1Nao Moses i aot long bigfala levelples ya long Moab, i go antap long hil ya Neboho, i folem gogo i kasem top blong hem antap, we hem i save lukluk i godaon long Jeriko long wes. Mo taem hem i stap long ples ya, Hae God i soem olgeta ples blong kantri ya Kenan* long hem. Hem i soem ol ples long distrik ya Gilead long saed i go long not, mo taon ya Dan* long not olgeta,
2mo ol ples blong ol laen* blong Naftali,* mo ol ples blong ol laen blong Efrem,* mo blong ol laen blong Manase,* mo ol ples blong ol laen blong Juda* long saed long wes gogo kasem Mediterenian Si,
3mo ol ples blong ol laen ya blong Juda saed i go long saot, mo bigfala levelples we i stat long taon ya Jeriko we i ples blong ol pamtri,* i go kasem taon ya Joa, long saot.
4Jen 12.7; Jen 26.3; Jen 28.13Nao Hae God i talem long hem se, “Kantri ya nao we mi mi promes* long Ebraham, mo Aesak mo Jekob* bifo, se bambae mi givim long olgeta we bambae oli kamaot biaen long trifala. Mi mi letem long yu blong yu yu lukluk nomo, be mi no save letem blong yu go long hem.”
5Nao Moses, man blong wok blong Hae God, hem i ded long ples ya Moab, stret olsem we Hae God i talem,
6mo Hae God i berem hem long wan levelples long medel blong ol hil long Moab, long wan ples we man i save lukluk i go long taon ya Betpeoro. Be kam kasem tede, i no gat man i save stret ples we beregraon blong hem i stap long hem.
7Mo long taem ya we hem i ded, yia blong hem i kasem wan handred twanti, mo kam kasem taem ya, hem i stap strong olwe nomo, mo ae blong hem tu i gud nomo.
8Long taem ya, ol laen blong Isrel* oli stap long bigfala levelples ya long Moab, mo oli stap krae from hem gogo kasem toti dei we hemia en blong ol dei blong krae blong olgeta.
9Be taem we Moses i no ded yet, hem i jusumaot Josua, i putumap hem blong bambae i tekem ples blong hem, mo Hae God i mekem hem i waes we i waes. Nao ol laen blong Isrel oli obei gud long hem, mo oli holemgud ol tok ya we Hae God i bin givim long Moses blong i givim long olgeta.
10 Eks 33.11 Moses i wan nambawan profet, mo kam kasem tede, i no gat wan narafala profet bakegen we i olsem hem, we Hae God i save toktok wetem hem, stret long fes blong hem.
11I no gat narafala profet bakegen we i save mekem ol merikel mo ol samting blong sapraes, olsem olgeta ya we Hae God i bin sanem hem blong i go mekem long fes blong king blong Ijip, wetem ol haeman blong hem mo ol narafala man blong kantri blong hem.
12Mo i no gat narafala profet tu we i save mekem ol bigbigfala samting ya we hem i stap mekem long fes blong ol laen blong Isrel, we oli stap mekem olgeta oli fraet tumas.
Who We AreWhat We EelieveWhat We Do
2025 by iamachristian.org,Inc All rights reserved.
