1 Samuel Sotfala stori blong buk ya - Bislama Bible Revised 2012

Sotfala stori blong buk yaBuk ya, FAS BUK BLONG OL STORI BLONG PROFET SAMUEL, we sotfala nem blong hem FAS SAMUEL, hem i tokbaot taem we ol lida blong Isrel* i jenis. Ol man oli no moa wantem ol haeman oli rulum olgeta, oli wantem king. Fasin ya we gavman blong Isrel i jenis, hem i kamtru long taem blong tri man. Faswan, Profet Samuel we i wan nambawan haeman, mo i laswan long olgeta. Sekenwan, King Sol we i fas king blong Isrel. Mo namba tri, Deved, we stori blong hem i stap olbaot wetem stori blong Profet Samuel mo King Sol.Bigfala tingting blong buk ya i olsem tingting blong ol narafala buk long Oltesteman we oli tokbaot laef blong ol man blong Hae God. Sipos tingting blong man i stap strong long Hae God, bambae hem i save win long ol wok blong hem, be sipos hem i no lesin long hem, bambae hem i mas kasem trabol. Tingting ya, Hae God i mekem i klia gud long taem ya we hem i givim tok blong hem long Ilae ya we i pris.* Hem i talem se, “Man we i ona long mi, mi bambae mi ona long hem. Be man we i tingting nating long mi, mi bambae mi tingting nating long hem.” (1 Samuel 2.30.)Buk ya i soemaot se taem ol laen* blong Isrel oli putumap fas king blong olgeta, oli no gat wan tingting long fasin ya, plante oli wantem king, be sam oli no wantem. Olgeta oli stap luk long Hae God, se hem i prapa King blong olgeta, be taem oli askem long hem blong i putumap wan man i kam king blong olgeta, hem i harem olgeta. Be i klia gud we king wetem ol man blong hem, olgeta evriwan oli stap aninit long han blong Hae God. Hem i King blong olgeta yet, mo hem i stap jajem olgeta evriwan (1 Samuel 2.7-10). Mo long Loa blong hem, olgeta evriwan oli gat sem raet nomo. Nating we rijman no puaman, olgeta evriwan i sem mak nomo, mo oltaem oli mas kasem ol samting we oli gat raet long hem.Ol stori we i stap long buk yaProfet Samuel i wan haeman blong ol laen blong Isrel 1.1—7.17

Sol i kam king blong ol laen blong Isrel 8.1—10.27

Ol fas yia we King Sol i rul 11.1—15.35

Deved mo King Sol 16.1—30.31

King Sol wetem ol pikinini blong hem oli ded 31.1-13