Esikel 39 - Bislama Bible Revised 2012

King Gogo i ded

1Mo long vison ya, Hae God we i Masta* blong yumi, i toktok long mi bakegen, i talem se, “Man blong wol ya. Yu talem long King Gogo, we mi mi tok agens long hem, mi talem se, ‘King Gogo. Yu yu king blong ol laen blong Mesek, mo ol laen blong Tubal, be mi mi enemi blong yu.

2Bambae mi tanemraon yu, mi pulum yu yu aot long ples blong yu daon long not we long not olgeta, mo bambae mi lidim yu yu kam kasem ol hil blong Isrel blong faet agens long ol laen* blong Isrel.*

3Nao bambae mi slavemaot bonara blong yu long lef han blong yu, mo mi slavemaot ol ara long raet han blong yu.

4Yu wetem olgeta soldia blong yu, mo ol fren blong yu we oli stap givhan long yu, bambae yufala i ded olbaot long ol hil blong kantri ya. Mo bambae mi letem ol pijin mo ol wael anamol oli kam kakae ol dedbodi blong yufala.

5Bambae ol dedbodi blong yufala i stap olbaot long ol open ples. Hemia tok blong mi.

6Bambae mi sanem faea i kam long kantri ya blong yu, mo long olgeta ples klosap long solwota we ol man blong olgeta oli stap gud nomo long hem, mo bambae olgeta evriwan oli savegud we mi mi Hae God.

7Bambae mi mas mekem we ol man blong mi oli save tabu nem blong mi, nao bambae oli no moa mekem sem long hem bakegen. Nao ol man blong olgeta kantri bambae oli savegud we mi mi Hae God, mi God blong ol laen blong Isrel, mo mi tabu we mi tabu.’ ”

8Mo hem i talem long mi se, “Dei blong ol samting ya we mi stap tokbaot, bambae i mas kamtru, stret olsem we mi mi talem.

9Olgeta man we oli stap long ol taon long Isrel, bambae oli go karem ol samting blong faet blong ol enemi ya. Bambae oli hivimap ol sil* mo ol bonara mo ol ara mo ol spia mo ol nalnal, i kam faeawud blong olgeta. Ol samting ya bambae oli plante we plante, mo bambae oli gat plante faeawud we oli save yusum gogo kasem seven yia.

10Nao bambae oli no moa save go olbaot blong lukaot faeawud, mo bambae oli no save go long bus blong katemdaon ol tri, from we bambae oli save yusum ol samting ya blong faet. Mo ol samting we ol soldia oli bin karemaot long olgeta, olgeta bambae oli go karemaot bakegen. Mi mi Hae God, mi Masta blong yufala, mo hemia tok blong mi.”

Beregraon blong King Gogo

11Nao long vison ya, Hae God i talem se, “Taem ol samting ya i kamtru, bambae mi makemaot wan pis graon long Isrel long ples ya we nem blong hem, ‘Krik blong Ol Man blong Wokbaot’, blong oli berem King Gogo wetem ol soldia blong hem long hem, nao bambae ol man oli no moa save wokbaot long ples ya. Hemia long Ded Si long saed i go long is. Long ples ya nao, bambae ol laen* blong Isrel* oli berem olgeta ya long hem, mo bambae oli putum nem blong ples ya, se ‘Krik blong Hamongogo’ we i min se ‘Krik blong Bigfala Kampani blong Ol Soldia blong King Gogo’.

12Bambae olgeta oli stap berem ol man ya gogo kasem seven manis, nao bambae ples ya i kam klin bakegen.

13Olgeta man evriwan bambae oli givhan blong berem ol dedman ya, mo long dei ya we mi bambae mi win, mo mi soemaot hae nem blong mi, ol man olbaot long evri ples bambae oli ona gud long olgeta. Mi mi Hae God, mi Masta* blong yufala, mo hemia tok blong mi.

14“Nao biaen long seven manis ya, bambae ol man oli jusumaot sam man blong oli go wokbaot olbaot long ples ya, blong berem olgeta ya we oli stap yet olbaot, blong bambae oli save mekem kantri ya i kam klin bakegen.

15Mo oltaem, taem ol man oli stap wokbaot long kantri ya, sipos oli luk ol bun blong wan dedman, bambae oli makem ples ya, blong ol man blong berem man oli save go berem hem long ‘Krik ya blong Hamongogo’.

