1Nao ol man Jerusalem* oli tekem Ahasia we i lasbon pikinini blong King Jehoram, oli putumap hem i tekem ples blong papa blong hem i kam king, from we ol man Arab ya we oli kam mekem faet long ples ya oli kilim olgeta pikinini blong king ya oli ded, Ahasia ya nomo i stap.
2-3Long taem ya, hem i gat twanti tu yia, mo hem i rul wan yia nomo long kantri ya, mo hedkwota blong hem i stap long taon ya Jerusalem. Oltaem, mama blong hem, Kwin Atalia i stap pusum hem blong i mekem ol rabis fasin, from we woman ya i dota blong King Ehab blong Isrel,* we papa blong hem King Omri bifo. Mo King Ehab ya wetem ol pikinini blong hem oli bin mekem ol rabis fasin, nao woman ya i stap pusum pikinini blong hem blong i mekem olsem.
4Hem i stap mekem sin agens long Hae God from we taem papa blong hem i ded, ol narafala man long famle blong King Ehab oli stap givim tingting long hem, nao oli stap lidim hem i gorong olgeta.
5Nao from we hem i stap folem ol tok blong olgeta, hem i go joen wetem King Joram blong Isrel, mo tufala i go mekem faet long King Hasael blong Siria. Olgeta oli mekem faet long Gilead, klosap long taon ya Ramot, mo long faet ya, King Joram i karekil.
6Nao hem i tanemraon, i gobak long taon ya Jisrehel, blong stap long ples ya fastaem blong kam oraet bakegen, mo King Ahasia i kam long ples ya blong visitim hem.
7Nao long taem ya we King Ahasia i kam blong visitim King Joram, Hae God i mekem hem i kasem trabol. I gat wan man i stap, we nem blong hem Jehu, we papa blong hem Nimsi, mo Hae God i bin jusumaot hem blong i kilim olgeta ya we oli stap kamaot biaen long King Ehab oli ded. Nao long taem ya we tufala king ya i stap long ples ya, man ya i kam blong kilim tufala.
8Mo long taem ya we hem i stap kilim ol laen blong King Ehab oli ded, olsem we Hae God i talem, hem i faenem wan grup blong ol lida blong Juda* wetem ol pikinini blong ol brata blong King Ahasia we oli kam wetem hem long visit ya, nao man ya i kilim olgeta ya evriwan i ded.
9Nao ol man blong hem oli stap lukaot King Ahasia gogo oli faenem hem i stap haed long Sameria,* nao oli holem hem, oli tekem hem i kam long Jehu, mo oli kilim hem i ded. Be oli berem hem long gudfala fasin, from we oli stap ona long bubu ya blong hem King Jehosafat, we i stap traehad tumas oltaem blong mekem olsem we Hae God i wantem. Nao i no moa gat wan famle blong King Ahasia, no wan pikinini blong hem i stap we i save tekem ples blong hem i kam king.
10Nao taem Kwin Atalia i luk we pikinini ya blong hem i ded, hem i talem long ol soldia blong hem blong oli go holem ol smol bubu blong hem, wetem ol narafala laen* blong ol king blong Juda, oli kilim olgeta evriwan oli ded, mo olgeta oli go mekem olsem.
11Be king ya i gat wan sista blong hem we nem blong hem Jehoseba, we i bon long narafala mama. Woman ya i mared long wan pris, nem blong hem Jehoeada, nao long taem we klosap ol soldia ya oli kamtru, hem i go long haos we ol pikinini blong king ya oli stap long hem, i tekemaot wan long olgeta we nem blong hem Joas, wetem woman we i stap givim titi long hem, i go haedem tufala long ples blong ol pris long haos* blong Hae God, blong kwin ya i no kilim hem. Mo long fasin ya, hem i sevem pikinini ya i stap laef.
12Nao kwin ya i stap rul long Juda, mo Joas i stap haed olsem long haos ya gogo kasem sikis yia.
Who We AreWhat We EelieveWhat We Do
2025 by iamachristian.org,Inc All rights reserved.
