1Nao biaen i no longtaem, King Nahas blong Amon i ded, mo pikinini blong hem Hanun i kam king.
2Mo King Deved i talem se, “Mi mi mas fren gud long King Hanun ya, olsem we papa blong hem King Nahas i bin fren gud long mi.” Nao hem i sanem ol man blong karem tok blong hem oli go talemaot long King Hanun we hem i stap harem nogud tumas from we papa blong hem i ded.
Be taem ol man ya oli kamtru long Amon,
3ol lida blong ol man Amon oli talem long king blong olgeta se, “!Yu luk! !King Deved i sanem ol man ya i kam blong talemaot sore blong hem long yu, be hem i no ona long papa blong yu nating! !Hem i sanem olgeta i kam nomo blong lukluksave ol samting long taon ya, blong i save kam mekem faet long yumi blong winim yumi!”
4Nao King Hanun i holem ol man ya blong King Deved, i sevemaot wansaed mustas blong olgeta, mo i katemaot ol klos blong olgeta stret long ples blong strap, nao i sanem olgeta i gohom.
5Be olgeta oli sem tumas blong gohom, mo taem King Deved i harem nius blong samting ya, hem i sanem tok i go long olgeta se, “I gud yufala i stap fastaem long Jeriko, gogo kasem we mustas blong yufala i gru bakegen, nao biaen, bambae yufala i save kambak.”
6Nao taem ol man Amon oli luksave we oli mekem King Deved i kam enemi blong olgeta, oli girap, oli singaot twanti taosen soldia blong Siria we oli stap long Betrehob mo long Joba, mo twelef taosen man blong ples ya Tob, mo oli singaot king blong Mahaka tu wetem wan taosen man blong hem blong olgeta evriwan oli kam joen long olgeta long faet. Mo oli pem ol man ya blong oli givhan long olgeta.
7Mo taem King Deved i harem samting ya, hem i sanem Joab wetem olgeta soldia blong hem oli go blong mekem faet long olgeta.
8Nao ol man Amon oli aot, oli kam stanap long rod blong go insaed long taon ya Raba, we i kaptel blong olgeta, nao oli stap rere blong faet long ples ya. Mo ol man Siria wetem ol man Tob mo ol man Mahaka, olgeta oli aot long taon ya, oli go stap long open ples, oli stap rere blong faet long ples ya.
9Nao Joab i luksave se ol man ya bambae oli kam mekem faet long hem long fored blong hem mo long bak blong hem tu. Nao hem i jusum ol nambawan soldia blong hem, i putum olgeta long ples we bambae oli fesem ol man Siria.
10Mo olgeta narafala soldia, hem i putum olgeta long han blong brata blong hem Abisae, mo Abisae i putum olgeta long ples we bambae oli fesem ol man Amon.
11Nao Joab i talem long brata ya blong hem se, “Sipos yu luk se ol man Siria oli winim mi, bambae yu kam givhan long mi, mo sipos mi mi luk se ol man Amon oli winim yu, bambae mi mi kam givhan long yu.
12!Yu no mas fraet! Yumi mas faet strong blong sevem ol man blong yumi, mo ol taon ya blong Hae God we i God blong yumi. !Mo prea blong mi we hem bambae i mekem olsem we hem i wantem!”
13Nao Joab wetem ol man blong hem oli muv i go blong mekem faet long ol man Siria, nao ol man Siria oli ronronwe.
14Mo taem ol man Amon oli luk we ol man Siria oli stap ronronwe, olgeta tu oli ronwe long Abisae, oli go insaed long taon blong olgeta bakegen. Nao Joab i no moa mekem faet long ol man Amon, hem i girap, i tanemraon, i gobak long Jerusalem.*
15Nao taem ol man Siria oli luk we ol laen* blong Isrel* oli winim olgeta, oli singaot olgeta soldia blong olgeta oli kam wanples.
16Mo King Hadadesa i sanem tok i go blong singaot ol man Siria we oli stap long narasaed Yufretes Reva i go. Nao olgeta ya oli kam long ples ya Helam, mo Sobak we i komanda blong ol soldia blong King Hadadesa i stap lidim olgeta.
17Nao taem King Deved i harem nius blong samting ya, hem i singaot olgeta soldia blong hem oli kam wanples bakegen, nao hem i lidim olgeta oli gokros long Jodan Reva, oli wokbaot i go long Helam, long ples ya we ol man Siria oli stap rere finis, oli fesem hem i kam. Olgeta ya oli girap, oli kam mekem faet,
18be ol laen blong Isrel oli ronem olgeta oli gobak. Long taem ya, King Deved olgeta oli kilim seven handred draeva blong kat blong faet blong ol man Siria, wetem foti taosen soldia blong olgeta we oli man blong ron long hos, oli ded. Mo Sobak tu i karekil, mo i ded long ples ya we oli mekem faet long hem.
19Mo taem ol king we oli stap aninit long King Hadadesa oli luksave we ol laen blong Isrel oli winim hem, olgeta oli girap, oli mekem pis wetem ol laen blong Isrel, nao oli kam stap aninit long rul blong olgeta. Mo ol man Siria oli fraet blong givhan bakegen long ol man Amon.
Who We AreWhat We EelieveWhat We Do
2025 by iamachristian.org,Inc All rights reserved.
