Job 24 - Bislama Bible Revised 2012

1“?From wanem

God i no putum taem blong

mekem kot

long ol man blong wok blong hem?

?From wanem hem i no putum dei

we bambae hem i mekem i stret

long olgeta?

2“Ol man oli stap seftem

ol mak blong graon blong olgeta

blong mekem graon blong olgeta

i kam bigwan,

mo oli stap go stilim ol sipsip

blong ol narafala man,

oli kam putum wetem ol sipsip blong olgeta.

3Oli stap tekemaot dongki

blong pikinini we papa blong hem i ded,

mo oli stap holemtaet buluk blong wido

gogo kasem we i pem kaon blong hem.

4Oli stap blokem puaman

blong i no kasem ol samting

we i gat raet blong kasem,

mo oli stap mekem i strong long man olsem,

gogo i ronwe, i go haed.

5“From samting ya,

ol puaman oli stap go lukaot kakae

blong ol pikinini blong olgeta

long draeples,

olsem wael dongki nomo.

I no gat narafala ples

we oli save tekem kakae long hem.

6Oli mas go wok long ol garen

blong ol man nogud,

mo oli mas go lukaot

long ol plantesen blong grep* blong olgeta.

7Be long naet oli no gat blangket

blong kavremap olgeta

blong blokem kolkol long hem.

8Ren we i kamdaon long hil

i stap mekem olgeta oli wetwet gud,

nao oli mas go hivap wanples

long saed blong ol bigbigfala ston,

blong haed long hem.

9“Ol man nogud oli stap mekem

ol pikinini we papa blong olgeta i ded

oli kam slef* blong olgeta,

mo oli stap tekemaot ol pikinini

blong ol puaman

blong stretem kaon

blong ol puaman ya.

10Ol puaman oli stap wokbaot

we oli no gat klos blong blokem olgeta,

mo oli stap wok blong ol narafala man

blong tekemaot kakae long garen,

be oli stap hanggri yet.

11Oli stap wokem oel

long frut blong olif,*

mo oli stap wokem waen

long frut blong grep,

be oli tosta

we oli harem nogud tumas from.

12Olbaot long ol taon,

ol man we oli karekil,

mo ol man we klosap oli ded,

oli stap krae,

be God i no save harem

prea blong olgeta.

13“I gat ol man

we oli stap tanem baksaed long delaet,

oli no luksave delaet ya,

mo oli no save folem rod

we delaet ya i stap soemaot.

14Long eli moning,

ol man blong kilim man oli stap girap

blong go kilim ol puaman,

mo long naet, oli stap wokbaot

blong go stil.

15Ol man blong stilim woman

oli stap wet blong i tudak lelebet,

nao oli kalkal i go,

we oli kavremap fes blong olgeta

blong man i no save luksave olgeta.

16Long naet,

ol man blong stil oli stap go brekem haos

blong go insaed,

be long dei,

oli stap haed

we oli no wantem delaet nating.

17Oli fraet long delaet,

we oli no wantem luk,

be long tudak oli no fraet

long wan samting.

18 “Ol man nogud oli stap lus wantaem,

olsem we wota i ron bigwan,

i tekemaot olgeta.

Ol graon blong olgeta,

God i stap singaot* trabol

i kam long hem

nao oli no moa save go wok

long plantesen blong grep

blong olgeta.

19Long taem blong bigsan,

sno* i stap lus kwiktaem nomo,

mo long sem fasin,

ol man nogud

bambae oli lus wantaem.

20Bambae i no gat man i save tingbaot olgeta bakegen.

Nating we ol stret mama blong olgeta,

be kwiktaem nomo,

bambae oli fogetem olgeta.

Mo ol maget bambae oli stap kakae

ol dedbodi blong olgeta.

Oltaem,

laef blong olgeta i save finis wantaem nomo,

olsem tri we i kafsaed.

21Ol samting ya i stap kasem olgeta

from we oli stap mekem i nogud

long ol wido,

mo from we oli no kaen long ol woman

we oli no gat pikinini.

22Nating we ol man olsem

oli strong,

be God i stap spolem olgeta

long paoa blong hem.

Taem hem i girap,

ol man nogud oli save ded.

23Maet hem i save letem olgeta

oli stap gud fastaem,

be oltaem

hem i stap lukluk olgeta.

24Mo maet oli save win

be blong smoltaem nomo.

Biaen,

laef blong olgeta i save kam nogud,

olsem rabis gras

we man i pulumaot i livim i stap.

God i stap tekemaot olgeta,

olsem we man i stap katemaot

rabis gras long garen blong hem.

25!Ol tok ya blong mi i tru tumas!

I no gat man i save talem se mi mi giaman.”