Malakae 2 - Bislama Bible Revised 2012

Hae God i tok strong long ol pris from ol rabis tijing blong olgeta

1Nao Profet Malakae i talemaot we Hae God we i gat olgeta paoa i talem se, “Ol pris.* Tok blong mi long yufala i olsem.

2Yufala i mas ona long mi long olgeta laef blong yufala. Sipos yufala i no harem tok blong mi, bambae mi mekem we trabol i kam kasem yufala. Bambae mi mekem we trabol i kam kasem ol gudgudfala samting we yufala i stap kasem. Tru mi talem long yufala, ol samting ya, trabol i kasem olgeta finis, from we yufala i no stap tinghevi long ol tok blong mi.

3Nao from samting ya, bambae mi tok strong long ol pikinini blong yufala blong stretem olgeta, mo bambae mi ravem fes blong yufala long ol doti blong ol anamol ya we yufala i mekem sakrefaes long olgeta. Mo bambae mi tekem yufala, mi sakem yufala i go long ples blong doti.

4Nam 3.11-13Nao taem yufala i luk samting ya, bambae yufala i save we mi mi givim tok ya long yufala, blong promes blong mi i no save foldaon. Yufala i laen* blong Livae,* mo promes* ya, mi mi mekem wetem ol bubu blong yufala bifo.

5 Nam 25.12 “Long promes ya, mi mi promes blong givim laef mo pis long olgeta. Mi mekem olsem blong oli tinghevi long mi, mo long taem ya, oli ona gud long mi, oli tinghevi long mi.

6Olgeta ya oli stap tijim ol man blong oli folem ol stret fasin nomo. Mo long taem ya, oltaem, olgeta oli stap fren gud wetem mi. Fasin blong olgeta i stret gud long fes blong mi, mo oltaem, oli stap givhan long ol narafala man blong oli lego ol rabis fasin blong olgeta.

7Mi mi Hae God, mi gat olgeta paoa, mo wok blong yufala ol pris, i blong tijim ol man blong oli savegud mi. Mo from we yufala i man blong wok blong mi, i stret nomo blong ol man oli kam long yufala blong lanem fasin blong mi long yufala.

8“Be naoia, yufala ol pris, yufala i tanem baksaed finis long stret fasin. Mo ol samting we yufala i stap tijim ol man long hem, i mekem plante man oli gorong. Mo promes ya we mi mekem wetem yufala, yufala i brekem finis.

9Nao from we yufala i mekem olsem, bambae mi letem ol man blong yufala oli lukluk rabis long yufala, from we yufala i no obei long ol samting we mi mi talem. Mo taem yufala i stap tijim ol man blong mi, be fasin blong yufala, yufala i no stap mekem i sem mak long olgeta evriwan.”

Ol laen blong Isrel oli no mas mared long ol woman blong ol narafala kantri

10Nao Profet Malakae i talem se, “Yumi evriwan i kamaot long wan papa nomo. Mo God we i mekem yumi, hem i wan nomo. ?Sipos i olsem, be from wanem yumi stap brekem ol promes ya we yumi nomo i mekem long yumi? ?Mo from wanem yumi stap lukluk rabis long promes* ya we God i mekem wetem ol bubu blong yumi bifo?

11Olgeta long Juda,* naoia oli brekem promes blong olgeta finis we oli mekem wetem God. Mo oli mekem wan fasin we i nogud we i nogud long Jerusalem,* mo long olgeta ples raonabaot long hem. Oli stap spolemgud haos* ya blong Hae God we hem i laekem tumas, long fasin ya we oli stap mared long ol woman blong ol narafala kantri we oli stap mekem wosip long ol narafala god.

12Hae God i gat olgeta paoa, mo prea blong mi we olgeta we oli mekem fasin olsem, hem bambae i tekemaot olgeta i gowe long kampani blong yumi. Mo bambae i blokem olgeta, blong oli no moa joen bakegen wetem yumi blong go givim ol presen blong yumi long hem.”

Hae God i no laekem nating fasin ya we man i mekem divos

13Mo Profet Malakae i gohed i talem se, “Narafala samting we yufala i bin mekem, i olsem. Taem yufala i luk we Hae God i no glad long ol presen we yufala i givim i go long hem, yufala i harem nogud, nao yufala i krae from. Mo yufala i krae gogo wota blong ae blong yufala i kavremapgud olta blong hem.

14Taem yufala i luk olsem, yufala i stap asaskem se, ‘?From wanem hem i no save tekem presen ya blong yumi?’ Be hem i no save tekem, from we hem i luk we yufala i no holem ol promes ya we yufala i mekem long ol woman blong yufala. Taem we yufala i yangfala, yufala i mared, mo long taem ya, yufala i promes long fes blong God, se bambae yufala i holemtaet promes ya we yufala i mekem wetem ol woman ya blong yufala. Ol woman ya, oli blong yufala olwe, be yufala i girap, yufala i brekem promes blong yufala, we yufala i mekem wetem olgeta long fes blong God.

15Be long taem ya we man i mekem promes wetem woman blong hem, God i joenem tufala i kam wan bodi nomo, mo tufala i gat wan tingting nomo. ?God i mekem olsem blong wanem? Hem i mekem olsem blong tufala i gat ol pikinini blong tufala, we bambae oli man blong God stret. Nao from samting ya, yufala i mas lukaot gud we i no gat wan long yufala, i brekem promes ya we hem i mekem wetem woman blong hem.

16Yumi ol laen* blong Isrel,* mo Hae God i God blong yumi, mo hem i talem se, ‘Mi mi no laekem nating fasin ya we man i mekem divos long woman blong hem. Mi mi no laekem nating fasin ya we man i mekem i strong tumas long woman blong hem. Nao from samting ya, bambae yufala i no mas brekem promes ya we yufala i mekem wetem ol woman blong yufala.’ ”

Dei ya we Hae God bambae i jajem olgeta man, hem i stap kam klosap

17Nao Profet Malakae i talem se, “Olgeta. Oltaem yufala i stap mekem Hae God i taed gud long ol toktok blong yufala. Be yufala i stap asaskem se, ‘?Mifala i mekem hem i taed gud olsem wanem?’ Yufala i mekem hem i taed gud long yufala long fasin ya we yufala i stap talem se, ‘Hae God i gat olgeta paoa, mo hem i luk se ol man blong mekem ol rabis fasin oli gud nomo, mo hem i laekem rabis fasin we oli stap mekem.’ Mo yufala i stap talem tu se, ‘?Wehem Hae God ya we oli stap tokbaot hem, se bambae i jajem man long stret fasin?’