Namba 21 - Bislama Bible Revised 2012

Olgeta oli winim ol man Kenan, we oli kam mekem faet long olgeta

1 i go long yu.”

3Nao Hae God i harem olgeta, mo i givhan long olgeta blong oli winim ol man Kenan ya. Nao olgeta oli kilim ol man Kenan ya mo oli bonem ol taon blong olgeta we oli bon olgeta, nao oli putum nem blong ples ya se Homa, we i min se “Oli spolemgud olgeta samting”.

Moses i wokem wan snek long bras

4 , blong oli pasraon long kantri ya Edom. Be taem oli stap wokbaot, oli stap harem nogud, nao oli girap,

51 Kor 10.9oli stap tok agens long Hae God mo agens long Moses tu. Oli talem se, “?From wanem yu tekemaot mifala long Ijip blong mifala i kam ded long draeples ya? !Ples ya i no gat wota long hem, mo i no gat kakae tu. Mo mifala i taedgud long rabis kakae ya, mifala i no glad long hem nating.”

6Nao Hae God i sanem ol posen snek i kam long olgeta, mo ol snek ya oli kakae plante long olgeta oli ded.

7Nao olgeta oli kam luk Moses, oli talemaot long hem se, “Moses. Mifala i mekem i nogud ya we mifala i stap tok agens long Hae God mo agens long yu tu. Plis yu prea long hem blong i tekemaot ol snek ya i gowe long mifala.” Mo Moses i prea from olgeta.

8Nao Hae God i talem long hem blong i tekem bras, i wokem wan pija blong snek long hem, i putum long wan pos, mo i stanemap, nao sipos snek i kakae wan man, man ya i save luk long pija ya blong snek, nao bambae i kam gud bakegen.

92 King 18.4; Jon 3.14Nao Moses i tekem bras, i wokem wan pija blong snek long hem, nao i putum long wan pos, i stanemap. Mo ol man we snek i kakae olgeta, oli stap luk long pija ya, nao oli kam gud bakegen.

Olgeta oli aot long hil ya Horo, oli go long bigfala levelples long kantri ya Moab

10Nao olgeta oli aot long ples ya, oli go mekem ples blong olgeta long Obot.

11Mo biaen, oli aot long ples ya bakegen, oli go mekem ples blong olgeta long draeples, klosap long olfala taon ya Abarim, we i kam nogud finis. Ples ya i stap narasaed long graon blong ol man Moab, saed i go long is.

12Nao oli girap, oli go mekem ples blong olgeta bakegen long bigfala levelples ya Sered, long medel blong ol hil.

13Biaen, olgeta oli aot long ples ya bakegen, oli go mekem ples blong olgeta long narasaed Anon Reva saed i go long not, long haf blong bigfala draeples ya we i go kasem graon blong ol laen* blong Amoro.* Anon Reva ya, hem i mak blong graon blong ol man Moab mo ol laen blong Amoro, we graon blong ol man Moab i stap saed i kam, mo graon blong ol laen blong Amoro i stap saed i go.

14Taswe buk ya we nem blong hem Ol Stori blong ol Faet we Hae God i Mekem, hem i tokbaot ol ples ya se, “…vilej ya Waheb long ples ya Sufa, mo ol bigbigfala levelples long medel blong ol hil, mo Anon Reva,

15mo ol bigfala levelples ya long saed blong vilej ya Ara, mo long saed blong kantri ya Moab.”

16Nao biaen oli aot long ples ya bakegen, oli go long wan ples ya we nem blong hem Behere, we i min se “Wel we i gat fulap wota long hem”. Nao long ples ya, Hae God i talem long Moses se, “Yu singaot olgeta man i kam wanples, nao bambae mi mi givim wota long olgeta.”

17Nao ol man ya oli sing long wan singsing we i talem se,

“!Wel!

!Yu mas givim wota long mifala!

Sipos yu givim,

bambae mifala i glad tumas,

mifala i singsing.

18Wel ya,

ol pikinini blong king oli digim

long ol wokingstik blong king,

mo ol lida oli digim

long ol wokingstik blong olgeta.”

Nao biaen oli aot long draeples ya bakegen, oli go long Matana.

19Nao oli aot long ples ya bakegen, oli go long Nahaliel, mo biaen, oli aot long Nahaliel, oli go long Bamot.

20Nao oli aot long Bamot bakegen, oli go long bigfala levelples ya long kantri blong ol man Moab, we i klosap long hil ya Pisga. Long top blong hil ya, man i save lukluk i godaon long draeples.

