Mak Sotfala stori blong buk ya - Bislama Bible Revised 2012

Sotfala stori blong buk yaBuk ya, GUD NIUS BLONG JISAS KRAES WE MAK I RAETEM, i stat long tok ya we i talem se gud nius ya, hem i “gud nius blong Jisas Kraes, Pikinini blong God”. Mak i soemaot we Jisas hem i man blong wok, mo tok blong hem i gat paoa. Yumi save luk paoa blong hem long fasin ya we hem i stap tijim ol man, mo we hem i gat paoa blong ronemaot devel, mo blong tekemaot sin blong ol man. Jisas i talemaot se hem i Pikinini* blong Man we hem i kam blong i givim laef blong hem blong tekemaot sin blong ol man, blong mekem olgeta oli fri. Mak i tokbaot ol merikel blong Jisas moa, i winim we hem i tokbaot ol tok blong hem.Long buk ya, fastaem Mak i tokbaot Jon Baptaes mo wok blong hem, mo we Jon i baptaesem Jisas. Biaen hem i tokbaot we Setan* i traem Jisas. Mo stret biaen long sotfala toktok ya, hem i gohed blong tokbaot wok blong Jisas we hem i stap mekem ol man we oli sik oli gud bakegen, mo we hem i stap tijim olgeta man. Taem Jisas i stap mekem ol wok blong hem, oltaem ol man blong hem oli stap save hem moa. Be i gat sam man we oli stap agens long hem, mo oltaem, oli stap kros long hem moa. Ol las japta blong buk ya oli tokbaot laef blong Jisas long las wik blong hem long wol ya, mo bigfala samting we hem i tokbaot, hemia ded blong hem, mo we hem i laef bakegen.Long japta 16 plante man oli bilif se Mak i raetem stori kasem vas 8 nomo, be ol vas biaen long hem, wan narafala man i raetem.Ol stori we oli stap long buk yaWok blong Jon Baptaes 1.1-13

Wok blong Jisas long Galili 1.14—9.50

Jisas i aot long Galili i go long Jerusalem 10.1-52

Las wik blong Jisas we i mekem wokblong hem long Jerusalem mo long ol ples raonabaot long Jerusalem 11.1—15.47

Jisas i laef bakegen 16.1-8

Jisas i kamtru long ol man blong hemmo hem i go antap long heven 16.9-20