Namba 20 - Bislama Bible Revised 2012

Ol samting we i hapen long Kades(Eksodas 17.1-7)

1Nao long manis ya Abib* we i fas manis blong yia, olgeta laen* blong Isrel* oli kam long draeples ya Jin, mo oli mekem ples blong olgeta long Kades. Mo long taem ya, Meriam i ded, mo oli berem hem long ples ya.

2 Eks 17.1-7 Nao long ples ya we oli stap long hem, i no gat wota, mo ol man oli kam hivap raon long Moses mo Hae Pris Eron,

3oli stap tok agens long tufala. Oli talem se, “Sipos mifala i ded wetem olgeta ya bifo we oli ded long fran blong Haos Tapolen blong Hae God, bambae i moa gud.

4?From wanem yutufala i tekem mifala i kam long draeples ya? ?Yutufala i wantem blong mifala evriwan i ded long ples ya, wetem ol anamol blong mifala?

5!Ples ya i wan rabis ples olgeta! !I no gat wan samting nating i save gru long hem! ?From wanem yutufala i tekemaot mifala long Ijip? !Yutufala i luk! !Long ples ya, i no gat kakae, mo i no gat fig,* mo i no gat grep,* mo i no gat grenadin*! !Mo antap bakegen, i no gat wota tu blong dring! ?From wanem yutufala i tekem mifala i kam long ples ya?”

6Nao tufala i gowe long olgeta, tufala i go stanap long doa blong Haos Tapolen blong Hae God. Mo tufala i nildaon, tufala i bodaon we fes blong tufala i godaon kasem graon, tufala i prea, nao tufala i luk laet ya we i saen we i saen, we i soemaot we Hae God i stap.

7Nao Hae God i talem long Moses se,

8“Yu kam tekem stik ya we i stap long fran blong Bokis ya we i Saen blong Promes* blong mi, mo yutufala i singaot olgeta man oli kam wanples. Nao long fes blong olgeta, bambae yu tok long ston ya longwe, mo bambae wota i sut i kamaot long hem, i kam long olgeta wetem ol anamol blong olgeta blong oli save dring.”

9Nao hem i go, i tekem stik ya, olsem we Hae God i talem.

10Nao tufala i singaot olgeta man oli kam wanples long fran blong bigfala ston ya, mo Moses i talem se, “!Olgeta! !Oltaem yufala i stap tok agens long Hae God! !Yufala i lesin! ?Olsem wanem? ?Mitufala i mas mekem wota i kamaot long ston ya blong yufala i dring?”

11Nao hem i leftemap stik ya, i kilim bigfala ston ya long hem tu taem, mo wantaem nomo, bigfala wota i sut i kamaot, mo olgeta man wetem ol anamol blong olgeta oli stap dring.

12Be biaen, Hae God i tok long tufala, i talem se, “!Tufala! !Bilif blong yutufala i no strong nating! !Yutufala i no naf blong soemaot long olgeta ya we mi mi tabu, mo mi gat paoa! From samting ya, bambae yutufala i no save lidim olgeta oli gotru long ples ya we mi mi promes blong givim long yufala.”

13Wota ya, olgeta oli putum nem blong hem se Meriba, we i min se “Oli stap tok agens”, from we long ples ya, oli girap, oli tok agens long Hae God, nao hem i soemaot long olgeta we hem i tabu, fasin blong hem i stret olgeta.

King blong Edom i no save letem olgeta oli pastru long kantri blong hem

14Nao taem Moses olgeta oli stap long Kades, hem i sanem sam man oli go blong luk king blong Edom, blong oli karem tok blong hem i go long hem. Mo taem olgeta oli gotru, oli talem long hem se, “King. Mifala ya i laen* blong Isrel,* we yumi kamaot long wan stamba nomo, mo tok blong mifala i olsem. Yu yu save we oltaem, hadtaem i stap kasem mifala, we i stap mekem mifala i harem nogud tumas.

15Mo yu save we ol bubu blong mifala bifo oli go long Ijip, mo oli stap plante handred yia long ples ya. Be biaen, ol man Ijip ya oli stap spolem olgeta, kam kasem taem blong mifala,

16nao mifala i krae long Hae God blong hem i givhan long mifala, mo hem i harem krae blong mifala, i sanem wan enjel i kam, we i lidim mifala i kamaot long Ijip. Mo naoia, mifala i stap long ples ya Kades, we i stap long mak blong graon blong yufala.

17?Plis yu save letem mifala i pastru long kantri ya blong yu? Mifala wetem ol anamol blong mifala, bambae mifala i no save go olbaot. Mifala i no save go insaed long ol garen blong yufala mo long ol plantesen blong yufala, mo mifala i no save dring wota long ol wel blong yufala tu. Bambae mifala i stap folem bigrod ya nomo, gogo kasem we mifala i goaot long kantri blong yu bakegen.”

18Be ol man Edom oli talem se, “!Nogat! !Mifala i no save letem yufala i kam pas long kantri blong mifala. Sipos yufala i kam, bambae mifala i mekem faet long yufala.”

19Nao ol man ya oli talem se, “Be bambae mifala i stap folem bigrod nomo, mo sipos mifala no ol anamol blong mifala i dring wota blong yufala, bambae mifala i mas pem. Mifala i wantem nomo blong pastru.”

20Be ol man Edom oli talem bakegen se, “!Nogat! !Mifala i no save letem!” Nao king i sanem plante soldia blong hem we oli strong man blong faet oli wokbaot i kam blong mekem faet long olgeta.

21Nao from we king ya i no save letem olgeta oli pastru long kantri blong hem, olgeta oli tanemraon, oli folem narafala rod.

Hae Pris Eron i ded

22Nao olgeta oli aot long Kades, oli kam kasem hil ya Horo,

23long mak blong kantri ya Edom. Mo taem oli kasem ples ya, Hae God i toktok long Moses mo Hae Pris Eron bakegen.

24Hem i talem se, “Moses. Eron bambae i no save go insaed long kantri ya we mi mi promes* blong givim long yufala. Bambae hem i ded, from we yutufala i agens long mi long Meriba, yutufala i no folem tok blong mi.

25Naoia yu mas tekem hem wetem pikinini blong hem pris ya Eleasara, yutrifala i go antap long hil ya Horo,

26mo long ples ya, bambae yu mas tekemaot ol spesel klos ya we hem i stap werem, yu mas putum olgeta i go long pris ya. Mo biaen, bambae hae pris ya i ded long ples ya.”

27Nao Moses i mekem olsem we Hae God i talem. Long fes blong olgeta man, trifala i aot, trifala i wokbaot blong go antap long hil ya,

28Eks 29.29; Nam 33.38; Dut 10.6mo long ples ya, Moses i tekemaot ol spesel klos ya we hae pris i stap werem, i putum olgeta i go long pris, nao hae pris i ded antap long hil ya. Mo biaen, Moses wetem pris ya, tufala i kamdaon bakegen.

29Mo taem ol man oli harem we hae pris ya i ded, olgeta evriwan oli stap krae from hem, gogo kasem toti dei.