Esta 9 - Bislama Bible Revised 2012

Ol laen blong Isrel oli faet oli winim ol enemi blong olgeta

1Nao dei ya we Haman i putum, i kamtru. Fastaem, hem i talemaot long nem blong king, se long yia ya nomo, long namba twelef manis we nem blong hem Adara,* long namba totin dei blong hem, ol enemi blong ol laen* blong Isrel* bambae oli gat janis blong kilim olgeta oli ded. Be taem dei ya i kamtru, ol samting ya i jenis bigwan, nao ol laen blong Isrel oli kilim olgeta, oli winim olgeta.

2Long evri taon we ol laen blong Isrel oli stap long hem, long olgeta kantri we king ya i stap rul long hem, olgeta oli mekemrere finis blong faet agens long ol man ya we oli wantem kilim olgeta. Be long evri ples, ol man oli fraet long olgeta, nao i no gat man we i naf blong go mekem faet long olgeta.

3Long olgeta provins, ol haeman blong gavman we hemia ol distrikejen,* mo ol minista, mo ol man blong king, olgeta evriwan oli stap givhan long ol laen blong Isrel, from we oli fraet long Modekae.

4Long evri ples we king i stap rul long hem, olgeta man oli save se naoia, king i putumap Modekae i kam wan haeman, mo oltaem, nem blong hem i stap kam antap moa.

5Nao from samting ya, ol laen blong Isrel oli save mekem olsem we oli wantem long ol enemi ya blong olgeta. Nao oli tekem ol naef blong faet blong olgeta, oli go kilim ol man ya oli ded.

6Nao long bigfala taon ya Susa, we hedkwota blong king i stap long hem, ol laen blong Isrel oli kilim faef handred man oli ded.

7-10Mo ol ten pikinini boe blong Haman, enemi ya blong olgeta, oli ded long taem ya. Nem blong olgeta, Pasandata, mo Dalfon, mo Aspata, mo Porata, mo Adalia, mo Aridata, mo Pamastaha, mo Arisae, mo Aridae mo Vaesata. Oli kilim ol ten man ya oli ded, be oli no karem olting blong olgeta.

11Nao long sem dei ya, king i harem ripot blong namba blong ol man ya we oli ded long taon ya.

12Nao hem i talem long kwin se, “Esta. Long taon ya nomo, ol man ples blong yu oli kilim faef handred man oli ded, we ten long olgeta, ol ten pikinini ya blong Haman. Mo olbaot long ol provins, ating namba blong olgeta bambae i go moa, yumi no save. !Be nating! ?Tingting blong yu i olsem wanem? Sipos yu wantem wan samting moa, yu save talem. Wanem samting we yu askem bambae yu save kasem.”

13Nao kwin i talem se, “King. Sipos yu glad blong mekem olsem, plis yu letem olgeta ya oli mekem sem samting bakegen tumora long taon ya, olsem we oli mekem tede. Mo yu talem long ol man blong yu, blong oli hangem ol dedbodi blong ol ten pikinini ya blong Haman long ples blong hangem man.”

14Nao king i talemaot wan narafala tok blong hem long taon ya blong oli mekem olsem we kwin i talem. Mo ol man blong hem oli go hangem dedbodi blong ol ten pikinini ya blong Haman, blong ol man oli save luk.

15Nao long namba fotin dei blong manis ya Adara, ol laen blong Isrel we oli stap long taon ya oli hivap wanples, nao oli kilim tri handred man bakegen long taon ya oli ded. Be bakegen, oli no karem olting blong olgeta.

16Nao ol laen blong Isrel we oli stap olbaot long olgeta provins we king i stap rul long hem, olgeta tu oli mekemrere blong faet blong blokem ol man we oli wantem kam kilim olgeta. Oli kilim ol enemi ya blong olgeta we oli finisimgud olgeta, nao seventi faef taosen man oli ded. Be bakegen, oli no karem olting blong olgeta.

17Hemia long namba totin dei blong manis ya Adara. Be long nekis dei, long namba fotin, oli no moa kilim ol man. Long dei ya, olgeta oli stap mekem lafet we oli glad we oli glad.

18Be ol laen blong Isrel we oli stap long Susa oli holede long namba fiftin, from we long namba totin mo namba fotin, oli stap mekem faet, nao long namba fiftin, oli jes mekem lafet.

