1Nao long namba naen yia we King Jedekia i king blong Juda,* long namba ten manis* blong hem, King Nebukadnesa, king blong Babilonia i kam wetem olgeta soldia blong hem, nao oli kam hivap raon long Jerusalem* blong mekem faet agens long hem.
2Mo long namba leven yia long namba fo manis, long namba naen dei blong hem, olgeta oli brekem hol long stonwol blong taon ya, oli kam insaed.
3Taem olgeta oli winim taon ya, olgeta haeman blong king ya oli kam insaed, mo oli go sidaon long doa* ya blong bigfala stonwol blong taon ya we nem blong hem, Doa long Medel, blong oli jajem ol man. Olgeta ya, i gat Negalsareja, mo Samganebo, mo Sasekim, mo narafala Negalsareja bakegen, wetem ol narafala haeman blong king.
4Taem King Jedekia mo ol soldia blong hem oli luk samting ya, oli traem ronwe long naet. Oli folem rod ya we i pastru long garen blong king, nao oli gotru long doa ya we nem blong hem, “Doa we Tufala Stonwol i Joen long hem.” Oli ronwe, oli folem rod ya we i go long bigfala levelples ya klosap long Jodan Reva.
5Be ol soldia blong Babilonia oli ronem olgeta, nao oli holem king ya long bigfala levelples ya klosap long taon ya Jeriko. Oli tekem hem i go long King Nebukadnesa we i stap long kantri ya Hamat longwe long not, long taon ya Riblaha, nao king ya i jajem hem long ples ya.
6Nao long ples ya, King Nebukadnesa i talem long ol man blong hem, blong oli kilim ol pikinini blong king ya, stret long fes blong hem, mo blong oli kilim ol haeman blong Juda tu oli ded.
7Nao biaen, oli tekemaot tufala ae blong king ya, mo oli fasem tufala han blong hem long jen, blong tekem hem i go long Babilonia.
8Nao long semtaem ya, long Jerusalem, ol man Babilonia oli bonem haos blong king, wetem ol haos blong ol narafala man, mo oli brebrekem ol bigfala stonwol blong taon ya tu.
9Mo biaen long ol samting ya, Nebusaradan we i komanda blong ol soldia, hem i holem olgeta ya we oli stap insaed long taon ya yet, wetem olgeta we oli bin ronwe long taon ya blong go joen long ol man Babilonia afsaed, nao i tekem olgeta evriwan i go long Babilonia, blong oli wok slef* long ples ya.
10Be olgeta we oli pua tumas, we oli no gat garen, mo oli no gat olting blong olgeta, hem i livim olgeta oli stap long Juda, mo hem i givim graon long olgeta, mo i givim ol plantesen blong ol rop ya grep* tu long olgeta.
Ol man Babilonia oli letem Profet Jeremaea i go fri bakegen11Nao King Nebukadnesa i talem long Nebusaradan, we i komanda blong hem, blong i go talemaot long ol haeman blong hem se,
12“Yufala i go lukaot Profet Jeremaea. Mo sipos yufala i faenem hem, bambae yufala i no spolem hem, yufala i mas lukaot gud long hem. Ol samting we hem i wantem, bambae yufala i mas mekem long hem.”
13Nao komanda ya wetem tu haeman ya, Nebusasban mo Negalsareja, mo ol narafala haeman ya blong king oli sanem ol man blong olgeta i kam.
14Nao ol man ya oli kam tekemaot hem long yad blong haos blong King Jedekia, mo oli putum hem long han blong man ya Gedalia, we papa blong hem Ahikam, mo bubu blong hem Safan. Mo oli talem long man ya blong i tekem hem i gobak long ples blong hem. Nao profet i stap gud wetem ol man ples blong hem.
Hae God i leftemap tingting blong Ebedmelek15Be fastaem, taem we Profet Jeremaea i stap kalabus yet long yad ya blong haos blong king, Hae God i givim tok blong hem long hem,
16blong i go talemaot long man Itiopia ya, Ebedmelek. Nao profet i go talem long hem se, “Ebedmelek. Mifala ya i laen* blong Isrel,* mo Hae God i God blong mifala. Hem i gat olgeta paoa, mo hem i talem se, ‘Bambae mi mi letem bigfala trabol i kam kasem taon ya, olsem we mi talem finis. Mo taem ol samting ya i kamtru, bambae yu yu stap long ples ya, mo bambae yu save luk ol samting ya.
17Be bambae mi mi stap lukaot gud long yu, mo olgeta ya we yu stap fraet long olgeta, bambae oli no save spolem yu.
18Bambae mi holem yu yu stap gud, nao bambae oli no save kilim yu. Bambae yu no ded, yu save ronwe, from we yu stap trastem mi oltaem. Mi mi Hae God, mo hemia tok blong mi.’ ”
Who We AreWhat We EelieveWhat We Do
2025 by iamachristian.org,Inc All rights reserved.
