yufala i putum tingting blong yufala i stap long ol hos blong olgeta, wetem ol kat blong faet blong olgeta, mo long ol nambawan soldia blong olgeta we oli stap ron long hos. Yumi ol laen* blong Isrel,* mo Hae God i God blong yumi. Hem i tabu, fasin blong hem i stret gud, be yufala i no save putum tingting blong yufala i stap long hem, mo yufala i no save askem long hem blong i givhan long yufala.

2Hem i waes, mo i savegud ol samting we i stap mekem, mo hem nomo i stap sanem trabol i kam long yumi. Sipos hem i mekem promes, se bambae i panisim ol man nogud wetem ol man we oli stap givhan long olgeta, be bambae i mas mekem.

3Ol man Ijip ya oli no god, oli man nomo, mo ol hos blong olgeta oli hos nomo, we oli save ded. Sipos Hae God i stretem han blong hem, nating we kantri i strong olsem wanem, be bambae i no save stanap, mo smol kantri we i stap hang long hem, bambae i mas foldaon wetem hem, tufala bambae i mas lus wantaem.

4“Mo hem i talem long mi se, ‘Sipos wan laeon i kilim wan sipsip, mo i rere blong i gohed, i kakae, nating we ol man blong lukaot long sipsip oli stap singaot bigwan olsem wanem, be bambae oli no save mekem hem i fraet, mo bambae oli no save ronemaot hem. Mo long sem fasin, mi mi gat olgeta paoa, mo Saeon* ya i tabu hil blong mi, mo bambae i no gat wan samting i save blokem mi, blong mi no faet from ples ya.

5Olsem we pijin i stap flaflae olbaot antap long nes blong hem, blong blokem ol enemi oli no kam spolem ol pikinini blong hem, long sem fasin, mi bambae mi blokemgud Jerusalem,* blong ol enemi oli no kam spolem, nao bambae ol man blong hem oli stap gud, oli sef.

6“ ‘!Ol laen blong Isrel! Yufala i stap mekem sin agens long mi, mo yufala i stap girap agens long mi. Be naoia, mi mi talem long yufala, se yufala i mas kambak long mi.

7Naoia, yufala i stap yet long ol sin blong yufala, mo yufala i stap wokem ol aedol long silva mo long gol, be i gat taem i stap kam, we bambae yufala evriwan i sakemaot ol aedol ya.

8Kantri ya Asiria, faet bambae i spolemgud hem, be i no from paoa blong ol man we bambae oli stap faet agens long hem. Ol soldia blong olgeta bambae oli ronwe long faet ya, mo ol yang boe blong olgeta bambae oli kam slef* blong ol enemi blong olgeta.

9King blong olgeta bambae i fraet we i fraet, nao i ronwe long faet ya, mo ol komanda blong hem bambae oli fraet tumas we oli lusum hed, nao oli ronwe long ol flaeg blong olgeta. Mi mi Hae God, mo yufala i stap mekem wosip long mi long ples ya long Jerusalem, we oltaem, faea blong bonem ol sakrefaes i stap laet long hem. Mi mi Hae God, mo hemia tok blong mi.’ ”