19Nao from samting ya, evri yia, ol laen blong Isrel we oli stap long ol vilej oli stap holem namba fotin dei blong manis ya se hem i dei we oli stap holede long hem we oli glad we oli glad. Evri famle oli stap mekem kakae, mo oli stap givgivim kakae long ol fren blong olgeta.

Lafet blong Purim

20Nao Modekae i raetemdaon stori blong ol samting ya, mo i raetem ol leta, i sanem i go long olgeta laen* blong Isrel* we oli stap olbaot long olgeta kantri we King Sekses i stap rul long hem,

21blong talemaot long olgeta, se bambae evri yia oli mas holede long tufala dei ya, namba fotin mo namba fiftin blong manis ya Adara.*

22Hemia tufala dei ya we ol laen blong Isrel oli kilim ol enemi blong olgeta, we oli flatemgud olgeta. Fastaem, tingting blong olgeta i foldaon olgeta, from we oli ting se long manis ya bambae oli sore tumas oli stap krae, be biaen, hem i kam wan taem we oli glad we oli glad. Modekae i talem long olgeta, se bambae oli mas glad long tufala dei ya, mo ol famle blong olgeta bambae oli mas mekem kakae, mo bambae oli mas givim kakae i go long ol fren blong olgeta, mo long ol puaman tu.

23Nao ol laen blong Isrel oli folem tok ya we Modekae i talem, mo oli mekem i kam wan kastom blong olgeta, we evri yia, oli stap mekem lafet long tufala dei ya.

24Haman ya, we i enemi blong ol laen blong Isrel, hem i pikinini blong Hamedata, we i kamaot biaen long Agag. Hem i bin sakem ol spesel ston,* we long lanwis blong olgeta oli kolem purim, blong faenemaot se long wanem dei nao bambae oli kilim ol laen blong Isrel oli ded. Hem i mekem wan plan blong finisimgud olgeta, we bambae i no gat wan i stap.

25Be Kwin Esta i go luk king from samting ya, nao king i mekem wan narafala tok we oli go talemaot long nem blong hem, nao plan ya blong Haman blong kilim olgeta laen blong Isrel evriwan oli ded i kakae hem bakegen, nao hem i ded from plan ya blong hem. Mo oli hangem hem mo ol pikinini blong hem long ples blong hangem man.

26Nao from samting ya, ol laen blong Isrel oli putum nem blong lafet ya, se “Lafet* blong Purim”, we hemia tok blong ol man Pesia bifo blong talem ol spesel ston ya. Nao from leta ya blong Modekae, mo from ol samting we i hapen long olgeta,

27oli mekem wan rul bakegen we i blong olgeta, mo blong olgeta we bambae oli kamaot biaen long olgeta, mo ol narafala man we bambae oli wantem kam laen blong Isrel, se bambae oli mas holem tufala dei ya evri yia, long stret taem blong hem, olsem we Modekae i talem long leta ya blong hem.

28Mo olgeta man oli agri se ol pikinini blong olgeta we bambae oli stap kamaot biaen long olgeta, bambae oli mas tingbaot tufala dei ya blong Purim oltaem, nao long evri provins mo long evri taon, bambae oli mas holem lafet ya evri yia, gogo i no save finis.

29Nao Kwin Esta wetem Modekae, tufala i raetem wan leta bakegen blong soemaot we kwin i agri fulwan long leta ya we Modekae i raetem fastaem long saed blong Lafet ya blong Purim.

30Tufala i sanem leta ya i go long olgeta laen blong Isrel we oli stap olbaot long wan handred twanti seven provins we king blong Pesia i stap rul long hem. Leta ya i talemaot we tufala i wantem we ol laen blong Isrel bambae oli stap gud, oli gat pis.

31Mo i talem long olgeta, se olgeta wetem olgeta we bambae oli kamaot biaen long olgeta, bambae oli mas holemgud tufala dei ya blong Purim long stret taem blong hem, olsem nomo we oli stap holem ol rul blong ol narafala dei ya we oli dei blong livim kakae blong olgeta, no oli dei blong harem nogud from we man i ded. Modekae mo Esta, tufala i putum rul ya.

32Nao tok ya blong Kwin Esta i mekem ol rul blong Lafet ya Purim i stanap, mo ol man oli raetemdaon long wan buk.*