1Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem.
2Yu mas lesin long ol waestok ya, mo yu mas traehad blong haremsave olgeta.
3Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting.
4Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem.
5Sipos yu stap mekem olsem, bambae yu save kasem mining blong tok ya we i talem se, “Yu mas tinghevi long Hae God, mo yu mas ona gud long hem.” Nao bambae yu save fasin blong hem moa, blong yu savegud hem.
6Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.
7Hem i stap givhan long ol stret man we oli no save giaman, mo i stap blokemgud olgeta blong trabol i no kasem olgeta.
8Hem i stap lukaot gud long olgeta we oli stap mekem i stret nomo long ol narafala man, mo i stap gad gud long olgeta we tingting blong olgeta i stap strong long hem.
9Nao sipos yu harem tok blong mi, bambae yu save luksave ol fasin we i gud, mo yu save jajem ol man long stret fasin, mo yu save mekem i stret long olgeta man, mo bambae yu save olgeta samting we i stret blong yu mekem.
10Nao bambae yu save kam waes, mo waes ya blong yu bambae i save mekem yu yu harem gud.
11Fasin ya we yu luksave ol samting, mo we yu savegud ol mining blong hem, hem bambae i stap lukaot long yu,
12mo bambae i stap blokemgud yu, blong yu no mekem ol fasin nogud. Mo bambae i mekem we yu stap longwe long ol man we toktok blong olgeta i blong statem trabol nomo.
13Ol man olsem oli lego stret laef finis, oli stap long fasin blong tudak nomo.
14Olgeta oli glad blong mekem ol samting nogud, mo oli stap harem gud blong mekem ol rabis fasin ya.
15Ol man olsem, yu no save putum tingting blong yu i stap long olgeta, mo yu no save trastem olgeta nating.
16Sipos yu harem tok blong mi, bambae yu save blokem woman nogud, we i traem blong switim yu long ol swit tok blong hem.
17Woman olsem i gowe long man blong hem, we i mared long hem long taem ya we i yangfala yet, mo i fogetem promes blong hem we i mekem long fes blong Hae God.
18Sipos yu go long haos blong woman olsem, hemia i min se yu stap wokbaot long rod blong ded nomo, mo yu stap go klosap long Hom* blong ol Dedman.
19Man we oltaem i stap go insaed long haos blong woman olsem, bambae hem i no save lego fasin ya, mo neva bambae hem i save kambak bakegen long rod blong laef.
20From samting ya, yu mas folem fasin blong gudfala man. Oltaem yu mas wokbaot long rod we i stret.
21Ol stret man we yu save trastem olgeta, bambae oli save stap gud long ples ya blong yumi.
22Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.
Who We AreWhat We EelieveWhat We Do
2025 by iamachristian.org,Inc All rights reserved.