16Mo i gat wan taon long ples ya, we bambae oli putum nem blong hem se ‘Hamona’, we i min se ‘Bigfala Kampani blong Ol Soldia blong King Gogo’. Nao long ol fasin ya, bambae oli mekem ples ya i kam klin bakegen.”

17 Rev 19.17,18 Nao long vison ya, hem i talem long mi se, “Man blong wol ya. Yu singaot olgeta pijin mo olgeta anamol oli aot long evri ples, oli kam blong kakae sakrefaes ya we bambae mi mekemrere blong olgeta. Hemia i wan bigfala lafet we bambae i stap antap long ol hil ya blong Isrel, we bambae oli save kakae mit mo oli save dring blad blong ol soldia ya.

18Bambae oli kakae ol dedbodi blong ol king blong wol ya, wetem ol nambawan soldia blong olgeta, mo bambae oli dring blad blong olgeta. Olgeta ya, mi bambae mi kilim olgeta olsem we ol man oli go long ples blong sakrefaes, oli stap kilim ol man sipsip mo ol pikinini blong sipsip mo ol nani mo ol bul we oli fatfat gud.

19Taem mi kilim ol man ya, ded ya blong olgeta i olsem sakrefaes we mi mi mekem, nao bambae ol pijin mo ol anamol oli kam kakae ol gris blong olgeta, mo bambae oli dring blad blong olgeta gogo oli drong long hem.

20Nao long ples ya blong mi we bambae mi mekemrere ol kakae blong olgeta long hem, oli save kakae olgeta samting we oli save luk, olsem ol hos wetem ol man blong ron long olgeta, mo ol nambawan soldia, mo ol narafala man blong faet. Mi mi Hae God, mi Masta blong yufala, mo hemia tok blong mi.”

Kantri ya Isrel bambae i kam gud bakegen

21Nao long vison ya, Hae God i talem long mi bakegen se, “Bambae mi letem ol man blong ol narafala kantri oli luk paoa blong mi we mi mi king, mo bambae mi soemaot long olgeta we mi mi gat raet blong panisim olgeta.

22Nao i stat long taem ya i go, ol laen* blong Isrel* bambae oli savegud we mi mi Hae God, mi God blong olgeta.

23Mo ol man blong ol narafala kantri bambae oli save we mi mi tanem baksaed long ol man blong mi from ol sin blong olgeta we oli mekem agens long mi, mo mi letem ol enemi oli kam faet agens long olgeta. Long taem ya, ol enemi oli kilim sam long olgeta oli ded long faet, mo sam oli go wok slef* long ol narafala kantri.

24Samting ya we mi mekem long olgeta, i stret nomo blong oli kasem, mo mi tanem baksaed long olgeta, from ol rabis fasin ya blong olgeta we i nogud we i nogud long fes blong mi.”

25Nao hem i talem se, “Be naoia, bambae mi gat sore long ol man blong mi we oli kamaot biaen long Jekob* ya bifo, mo bambae mi mekem olgeta oli stap gud bakegen, we oli gat plante samting. Mo bambae mi no moa letem ol man oli spolem tabu nem blong mi bakegen, we oli stap tok nogud long olgeta.

26Taem oli stap gud bakegen long ples blong olgeta, we oli sef, bambae oli no moa fraet se ol enemi oli save kam faet agens long olgeta bakegen. Fastaem, olgeta oli sem tumas from we oli gowe long mi mo oli mekem mi mi harem nogud, be bambae oli no moa save tingbaot fasin ya bakegen.

27Bambae mi tekemaot olgeta man blong mi we oli stap long ol kantri blong ol enemi blong olgeta, mi karem olgeta i kambak long kantri blong olgeta. Bambae mi mekem olsem blong soemaot long ol man blong ol narafala kantri we mi mi tabu.

28Nao bambae ol man blong mi oli savegud we mi nao mi Hae God, mi God blong olgeta. Bambae oli save samting ya, from we mi mi mekem olgeta oli go wok slef long narafala kantri, mo bambae mi tekem olgeta evriwan oli kam wanples, mi karem olgeta oli kambak long kantri blong olgeta bakegen, we bambae mi no livim wan long olgeta nating i stap longwe.

29Bambae mi mi givim Spirit blong mi long olgeta, we bambae oli kasem fulpaoa blong hem, mo neva bambae mi tanem baksaed long olgeta bakegen. Mi mi Hae God, mi Masta* blong yufala, mo hemia tok blong mi.”