Esikel 19 - Bislama Bible Revised 2012

Wan sing blong krae

1Nao Hae God i talem long mi blong mi sing long wan singsing blong krae, we i tokbaot tu pikinini blong king blong Juda Sing ya i olsem.

2Ol laen* blong Isrel.*

Mama blong yufala

i olsem wan nambawan woman laeon

we i stap lukaot gud long ol pikinini blong hem

long medel blong ol man laeon we oli wael.

3Hem i lukaot gud long wan pikinini blong hem,

gogo i kam wan strong laeon,

mo i tijim hem

long fasin blong kasem kakae blong hem,

nao hem i kam wan laeon blong kakae man.

4Nao ol man blong ol narafala kantri

oli harem nius blong hem,

nao oli digim hol long graon

blong hem i foldaon long hem.

Nao hem i foldaon long hem,

mo oli hukum hem long huk,

oli pulum hem i go long Ijip.

5Nao mama blong hem i stap wet long hem,

be i luk we hem i go lus,

i no moa save kambak.

Nao hem i girap,

i lukaot gud long narafala pikinini blong hem,

gogo i kam wan strong laeon.

6Taem hem i kam bigwan,

hem i go wokbaot wetem ol narafala laeon.

Nao hem tu i lanem fasin

blong kasem kakae blong hem,

mo i kam laeon blong kakae man.

7Hem i spolemgud

ol strong ples blong haed blong olgeta,

mo i flatemgud ol taon blong olgeta tu.

Oltaem, taem hem i singaot bigwan,

olgeta man blong kantri ya

oli fraet we i fraet.

8Nao ol man blong ol narafala kantri

oli kam wanples,

oli raonem hem blong faet agens long hem.

Oli hangem net blong olgeta

blong blokem hem,

nao hem i go pas long net ya

we oli hangemrere i stap.

9Nao oli holem hem,

oli putum hem long wan bigfala bokis

we oli stap putum wael anamol long hem,

nao oli karem hem i go

long king blong Babilonia.

Nao oli holem hem i stap long ples ya,

mo ol gad oli stap gad long hem,

blong bambae ol man

oli no moa save harem voes blong hem

antap long ol hil blong Juda.

10Mama blong yufala i olsem rop ya grep*

we oli planem long saed blong reva.

Nao from we i gat plante wota long ples ya,

i mekem rop ya i gru gud,

i gat plante lif mo i karem plante frut.

11Nao ol han blong hem oli strong,

mo oli kam olsem ol spesel wokingstik blong ol king.

Rop ya i gru, i go antap kasem ol klaod,

mo olgeta man oli luk we i longfala i go antap,

mo i fulap long ol lif.

12Be ol man we oli kros tumas long hem,

oli girap oli pulumaot stamba blong hem,

oli sakem long graon i stap.

Nao iswin* i blu long ol frut blong hem,

i mekem olgeta oli drae.

Mo ol han blong hem oli brobrok,

oli kam drae,

nao faea i bonem olgeta.

13Be naoia oli planem bakegen long drae ples,

long ples we i drae tumas,

i no gat wota nating long hem.

14Nao faea i kasem hem,

i bonem ol han mo ol frut blong hem.

Bambae ol han ya blong hem

oli no moa save strong bakegen,

mo oli no moa save kam

olsem ol spesel wokingstik blong ol king.

Hemia wan sing blong krae we oli stap singsing long hem oltaem nomo.