1Nao Hae God i talem long Profet Samuel se, “Samuel. ?Bambae yu yu stap harem nogud from King Sol ya gogo kasem wetaem? Mi mi no moa wantem blong hem i stap rul long yufala. Yu tekem olifoel,* yu go long Betlehem, yu go luk wan man, nem blong hem Jese. Mi mi jusumaot wan pikinini blong hem finis blong bambae i kam king.”
2Be profet i talem se, “?Bambae mi mekem olsem wanem? !Sipos king i harem samting ya, bambae hem i kilim mi ya!”
Be Hae God i talem se, “Taem yu go, bambae yu tekem wan smol kao, nao taem yu gotru bambae yu talem long ol man se, ‘Mi mi kam long ples ya blong mekem sakrefaes long Hae God.’
3Bambae yu mas singaot Jese i kam long sakrefaes ya, mo long taem ya, bambae mi mi talemaot long yu ol samting we yu mas mekem. Man we mi bambae mi talem long yu, hem nao yu mas makemaot se bambae i kam king.”
4Nao profet i mekem ol samting ya we Hae God i talem long hem. Mo taem hem i kamtru long Betlehem, ol lida blong taon ya oli luk hem, mo oli fraet, nao oli kam askem long hem se, “Profet. ?Olsem wanem? ?Yu kam long gudfala tingting?”
5Nao hem i talem se, “Yes, i gud nomo. Mi kam blong mekem sakrefaes long Hae God. I gud yufala i go mekem ol samting blong mekem yufala i klin long fes blong hem, nao yufala i kam joen long mi.”
Nao hem i go mekem Jese wetem ol pikinini blong hem oli klin long fes blong Hae God, mo i singaot olgeta blong oli kam long sakrefaes ya.
6Nao taem olgeta oli kamtru, hem i luk Eliab, pikinini ya blong Jese, nao i stap tingting se, “Man ya we i stap stanap long fes blong Hae God, ating hem nao we hem i jusumaot.”
7Be Hae God i talem long hem se, “Yu no tingbaot we man i longfala man mo i naes. Mi mi no wantem man ya, from we fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.”
8Nao Jese i singaot narafala pikinini ya blong hem Abinadab i kam, mo i tekem hem i kam long profet. Be profet i talem se, “No, hemia tu, Hae God i no jusum.”
9Nao hem i tekem Sama i kam. Be profet i talem se, “No, i no hemia yet we Hae God i jusum.”
10Mo long fasin ya, hem i tekem seven pikinini blong hem oli kam pas wanwan long profet, be profet i talem se, “No, Hae God i no jusum wan long olgeta ya.”
11Nao profet i askem long hem se, “?Yu gat sam moa pikinini blong yu i stap yet?”
Mo hem i talem se, “Yes, lasbon long olgeta i stap yet, be i stap lukaot long ol sipsip.”
Nao profet i talem se, “Yu sanem wan man i go tekem hem i kam. Bambae yumi no save statem sakrefaes gogo hem i kamtru.”
12Nao Jese i sanem wan man i go tekem hem i kam.
Boe ya i naes, bodi blong hem i strong mo fes blong hem i saen. Nem blong hem Deved, mo Hae God i talem long profet se, “!Hemia nao! !Yu girap, yu makemaot hem se bambae i kam king!”
13Nao profet i tekem olifoel, i kafsaedem i go long hed blong hem blong makemaot hem. Hem i mekem samting ya long fes blong ol brata ya blong hem, mo wantaem nomo, Spirit blong Hae God i kam long Deved, i holem hem, mo i stat long dei ya, Spirit ya i stap oltaem long hem. Nao biaen, Profet Samuel i aot, i gohom long Rama.
Deved i stap wok blong King Sol14Nao Spirit blong Hae God i gowe long King Sol, mo Hae God i sanem wan rabis devel i kam blong mekem king ya i stap harem nogud.
15Nao ol man blong wok blong king oli talem long hem se, “!King, yu luk! God i sanem wan rabis devel i kam blong mekem yu yu harem nogud.
16Sipos yu wantem, bambae mifala i save go lukaot wan man we i save plei gud long gita. Nao sipos devel ya i kambak long yu, man ya bambae i save plei long gita blong hem, nao bambae yu harem gud bakegen.”
17Nao hem i talem long olgeta se, “I gud. Yufala i go lukaot wan man olsem we i save plei gud, yufala i tekem hem i kam luk mi.”
18Nao wan long olgeta ya i talem se, “I gat wan pikinini blong man Betlehem ya Jese, we hem i save plei gud tumas. Yang boe ya, hem i wan gudfala soldia we i no save fraet. Fes blong hem i naes, mo hem i save toktok gud tu, mo Hae God i stap wetem hem.”
19Nao king i sanem sam man blong hem oli go luk Jese, oli talem long hem se, “Pikinini ya blong yu Deved we i stap lukaot long ol sipsip, yu sanem hem i go luk king.”
20Nao Jese i tekem wan smol nani, wetem sam bred,* mo wan botel waen we botel ya oli wokem long skin blong nani,* mo i putum ol samting ya long wan dongki, nao i sanem Deved blong i tekem ol samting ya i go luk king.
21Nao Deved i stap wetem king, mo i stap wok blong hem. Mo taem king i luk hem, hem i laekem hem tumas, mo i mekem hem i kam man blong karem ol samting blong faet blong hem.
22Mo biaen, hem i sanem tok i go long Jese, i talem se, “Mi mi laekem pikinini ya blong yu tumas. Plis yu letem hem i stap wok blong mi oltaem.”
23Nao i stat long taem ya, oltaem, taem we devel ya i kasem king, ale, Deved i tekem gita blong hem, i plei, nao devel ya i aot long king mo king i harem gud bakegen.
Who We AreWhat We EelieveWhat We Do
2025 by iamachristian.org,Inc All rights reserved.
