Rut 2 - Bislama Bible Revised 2012

Rut i go wok long garen blong Boas

1Nao long ples ya, i gat wan famle blong Elimelek, man ya blong Nomi. Man ya, nem blong hem Boas, mo hem i rijman mo i haeman tu.

2 Bambae mi biaen long ol man we oli glad blong letem mi mi mekem olsem.”

Nao Nomi i talem long hem se, “I oraet nomo, yu save go.”

3Nao hem i wokbaot i go, mo i gotru long garen blong wan man, nao i stap biaen long ol man blong wok, i stap pikimap ol bale we oli mestem. Garen ya i blong man ya we i famle blong Elimelek, be Rut i no save se garen ya i blong hu.

4Nao long taem ya, Boas i aot long haos blong hem long taon, i kam long garen ya. Hem i talem halo long ol man blong hem we oli stap katemaot ol bale, i talem se, “Hae God bambae i stap wetem yufala.”

Mo olgeta oli talem se, “Hae God bambae i blesem yu.”

5Nao hem i askem long man we i bos blong ol man blong hem se, “?Yang woman ya i woman blong hu?”

6Mo bos ya i talem se, “Hemia woman Moab ya. Taem Nomi i aot long Moab i kambak, woman ya i biaen long hem.

7Hem i askem long mi blong i biaen long ol man blong mi, blong pikimap ol bale we oli stap mestem. Nao hem i stat wok long eli moning, i wok kam kasem naoia, nao i jes spel smol long wansaed haos ya.”

8Nao Boas i go talem long Rut se, “Dota blong mi. Mi wantem talem wan samting long yu. Bambae yu no go pikimap bale long garen blong narafala man. Bambae yu stap long ples ya, yu wok wetem ol woman ya we oli stap wok blong mi.

9Bambae yu stap lukluk long ol man ya blong luk weples oli stap katem bale, nao bambae yu biaen long olgeta. Mi mi talem long ol man blong mi finis blong oli no mekem i nogud long yu. Mo taem yu tosta, yu save go dring long ol botel wota ya we oli fulumap olgeta i stap.”

10Nao Rut i bodaon long hem, we fes blong hem i godaon kasem graon, mo i talem se, “Masta. Mi mi wan strenja nomo long ples ya, be yu yu tingting tumas long mi.”

11Be Boas i talem long hem se, “No, be mi mi harem nius finis blong ol samting ya we yu mekem long mama blong man blong yu, i stat long taem ya we man blong yu i lus, i kam kasem tede. Mi save we yu lego stret papa mo mama blong yu, mo yu aot long ples blong yu, nao yu kam stap wetem mifala, we fastaem yu no save mifala nating.

12Hae God i God blong mifala, mo prea blong mi we hem bambae i mekem i gud tumas long yu, from ol samting ya we yu yu mekem. Yu bambae yu kasem stret pei blong ol samting ya long hem, from we yu stap luk long hem, blong i lukaot gud long yu.”

13Nao hem i talem se, “Masta, yu yu mekem i gud tumas long mi. Mi mi no sem mak nating long ol gel blong wok blong yu, be from we yu toktok gud long mi olsem, yu leftemap tingting blong mi, nao mi mi harem gud.”

14Nao long taem blong kakae, Boas i talem long hem se, “Yu kam kakae. Yu tekem sam bisket* ya, yu pusum i go long waen ya, yu kakae.” Nao hem i kam sidaon wetem ol man blong wok, mo Boas i tekem sam bale we oli rusum finis, i givim long hem. Nao hem i kakae gogo i fulap, i no save finisim.

15-16Nao taem hem i girap blong go wok bakegen, Boas i talem long ol man blong hem se, “Bambae yufala i letem hem i pikimap sam bale long ol bandel tu, yufala i no blokem hem. Mo yufala i pulumaot sam bale long ol bandel ya, yufala i livim i stap, blong hem i save pikimap olgeta, mo bambae yufala i no tok long hem from.”

17Nao hem i stap pikimap bale gogo san i godaon. Mo biaen, hem i go kilim ol hed blong bale ya we i pikimap, blong kilimaot ol kakae blong hem. Mo ol kakae ya blong bale i plante we plante, we klosap i kasem ten kilo.

18Nao hem i girap, i karem bale ya, i gohom, mo i soem long Nomi we i tekem plante olsem. Mo hem i karem haf kakae ya blong hem blong medel dei, i givim long hem.

19Nao Nomi i askem long hem se, “?Tede yu go pikimap bale long weples? ?Yu tekem kakae ya long garen blong hu? Prea blong mi we Hae God bambae i blesem man ya we i luk yu, i kaen long yu olsem.”

Nao hem i talem se, “Man ya we mi go pikimap bale long garen blong hem tede, nem blong hem Boas.”

20 Lev 25.25 Nao Nomi i talem long hem se, “Prea blong mi we Hae God bambae i blesem hem. Oltaem Hae God i stap holem ol promes blong hem we i mekem long trifala ya we i lus, mo long yumi ya we yumi stap laef yet. Yu luk, man ya i wan famle blong man blong mi ya. Hem i wan long olgeta we oli mas lukaot gud long yumitufala, mo i stret blong hem i tekem yu.”

21Nao Rut i talem long hem se, “Mo hem i talem long mi tu se mi mas biaen long ol man blong wok blong hem, gogo kasem we oli tekemaot olgeta kakae long garen blong hem.”

22Nao Nomi i talem long hem se, “Dota blong mi. I moa gud yu stap wok wetem ol woman blong man ya nomo, from we sipos yu go wok long garen blong ol narafala man, maet sam man bambae oli mekem i nogud long yu.”

23Nao hem i stap wok wetem ol woman blong wok blong man ya, i stap pikimap bale mo wit,* gogo olgeta oli katem olgeta bale mo wit evriwan long ol garen blong hem. Be oltaem hem i stap kambak long haos blong tufala.