Neham 1 - Bislama Bible Revised 2012

Fastok

1 Aes 10.5-34; 14.24-27; Sef 2.13-15 Ol tok we i stap long buk ya, Hae God i soemaot long Profet Neham long wan vison*, blong tokbaot bigfala taon ya Nineve. Profet ya, hem i wan man Elkos.

Hae God i kros tumas long ol man Nineve

2Nao Profet Neham i talem se, “Hae God i no wantem nating blong man i biaen long hem, mo i biaen long narafala god long semtaem. Hem i kros we i kros, mo bambae i givim panis long olgeta we oli stap agens long hem.

3Hem i no save kros kwik, be hem i gat paoa. Mo hem i no save letem olgeta we oli mekem nogud oli stap nomo olsem, hem i mas givim panis long olgeta.

“Oltaem, long evri ples we hem i stap pas long hem, i gat waelwin mo hariken i go wetem hem. Taem hem i purumbut long graon, smok blong graon i kavremap olgeta ples olsem bigfala klaod.

4Taem hem i tok long solwota, solwota ya i drae wantaem nomo. Hem i blokem ol bigfala reva, nao oli no moa ron. Hem i mekem ol gudfala ples long Basan oli drae, mo hem i mekem ol tri long bigfala hil ya Kamel oli drae. Ol gudgudfala flaoa long Lebanon, hem i mekem olgeta oli drae evriwan.

5Taem we hem i kamtru, ol bigbigfala hil oli seksek long fes blong hem, mo ol smosmol hil oli kam sofsof oli stap ronaot. Graon i seksek bigwan, mo wol ya wetem ol man we oli stap long hem, olgeta evriwan oli fraet, oli seksek.

6?Sipos Hae God i kros tumas, hu i naf long hem? ?Sipos hem i kros we i kros olsem, hu bambae i save stap laef? Taem hem i kros, kros blong hem i kamaot olsem faea we i laet. Ol bigbigfala ston oli brobrok, oli kam olsem asis nomo long fes blong hem.

7“Hae God i gud tumas. Taem ol man blong hem oli stap long trabol, hem i save lukaot gud long olgeta. Hem i sefples blong olgeta we oli putum tingting blong olgeta i stap strong long hem.

8Be ol enemi blong hem, hem bambae i spolemgud olgeta long reva we i ron bigwan, i kavremap evri ples. Mo olgeta we oli stap agens long hem, hem bambae i kilim olgeta evriwan i ded.

9“Ol man Nineve. ?Wanem plan ya we yufala i stap mekem agens long Hae God? Hem bambae i spolemgud yufala. I no gat man we i save agensem Hae God tu taem.

10!Yufala i man blong drong! Hem bambae i bonem yufala evriwan, nao yufala i lus olgeta, olsem grasnil mo drae gras we faea i kakae.

11I gat wan man i kamaot long yufala wetem ol rabis plan blong hem, mo hem i stap mekem plan agens long Hae God.”

12Nao profet i talem long ol laen* blong Isrel* se, “Olgeta. Yumi man blong Hae God, mo hem i toktok long yumi i talem se, ‘Ol man blong mi. I nating we ol man Asiria ya oli plante tumas, mo oli strong moa winim yufala, be mi bambae mi spolemgud olgeta, we bambae i no gat wan i stap. Fastaem mi mi bin mekem yufala i harem nogud, be naoia, bambae mi no moa save mekem olsem bakegen.

13Paoa blong ol man Asiria ya we i stap holemtaet yufala, mi bambae mi spolem, mo ol jen ya we oli fasemtaet yufala long hem, mi bambae mi brebrekem, mi mekem yufala i gofri.’ ”

14Nao profet ya i talemaot we Hae God i tok agens long ol man Asiria, i talem se, “Ol man Asiria. Bambae yufala i no gat ol pikinini blong yufala blong holem nem blong yufala. Ol aedol ya we oli stap long ol haos blong ol god blong yufala, mi bambae mi spolem olgeta evriwan. Mi mi digimrere ol hol blong yufala finis, blong berem yufala long hem. I no stret nating blong yufala i stap laef.”

15 Aes 52.7 Nao profet i gohed i talem se, “Ol man Juda*. !Yufala i luk! I gat wan man blong karem tok, hem i aot long ol hil i stap kam. !Hem i stap kam wetem gudfala nius! Hem i stap kam blong talemaot we God i winim ol enemi blong yumi finis, mo yumi gat pis. I gud yumi gohed, yumi mekem ol lafet blong yumi, mo yumi givim ol presen ya we yumi bin promes* long God blong givim long hem. Neva bambae ol man nogud oli save kam insaed long graon blong yumi bakegen, blong spolem yumi. Hem i spolem olgeta evriwan finis we i no moa gat wan i stap.”