Prija 11 - Bislama Bible Revised 2012

Ol samting we waes man i wokem

1“I gud yu stap mekem bisnes wetem ol narafala kantri. Sipos yu mekem olsem, bambae yu save win gud long bisnes blong yu.

2Mo i nogud yu putum mane blong yu long ol bisnes long tri fo ples nomo, i moa gud yu putum long plante ples, from we yu no save wanem trabol bambae i kamtru long wol ya.

3“Nating we bigfala tri i foldaon i go long not no i go long saot, be ples we hem i foldaon i go long hem, ples ya nao bambae i mas stap long hem. Taem wota i fulap long klaod, bambae ren i mas kam.

4Sipos yu stap luk long win blong makem stret taem blong planem garen blong yu, neva bambae yu save planem, mo sipos yu stap luk long klaod blong makem stret taem blong tekemaot kakae blong hem, neva bambae yu save tekem kakae i kam.

5God i stap wokem olgeta samting, be i had blong yumi makem fasin blong hem. Yumi no save makem se laef blong pikinini we i stap gru long bel blong mama blong hem i stat olsem wanem, mo long sem fasin, yumi no save makem ol fasin we God i stap mekem.

6Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.

7“Delaet i wan gudfala samting, mo oltaem yumi glad tumas blong harem gud long hem.

8Mo evri yia, i stret blong yumi stap harem gud long laef ya we yumi stap long hem, from we nating we laef ya blong yumi i longfala olsem wanem, be sipos yumi ded, taem ya we bambae yumi stap long tudak bambae i longfala moa. Olgeta samting we oli stap kam long yumi oli blong nating nomo.

Tok blong givhan long ol yang man

9“Ol yangfala, naoia we yufala i yangfala yet, i gud yufala i stap mekem ol fasin we yufala i save harem gud long hem. I gud yufala i folem wanem we tingting blong yufala i wantem, mo yufala i wokem wanem samting we yufala i wantem wokem. Be yufala i mas tingbaot tu we bambae God i jajem yufala from ol samting ya we yufala i mekem.

10“I nogud yufala i letem wan samting i mekem yufala i tingting tumas, no i mekem yufala i harem nogud long bodi blong yufala. Bambae yufala i no save stap yangfala olsem oltaem.