Jeremaea 40 - Bislama Bible Revised 2012

Profet Jeremaea i stap wetem Gedalia

1Fastaem, taem ol soldia blong Babilonia oli holem ol man Jerusalem* mo ol narafala man Juda,* olgeta oli holem Profet Jeremaea tu, nao oli fasem hem wetem olgeta ya long jen, blong oli tekem olgeta i go long Babilonia, blong oli wok slef* long ples ya. Be taem olgeta oli kamtru long taon ya Rama, komanda ya Nebusaradan, hem i letem profet ya i go fri.

Nao long taem ya, Hae God i toktok wetem profet ya.

2Taem olgeta oli no tekemaot jen long hem yet, komanda ya i tekem hem i go we tufala nomo i stap, mo hem i talem long hem se, “Profet. Hae God ya we i God blong yu, hem i stap talem longtaem finis, se trabol ya bambae i kam kasem ples ya.

3Mo naoia, hem i mekem stret olsem we hem i talem. Ol samting ya oli kasem yufala, from we yufala i bin mekem sin agens long hem, we yufala i no save obei long ol tok blong hem.

4Naoia, bambae mi tekemaot jen ya long han blong yu, mi letem yu yu go fri. Sipos yu wantem kam wetem mi blong yumitu go long Babilonia, i gud nomo, bambae mi mi save lukaot gud long yu. Be sipos yu no wantem kam, i oraet nomo, i stap long yu. Olgeta ples long kantri ya i stap, yu nomo yu save jusumaot weples yu wantem go stap long hem.”

5Be hem i no talem wan samting, nao komanda ya i talem se, “Ale, yu gobak, yu stap wetem Gedalia we papa blong hem Ahikam, mo bubu blong hem Safan. King blong mifala i putumap hem finis blong i distrikejen* blong Juda. Bambae yu save stap long haos blong hem wetem ol man blong ples ya. No sipos yu wantem aot long ples ya, bambae yu save go stap long weples we yu yu wantem.”

Nao komanda ya i givim presen long hem, wetem sam kakae blong rod, nao i letem hem i go.

6Nao hem i go long Mispa, i stap wetem Gedalia mo ol narafala man we ol man Babilonia oli letem olgeta oli stap long kantri ya.

Gedalia i kam distrikejen blong Juda

7 2 King 25.22-24 Nao ol kapten blong ol soldia blong Juda,* wetem ol soldia blong olgeta we ol man Babilonia oli no bin holem olgeta, oli harem nius we king blong Babilonia i putumap Gedalia finis i distrikejen* long Juda, mo hem i stap lukaot long olgeta ya we oli puaman, we ol man Babilonia oli no karemaot olgeta.

8Nao Ismael ya we papa blong hem Netania, mo Johanan we papa blong hem Karea, mo Seraea we papa blong hem Tanumet, mo olgeta ya we papa blong olgeta Efae we i man Netofa, mo man Mahaka ya Jesania, olgeta ya evriwan oli tekem ol soldia blong olgeta, oli go luk Gedalia long Mispa.

9Nao Gedalia i talem se, “Olgeta. Yufala i no fraet. Naoia mi mi promes long yufala, se sipos yufala i stap aninit long han blong ol man Babilonia ya, mo yufala i stap long kantri ya blong yumi, mo yufala i obei long king blong olgeta, bambae yufala evriwan i save stap gud.

10Mi bambae mi stap long Mispa, mo taem ol man Babilonia oli kam, mi bambae mi toktok long olgeta long nem blong yufala. Yufala i save gohed blong wokem waen blong yufala, mo yufala i save go karemaot ol frut long ol tri blong yufala, mo yufala i save gohed blong wokem ol olifoel* blong yufala, mo yufala i save putumgud olgeta samting ya i stap long haos blong yufala. Mo yufala i save stap gud long ol vilej ya we yufala i stap long hem.”

11Mo long taem ya tu, ol man Juda ya we oli stap long Moab, mo long Amon, mo long Edom, mo olgeta we oli stap long ol narafala kantri, oli harem nius we king blong Babilonia i letem smol haf blong ol man Juda oli stap yet long Juda, mo oli harem tu se hem i putumap Gedalia blong i distrikejen blong olgeta.

12Nao olgeta evriwan oli aot long ol naranarafala ples we oli stap long hem, oli kambak long Juda bakegen. Olgeta oli kamtru long Gedalia we hem i stap finis long Mispa, mo long ples ya, oli wokem ol waen, mo oli karemaot ol frut long ol tri, we oli plante we plante.

Ismael i kilim Gedalia i ded

13Nao Johanan wetem olgeta lida blong ol soldia we king blong Babilonia i no bin holem olgeta, oli kam long Mispa blong luk Gedalia.

14Mo oli talem long hem se, “King Bahalis, king blong ol man Amon, hem i sanem Ismael finis, blong i kam kilim yu yu ded. ?Yu yu save samting ya?” Be Gedalia i no bilif nating long tok ya.

15Nao taem Gedalia mo Johanan, tufala nomo i stap, Johanan i talem long hem se, “I moa gud yu letem mi mi go kilim man ya, we bambae i no gat man i save se hu i mekem. I no stret nating blong hem i kilim yu. Sipos hem i mekem olsem, ol man Juda* ya we oli stap wetem yu naoia, bambae oli ronwe bakegen, mo yumi evriwan bambae i lus.”

16Be Gedalia i talem se, “!No! !Yu no mekem olsem! Ol toktok ya we yu stap talem, i no tru.”