Levitikas 3 - Bislama Bible Revised 2012

Ol sakrefaes we i blong soemaot we man i stap fren gud wetem Hae God

1Mo bakegen, Hae God i talem se, “Moses. Sipos wan long yufala i wantem kilim wan buluk blong mekem sakrefaes ya we i bonem haf i kakae haf blong soemaot we i stap fren gud wetem mi, hem i mas tekem wan bul no wan kao we i no gat wan samting i rong long bodi blong hem, mo i mas tekem i kam long fes blong mi.

2Nao bambae man ya i mas putum han blong hem long hed blong anamol ya blong soemaot we sakrefaes ya i blong hem, mo i mas kilim long doa blong yad blong Haos Tapolen blong mi, mo pris i mas tekem blad blong hem, i kafsaedem i go long ol fo saed blong Olta ya blong givim i kam long mi.

3-4Nao man ya bambae i mas tekem ol gris blong gat blong anamol ya, wetem tufala kidni blong hem wetem ol gris blong tufala, mo gudfala haf blong leva blong hem daon, i givim i go long pris ya, blong i bonem blong givim i kam long mi.

5Nao pris ya i mas bonem ol samting ya long Olta, wetem narafala sakrefaes ya we i blong bonem i bon evriwan we ol pris oli mas mekem evri dei. Ol kakae ya i wan sakrefaes we i blong bonem blong givim i kam long mi, mo gudfala smel blong hem bambae i mekem mi mi glad tumas long hem.

6“Sipos wan long yufala i wantem kilim wan sipsip no wan nani blong mekem sakrefaes olsem, hem i save tekem wan anamol olsem we i man no we i woman, be anamol ya i no mas gat wan samting i rong long bodi blong hem, nao bambae hem i mas mekem sem fasin long hem.

7“Sipos hem i tekem wan sipsip i kam blong givim long mi,

8bambae hem i mas putum han blong hem long hed blong sipsip ya, nao i mas kilim long fran blong Haos Tapolen ya. Mo pris i mas tekem blad blong sipsip ya, i kafsaedem i go long ol fo saed blong Olta ya blong givim i kam long mi.

9-11Nao man ya bambae i tekem ol gris blong sipsip ya wetem tel blong hem we i gat gris long hem we bambae i katemaot stret long stamba blong hem, mo olgeta gris blong gat blong hem, mo tufala kidni blong hem wetem ol gris blong tufala, mo gudfala haf blong leva blong hem daon, i givim i go long pris, mo pris ya bambae i mas bonem ol samting ya long Olta. Ol kakae ya i wan sakrefaes we i blong bonem blong givim i kam long mi.

12“Sipos man i tekem wan nani i kam blong givim long mi,

13bambae hem i mas putum han blong hem long hed blong nani ya, nao i mas kilim i ded long fran blong Haos Tapolen ya, mo pris i mas tekem blad blong hem, i kafsaedem i go long ol fo saed blong Olta ya blong givim i kam long mi.

14-16Nao man ya bambae i mas tekem olgeta gris blong gat blong nani ya, wetem tufala kidni blong hem wetem ol gris blong tufala, mo gudfala haf blong leva blong hem daon, i givim i go long pris, mo pris ya i mas bonem ol samting ya long Olta. Ol kakae ya i wan sakrefaes we i blong bonem blong givim i kam long mi, mo gudfala smel blong hem bambae i mekem mi mi glad tumas long hem.

Olgeta gris blong anamol i blong mi nomo.

17Yufala ya i laen* blong Isrel,* mo i tabu blong yufala i kakae gris mo blad blong anamol. Hemia i wan rul we bambae yufala i mas holem oltaem long weples we bambae yufala i stap long hem, gogo i no save finis.”