Eksodas 24 - Bislama Bible Revised 2012

Hae God i mekem promes blong hem i stanap

1Nao Hae God i talem long Moses se, “Moses. Yu go tekem Eron wetem Nadab mo Abihu mo seventi narafala lida blong yufala, yufala i kam luk mi antap long hil ya. Mo taem yufala i kam we yufala i stap longwe yet, bambae yufala i mas bodaon long mi blong mekem wosip long mi.

2Be bambae yu wan nomo yu save kam klosap long mi. Ol narafala lida ya bambae oli no save kam klosap, oli mas stap longwe, mo ol narafala man bambae oli no save kam antap long hil ya nating.”

3Nao Moses i godaon, i stanap long fes blong ol man, i talemaot olgeta tok ya we Hae God i talem long hem, wetem olgeta rul ya tu, mo olgeta man ya evriwan oli tok wantaem, oli talem se, “Bambae mifala i mekem evri samting we hem i talem.”

4Nao Moses i raetemdaon olgeta tok ya we Hae God i talem long hem.

Nao long nekis dei, long eli moning, Moses i wokem wan olta long stamba blong bigfala hil ya, mo i tekem twelef bigfala ston, i stanemap olgeta blong makem ol twelef laen* blong Isrel.*

5Nao hem i talem long sam yang man, blong oli kilim sam yang bul blong mekem sakrefaes long Hae God, we sam, oli bonem i bon evriwan blong mekem wosip, mo sam, oli bonem haf, ol man oli kakae haf blong soemaot we oli stap fren gud wetem Hae God.

6Nao hem i tekem blad blong ol bul ya, i putum haf i go long ol besin, mo narafala haf i kafsaedem i go long saed blong olta ya.

7Nao hem i tekem buk* ya blong promes* blong Hae God we hem i raetemdaon finis ol tok ya we Hae God i talem, mo i ridimaot ol tok ya long ol man. Mo olgeta oli talem se, “Bambae mifala i obei long Hae God, mifala i mekem evri samting we hem i talem.”

8 Mat 26.28; Mak 14.24; Luk 22.20; 1 Kor 11.25; Hib 10.29; Hib 9.19,20 Nao hem i tekem blad ya we i stap long besin, i saksakem i go long ol man, mo i talem long olgeta se, “Promes ya we Hae God i mekem wetem yumi taem hem i givim ol tok ya long yumi, blad ya nao i mekem i stanap.”

9Nao hem wetem Eron, mo Nadab, mo Abihu mo ol seventi lida ya oli go antap long hil ya,

10nao oli luk Hae God ya we i God blong olgeta. Long ples ya we hem i stap stanap, oli luk olsem we i gat wan flat ples blong wokbaot we oli wokem long gudfala ston ya safaea,* we kala blong hem i blu olsem skae.

11Be Hae God i no spolem olgeta. Olgeta oli luk hem stret long ae blong olgeta, mo biaen oli stap kakae wanples.

Hae God i singaot Moses blong i go antap long hil ya Sinae bakegen

12Nao Hae God i talem long Moses se, “Yu kam antap long hil ya, yu kam luk mi. Mo taem yu stap long ples ya, bambae mi givim tu flat ston long yu, we mi raetemdaon Tenkomanmen i go long tufala finis, blong yu save tijim ol man long hem.”

13-14Nao Moses wetem Josua, man ya blong givhan long hem, tufala i mekemrere blong go antap long tabu hil* ya. Nao Moses i talem long ol lida ya se, “Yufala i stap long ples ya, gogo kasem we bambae mitufala i kambak. Eron mo Huru, tufala i stap wetem yufala. Mo sipos sam long yufala i gat rao, oli save go luk tufala blong tufala i stretem.” Nao tufala i aot blong go antap long hil ya.

15Nao taem tufala i stap go antap, wan bigfala klaod i kam kavremap hil ya.

16-17Mo bigfala laet ya we i saen we i saen, we i soemaot we Hae God i stap, hem i kamdaon, i stap laet long ples ya, i stap saenaot strong long top blong hil ya. Nao olgeta daon oli luk olsem we bigfala faea i laet long ples ya. Nao klaod ya we Hae God i stap insaed long hem i stap kavremap hil ya sikis dei, nao long namba seven dei, Hae God i singaot long Moses blong i kam.

18Dut 9.9Nao Moses i go antap moa long hil ya, i go insaed long klaod ya, mo i stap foti dei mo foti naet long ples ya.