Sing Blong Solomon 7 - Bislama Bible Revised 2012

1Nao man ya i talem se,

“!Daling,

yu yu naes we yu naes!

Taem yu putum sandel,

tufala leg blong yu i naes tumas.

Mo leg blong yu antap, tufala i saes gud,

olsem we man we i gat gudhan i wokem tufala.

2I gat wan dis i stap we neva i emti samtaem,

oltaem i fulap gud long waen we i beswan.

Mo i gat bandel wit* i stap,

we ol flaoa ya lili oli stap raon long hem blong flasem.

3Tufala titi blong yu i naes tumas.

Tufala i olsem tu anamol ya dia*

we tufala i twin,

tufala i naes olsem tu anamol ya gasel.*

4Nek blong yu i naes tumas,

mo i smut olsem wajhaos*

we oli flasem long tut blong elefen.

Ae blong yu i saen olsem wota long wel,

klosap long doa* blong bigfala stonwol

long taon ya Hesbon.

Nus blong yu i naes we i naes.

Taem mi luk,

mi stap tingbaot gudfala wajhaos ya long Lebanon,

we i stap lukluk i kam long Damaskes.

5Hed blong yu i no save hang,

oltaem i stap stanap stret nomo.

Taem mi luk,

mi stap tingbaot bigfala hil ya Kamel.

Mo hea blong yu i naes tumas.

Taem yu tantanem wetem ol flas samting,

hem i stap saen olsem silik we i saen gud.

Nating we mi mi king,

be i save mekem mi mi stap kwaet,

olsem man we i stap long kalabus.

6“Yu yu naes we yu naes.

Ol fasin ya we yu stap mekem long

mi we yumitu stap wanples

oli stap mekem mi mi harem gud tumas.

7Yu yu olsem wan naes pamtri*

we i longfala,

mo tufala titi blong yu

i olsem tu gudfala bandel frut ya det.*

8Bambae mi klaem long pamtri ya,

mi tekem frut blong hem.

Long mi,

tufala titi blong yu i naes

olsem tu bandel frut ya grep we i swit.

Mo maot blong yu,

mi harem smel blong hem i gud tumas

olsem apol,*

9mo kis blong yu i swit,

i olsem waen we i beswan olgeta.”

Nao woman ya i talem se,

“Ale, daling,

mi wantem waen ya i ron i go stret long yu,

i wasem maot blong yu mo tut blong yu.

10Mi mi woman blong yu,

mo yu yu wantem mi tumas.

11Yu kam,

yumitu ronwe long taon ya.

Long naet,

bambae yumitufala i go stap long wan vilej longwe.

12Nao bambae yumitufala i girap long eli moning,

yumitu go luk ol rop ya grep,

se oli stat gru finis no no yet.

Bambae yumitu go luk ol grep ya wetem ol grenadin

se oli karem flaoa finis no no yet.

Long ples ya nao,

bambae mi soemaot long yu

we mi mi laekem yu tumas.

13Bambae yu save harem

gudfala smel blong ol frut ya mandrek*

mo blong ol gudgudfala frut ya tu

we oli stap klosap long doa blong yumitu.

Daling,

ol gudgudfala fasin ya

we yumitufala i save harem gud long hem,

ol olfala fasin wetem ol niuwan,

mi mi stap holemtaet olgeta se oli blong yu nomo.