Namba 4 - Bislama Bible Revised 2012

Ol wok blong ol laen blong Kohat

1Nao Hae God i talem long Moses se,

2“Moses. Yu mas mekem sensas blong kaontem ol laen* blong Kohat. Bambae yu mas folem ol laen mo ol famle blong olgeta,

3mo yu mas raetemdaon nem blong olgeta man we yia blong olgeta i kasem toti, gogo kasem olgeta we yia blong olgeta i kasem fifti. Hemia olgeta we oli save wok long Haos Tapolen blong mi.

4Wok blong olgeta i blong lukaot long ol samting ya we i tabu we i tabu, we i blong Haos Tapolen ya.

5“Nao taem yufala i stap mekemrere blong muv i go long narafala ples, trifala pris ya, Hae Pris Eron wetem tufala pikinini blong hem, bambae trifala i mas kam insaed long Haos Tapolen ya blong mekemrere ol samting blong hem. Trifala i mas tekemaot Kaliko we i blokem Rum ya we i Tabu we i Tabu, we Bokis ya we i Saen blong Promes* blong mi i stap long hem, mo trifala i mas kavremap Bokis ya long hem.

6Nao trifala i mas tekem wan skin blong sikao, trifala i kavremap Bokis ya bakegen long hem, mo biaen, trifala i mas tekem wan blu kaliko, trifala i kavremap bakegen long hem. Nao biaen, trifala i mas tekem tufala wud ya blong karem Bokis ya, trifala i pusum i gotru long ol ring blong hem blong karem.

7“Mo trifala i mas tekem narafala blu kaliko, trifala i kavremap Tebol blong Bred ya we i No Gat Is long hem we trifala i stap givim i kam long mi. Nao trifala i mas tekem ol besin, wetem ol smol besin blong insens,* mo ol besin blong putum ol samting blong givim i kam long mi, mo ol botel we trifala i stap fulumap waen long hem blong givim i kam long mi, trifala i mas putum long Tebol ya, antap long blu kaliko ya. Mo oltaem, i mas gat bred* ya blong mi long Tebol ya.

8Nao trifala i mas tekem wan red kaliko, trifala i mas kavremap Tebol ya wetem ol samting ya long hem, mo antap long hemia, bambae trifala i mas kavremap bakegen long wan skin blong sikao. Nao biaen, trifala i mas tekem tufala wud blong karem Tebol ya, trifala i pusum i gotru long ol ring blong hem blong karem.

9“Mo bambae trifala i mas tekem wan narafala blu kaliko, trifala i kavremap ol Seven Laet ya wetem Ples ya blong Putum olgeta, mo ol samting blong kilim laet, mo ol trei, mo ol botel we trifala i stap fulumap olifoel* long hem.

10Nao bambae trifala i mas tekem wan skin blong sikao, trifala i mas rolemapgud olgeta samting ya long hem bakegen, mo trifala i mas putum long wan bed blong karem.

11“Mo nekis samting, bambae trifala i mas tekem wan narafala blu kaliko, trifala i kavremap Olta ya we oli wokem long gol, mo trifala i mas tekem wan skin blong sikao, trifala i kavremap Olta ya bakegen long hem, mo biaen, trifala i mas tekem tufala wud blong karem Olta ya, trifala i pusum i gotru long ol ring blong hem blong karem.

12Be ol narafala samting we trifala i stap yusum long Olta ya insaed long Haos Tapolen, trifala i mas rolemapgud olgeta long wan blu kaliko, mo trifala i mas rolemap olgeta bakegen long wan skin blong sikao, mo trifala i putum olgeta long wan bed blong karem.

13“Nao trifala i mas tekemaot ol asis mo doti blong gris long narafala Olta we i stap afsaed, mo trifala i tekem wan pepol kaliko, trifala i kavremap Olta ya long hem.

14Nao trifala i mas putum olgeta samting ya we oli stap yusum blong wok long Olta ya antap long hem. Hemia ol flat aean blong mekem faea long hem, mo ol huk, mo ol savel, mo ol besin. Nao trifala i mas tekem wan skin blong sikao, trifala i kavremap Olta ya bakegen long hem, mo trifala i mas tekem tufala wud blong karem Olta ya, trifala i pusum i gotru long ol ring blong hem blong karem.

15Nao taem yufala i rere blong muv i go long narafala ples, ol laen blong Kohat bambae oli kam karem olgeta samting ya. Be fastaem, trifala ya i mas kam kavremap olgeta samting ya blong mekemrere olgeta, from we ol laen blong Kohat, i tabu blong oli tajem ol samting ya. Sipos oli tajem, bambae oli ded from.

“Mo oltaem, taem we yufala i tekemaot Haos Tapolen blong mi, hemia nao ol wok we ol laen blong Kohat oli mas mekem.

16“Mo wok blong pris ya Eleasara, we papa blong hem Hae Pris Eron, hem i mas lukaot long Haos Tapolen ya wetem olgeta samting we i stap insaed long hem, we hemia oel blong ol laet, mo insens, mo ol kakae blong garen* we ol man oli stap givim i kam long mi, mo oel blong makemaot ol samting oli kam tabu, mo olgeta narafala samting insaed long Haos Tapolen ya we mi bin mekem olgeta oli tabu, oli blong mi.”