Olgeta oli winim King Sihon mo King Og(Dutronome 2.26—3.11)

21Nao olgeta ya oli sanem sam man blong oli go luk King Sihon, we i king blong ol laen* blong Amoro,* blong oli askem long hem se,

22“Plis yu letem mifala i pastru long kantri ya blong yu. Mifala wetem ol anamol blong mifala, bambae mifala i no save go olbaot. Mifala i no save go insaed long ol garen blong yufala mo long ol plantesen blong yufala, mo mifala i no save dring wota long ol wel blong yufala tu. Bambae mifala i stap folem bigrod ya nomo, gogo kasem we mifala i goaot long kantri blong yu bakegen.”

23Be hem i no save letem olgeta oli pastru long kantri blong hem. Hem i singaot ol soldia blong hem oli kam wanples, nao oli wokbaot i kam long ples ya Jahaj long draeples, mo oli mekem faet long olgeta.

24Be olgeta ya oli kilim plante soldia blong hem oli ded, mo oli holem ol graon blong olgeta, i stat long Anon Reva, i go kasem Jabok Reva long not we i mak blong graon blong ol man Amon saed i kam. Be oli no save go moa long saed ya, from we ol man Amon oli strong tumas, oli blokem olgeta.

25-26Ol laen blong Isrel* ya oli holem olgeta taon blong ol laen blong Amoro, wetem bigfala taon ya Hesbon we i kaptel blong olgeta, we King Sihon i stap long hem, mo ol vilej we oli stap raonabaot long ol taon ya, nao oli go stap long olgeta. Fastaem, taon ya i blong king blong ol man Moab, be bifo finis, King Sihon i go mekem faet long hem, mo i holem taon ya wetem olgeta graon blong king ya i go kasem Anon Reva.

27Taswe ol man blong mekem singsing oli stap sing long wan sing we i talem se,

“!Yufala i kam long taon ya Hesbon

we fastaem i hedkwota blong King Sihon!

Bambae yumi bildim taon ya bakegen,

yumi wokem i kam gud olsem fastaem.

28 Jer 48.45,46 Bifo,

ol soldia blong king ya

oli kamaot long taon ya

olsem faea we i bon strong,

i kakae evri samting.

Oli spolem taon ya Ara

long Moab,

mo oli spolem tu ol man blong ol hil ya

long Anon Reva antap.

29!Ol man Moab,

sore tumas long yufala!

Yufala i stap mekem wosip

long god ya Kemos,

be olgeta ya oli kam spolemgud yufala.

God ya blong yufala

i letem ol laen blong Amoro

oli kam ronemaot ol man blong yufala

oli ronronwe i go long ol narafala ples.

Mo i letem king ya blong olgeta

i holem ol woman blong yufala

oli kam slef* blong hem.

30Be naoia,

ol man we oli kamaot biaen long olgeta,

mifala i spolemgud olgeta.

Long olgeta ples ya,

i stat long taon ya Hesbon,

i go kasem taon ya Dibon,

mo i stat long taon ya Nasim,

i go kasem taon ya Nofa,

klosap long taon ya Medebaha,

be olgeta ya oli lus evriwan finis.”

31Long fasin ya nao, ol laen blong Isrel oli holem kantri ya Amoro, nao oli stap olwe long ples ya.

32Nao Moses i sanem ol man blong hem blong oli go lukaot wan gudfala rod blong go mekem faet long ol man blong taon ya Jasere. Mo biaen, olgeta oli go ronemaot ol laen blong Amoro we oli stap long taon ya, mo oli holem taon ya wetem ol vilej we oli stap raonabaot long hem.

33Nao oli tanemraon, oli folem rod ya we i blong go long kantri ya Basan. Nao King Og we i king blong Basan, hem wetem ol man blong hem oli kam mekem faet long olgeta ya long taon ya Edrei.

34Nao Hae God i talem long Moses se, “Moses. Yu no fraet long king ya. Mi bambae mi givhan long yufala, nao bambae yufala i winim hem wetem ol man blong hem, mo bambae mi givim kantri ya blong hem i go long yufala. Bambae yufala i mas mekem long hem olsem we yufala i mekem long King Sihon, king ya blong ol laen blong Amoro, we hedkwota blong hem long Hesbon.”

35Nao oli kilim king ya wetem ol pikinini blong hem, mo olgeta man blong hem, gogo i no gat wan man nating i stap. Nao oli holem kantri ya blong hem i blong olgeta.