Sam 41 - Bislama Bible Revised 2012

Prea we sikman i mekem nao i oraet bakegen(Sing ya, Deved i wokem.)(Tok i go long ol man.)

1Ol man we oli stap tingbaot ol puaman,

oli save harem gud.

Sipos oli stap long trabol,

Hae God bambae i givhan long olgeta.

2Hem bambae i blokem olgeta,

i lukaot gud long laef blong olgeta.

Bambae hem i mekem olgeta

oli stap long graon ya,

oli harem gud,

bambae hem i no save letem olgeta

oli go long paoa blong ol enemi blong olgeta.

3Mo taem oli sik,

hem bambae i givhan long olgeta

i mekem olgeta oli oraet bakegen.

4Taem mi mi sik,

mi talem se, “Hae God,

mi mi mekem i nogud long yu.

Plis yu sore long mi,

yu mekem mi mi strong bakegen.”

5Ol enemi blong mi oli stap spolem mi

long ol tok blong olgeta.

Oli wantem nomo blong mi mi ded,

blong ol man oli fogetem mi.

6Olgeta we oli kam blong luk mi

oli giaman nomo,

oli no sore long mi nating.

Oli kam nomo

blong faenemaot sik blong mi,

nao taem oli gobak,

oli stap tokbaot mi long evri ples.

7Olgeta man ya we oli no laekem mi

oli stap tok smosmol agens long mi,

mo oli stap tingbaot nomo

se bambae mi mi ded.

8Oli talem se,

“Hem i sik finis

we bambae i ded from.

Neva bambae hem i kamaot

long bed blong hem bakegen.”

9 Mat 26.23; Mak 14.18; Luk 22.21; Jon 13.18 Gudfala fren ya blong mi

we mi trastem hem tumas,

mo we mitufala i stap kakae

long wan basket nomo,

be hem i girap i agensem mi.

(Tok i go long Hae God.)

10Hae God,

plis yu sore long mi.

Yu mekem mi mi strong bakegen,

nao bambae mi go givimbak ol samting ya

we ol enemi blong mi

oli stap mekem long mi.

11Taem mi luk

we olgeta oli no save winim mi,

bambae mi savegud

we yu yu glad long mi.

12Yu yu stap givhan long mi,

from we mi stap mekem ol samting

we i stret.

Bambae yu gohed blong holem mi

mi stap wetem yu oltaem.

(Tok i go long ol man.)

13 Sam 106.48 Yumi presem Hae God

we i God blong yumi ol laen* blong Isrel.*

Oltaem, yumi mas presem hem

gogo i no save finis.

Amen.

Amen.