1Nao ol man Filistia oli tekem ol soldia blong olgeta i kam wanples long Afek, mo ol laen* blong Isrel* oli go putumap ol haos tapolen blong olgeta klosap long wan springwota long bigfala levelples ya long medel blong ol hil long Jisrehel.
2Nao ol faef king blong Filistia oli tekem ol soldia blong olgeta, we long sam kampani blong soldia i gat wan taosen man, mo long sam kampani i gat wan handred man, nao oli wokbaot i kam blong faet. Mo Deved wetem ol man blong hem oli joen wetem olgeta, oli maj i kam biaen long King Akis.
3Be taem ol komanda blong ol man Filistia oli luk olgeta, oli talem se, “!Ei! ?Ol Hibru ya oli stap mekem wanem long ples ya?”
Be King Akis i talem se, “Hemia Deved ya, wan haeman blong King Sol blong Isrel. Hem i stap wetem mi longtaem lelebet finis. Mo i stat long taem ya we hem i kam stap wetem mi, kam kasem tede, be neva mi faenem we hem i mekem wan samting we i no stret.”
4Be ol komanda ya, oli kros long king ya, oli talem long hem se, “Yu sanem man ya i gobak long vilej ya we yu givim long hem. Yu no letem hem i kam wetem yumi long faet. Sipos yumi stap faet, nao hem i girap, i stap faet agens long yumi bakegen, bambae i nogud ya. Sipos hem i kilim ol man blong yumi oli ded, hemia i wan nambawan rod blong mekem tingting blong masta blong hem i kam gud bakegen long hem.
51 Saml 18.7; 21.11Mo bakegen, hemia man ya we bifo, ol woman oli stap leftemap nem blong hem, oli stap danis, oli stap singsing se,
‘King Sol i kilim plante taosen man,
be Deved i kilim plante plante
taosen moa,
winim hem.’ ”
6Nao king ya i singaot Deved i kam, i talem long hem se, “Deved, mi mi wantem tumas blong yu yu kam wetem mi long faet. Hae God ya blong yufala, hem i laef, mo i stap we i stap, mo long fes blong hem, mi mi talem tru long yu, se yu yu wan stret man nomo. Mi mi no faenem wan samting nating we yu mekem i rong, i stat long taem ya we yu kam blong stap wetem mi kam kasem tede, be ol narafala king ya oli ting se i nogud yu yu kam wetem mifala.
7From samting ya, i moa gud yu gohom bakegen, we yu mekem tingting blong yu i stap kwaet, yu no mekem wan samting we bambae olgeta ya oli harem nogud from.”
8Nao hem i talem se, “?King, mi mi mekem wanem fasin we i nogud? Yu yu masta blong mi, mo yu king blong mi. Mo yu yu talem se yu no faenem wan samting nating we mi mekem i rong, i stat long taem ya we mi stat wok blong yu, kam kasem tede. ?From wanem mi mi no save go wetem yu blong faet long ol enemi ya blong yu?”
9Nao king ya i talem se, “Mi mi agri. Mi mi no faenem wan poen long yu nating. Mi luk se yu yu gud long mi olsem wan enjel blong Hae God nomo. Be ol komanda ya oli talem se yu yu no save kam wetem mifala long faet.
10From samting ya, tumora long eli moning, taem i brok delaet, yufala ya we i ronwe long King Sol blong kam stap wetem mi, yufala i mas aot long ples ya, yufala i gobak.”
11Nao nekis dei, long eli moning, Deved wetem ol man blong hem oli stat wokbaot blong gobak long Filistia, mo ol man Filistia oli wokbaot bakegen blong go long Jisrehel.
Who We AreWhat We EelieveWhat We Do
2025 by iamachristian.org,Inc All rights reserved.