17Nao Hae God i talem long Moses mo Hae Pris Eron se,

18-20“Taem ol laen blong Kohat oli kam blong karem ol samting ya we i tabu we i tabu, yutufala i mas blokem olgeta, blong oli no kam insaed. Eron. Yu wetem tufala pikinini blong yu, bambae yutrifala i mas kam insaed fastaem blong givimaot ol wok blong olgeta, mo yutrifala i mas talemaot long olgeta wanwan ol samting we bambae oli mas karem, from we sipos olgeta ya oli kam insaed long Haos Tapolen ya, nao oli luk ol tabu samting ya we yutrifala i stap mekemrere blong karemaot, nating we i blong smol taem nomo, be bambae oli ded from.”

Ol wok blong ol laen blong Geson

21Nao Hae God i talem long Moses se,

22“Yu mas mekem sensas bakegen blong kaontem ol laen* blong Geson, folem ol laen mo ol famle blong olgeta,

23mo yu mas raetemdaon nem blong olgeta man we yia blong olgeta i kasem toti, gogo kasem olgeta we yia blong olgeta i kasem fifti. Hemia olgeta we oli save wok long Haos Tapolen blong mi.

24Wok blong olgeta ya i blong karem

25olgeta samting blong Haos Tapolen ya, wetem ol kaliko we i blong blokem ol wol blong hem insaed, mo tufala tapolen ya blong blokem antap, we faswan, oli wokem long skin blong man sipsip,* mo sekenwan, oli wokem long skin blong sikao, mo kaliko we i blong blokem doa,

26mo ol kaliko mo ol rop blong fenis we i goraon long Haos ya, i blokem yad blong hem wetem Olta we i stap long hem, mo kaliko blong blokem doa blong yad ya, mo olgeta samting we oli stap yusum blong putumap Haos ya wetem ol samting blong hem. Oltaem ol man ya oli mas mekem olgeta wok long ol samting ya, mo oli mas lukaot gud long olgeta.

27Yu wetem hae pris, yutufala i mas lukaot long ol laen blong Geson, blong oli mekem olgeta wok ya mo oli karem olgeta samting we hae pris ya wetem tufala pikinini blong hem trifala i givim long olgeta.

28Hemia nao ol wok blong ol laen blong Geson, long Haos Tapolen blong mi. Pris ya Itamara, we papa blong hem Hae Pris Eron, hem bambae i bos blong olgeta, blong oli mekem ol wok ya.”

Ol wok blong ol laen blong Merari

29Nao Hae God i talem long Moses se, “Moses. Yu mas mekem sensas bakegen blong kaontem ol laen* blong Merari, folem ol laen mo ol famle blong olgeta,

30mo yu mas raetemdaon nem blong olgeta man we yia blong olgeta i kasem toti, gogo kasem olgeta we yia blong olgeta i kasem fifti. Hemia olgeta we oli save wok long Haos Tapolen blong mi.

31Wok blong olgeta ya i blong karem olgeta wud blong Haos Tapolen ya. Hemia ol frem* blong wol blong hem, mo ol rel blong hem, mo ol pos blong hem, mo ol spesel stamba we oli wokem long silva no bras, blong ol frem mo ol pos ya oli stanap long olgeta.

32Mo bambae oli stap karem tu ol pos blong fenis blong blokem yad blong Haos ya, wetem ol spesel stamba blong ol pos ya mo ol aean we i blong taetem ol rop long olgeta, mo ol rop blong holemtaet fenis ya, mo ol strap blong holemtaet ol frem ya. Bambae yu mas seraot ol samting ya blong ol man oli karem, nao olgeta man wanwan bambae oli gat ol spesel samting blong oli stap karem.

33Hemia nao ol wok blong ol laen blong Merari, long Haos Tapolen blong mi, mo pris ya Itamara bambae i bos blong olgeta ya tu blong oli mekem ol wok ya.”

Moses i kaontem ol laen blong Livae

34-48Nao Moses wetem Hae Pris Eron mo ol lida blong olgeta man ya oli folem tok blong Hae God, oli mekem trifala sensas ya. Olgeta oli kaontem ol laen* blong Kohat, mo ol laen blong Geson, mo ol laen blong Merari, folem ol laen mo ol famle blong olgeta, mo oli raetemdaon nem blong olgeta man we yia blong olgeta i kasem toti, gogo kasem olgeta we yia blong olgeta i kasem fifti. Hemia olgeta ya we oli save mekem wok long Haos Tapolen blong Hae God.

Mo long ol laen blong Kohat, namba blong olgeta i kasem tu taosen, seven handred fifti.

Mo long ol laen blong Geson, namba blong olgeta i kasem tu taosen, sikis handred toti.

Mo long ol laen blong Merari, namba blong olgeta i kasem tri taosen, tu handred.

Nao namba blong olgeta evriwan i kasem eit taosen, faef handred eiti man olgeta.

49Moses olgeta oli raetemdaon nem blong ol man ya wanwan, stret olsem we Hae God i talem long hem, mo hem i seraot ol wok i go long olgeta, blong oli karem ol samting ya, olsem we Hae God i talem.