1Nao i no longtaem, King Deved i go mekem faet long ol man Filistia bakegen, mo i winim olgeta, nao olgeta oli no moa gat paoa blong kam mekem faet bakegen long kantri blong hem.
2Biaen, hem i go mekem faet long ol man Moab, mo i winim olgeta. Nao hem i tekem ol man we ol soldia blong hem oli holem olgeta long faet, i mekem olgeta oli ledaon long graon, mo long evri tri man, hem i kilim tu i ded, i livim wan i stap. Nao biaen long taem ya, ol man Moab oli stap aninit long rul blong hem, mo oli stap pem takis long hem.
3Nao King Hadadesa, we papa blong hem Rehob, hem i king long Joba, we i wan ples long Siria. Mo taem hem i stap go blong mekem faet long ol man antap long hil, long hed blong Yufretes Reva, blong mekem olgeta oli kam aninit long paoa blong hem bakegen, King Deved i go mekem faet long hem, mo i winim hem.
4Nao hem i holem wan taosen seven handred soldia blong ron long hos, wetem twanti taosen narafala soldia we olgeta evriwan oli blong king ya. Mo i holem ol hos we i naf blong pulum wan handred kat blong faet, be ol narawan, hem i katem string blong leg blong olgeta blong oli no moa save wokbaot.
5Nao taem ol man Siria we oli stap long Damaskes oli sanem sam soldia oli kam blong givhan long King Hadadesa, King Deved i go mekem faet long olgeta, mo i kilim twanti tu taosen man blong olgeta oli ded.
6Nao hem i putum ol soldia blong hem oli stap olbaot long ples blong olgeta, nao olgeta oli kam aninit long rul blong hem, mo oli stap pem takis long hem. Nao long evri ples we hem i go mekem faet long hem, Hae God i stap mekem hem i win.
7Ol sil* blong blokem ara we ol kapten blong King Hadadesa oli stap karem, ol man oli wokem long gol, nao hem i tekemaot ol sil ya, i karem i kam long Jerusalem.*
8Mo long tufala taon ya Beta mo Berotae, we tufala i blong King Hadadesa, hem i tekemaot plante bras tu, i karem i kam.
9Nao taem King Toe blong Hamat i harem nius we King Deved i winim ol soldia blong King Hadadesa,
10hem i sanem pikinini blong hem Joram i go blong talem halo long King Deved, mo blong talemaot long hem we i glad tumas blong harem we hem i winim King Hadadesa ya olsem, from we hem i stap faet agens long king ya plante taem finis. Long taem ya, Joram i tekem sam presen we oli wokem long gol, wetem sam we oli wokem long silva mo sam we oli wokem long bras, nao i givim olgeta i go long King Deved,
11-12mo hem i mekem prea long olgeta blong mekem olgeta oli tabu, oli blong Hae God, blong oli save yusum olgeta long wosip. Mo ol silva mo gol ya we hem i winim taem i go mekem faet long ol man Edom, mo ol man Moab, mo ol man Amon, mo ol man Filistia, mo ol man Amalek, wetem ol samting tu we i winim long King Hadadesa ya, hem i prea long olgeta ya tu blong mekem olgeta oli tabu, oli blong Hae God.
13 Sam 60 Nao biaen, King Deved i go mekem faet long ol man Edom long bigfala levelples ya long medel blong ol hil, we nem blong hem “Ples blong Tekem Sol”. Mo long taem ya, hem i kilim eitin taosen man blong olgeta, mo taem hem i kambak, nem blong hem i stap go antap moa.
14Hem i putum ol soldia blong hem oli stap olbaot long plante ples long Edom, nao olgeta man long ples ya tu oli stap aninit long rul blong hem. Mo long evri ples we hem i go mekem faet long hem, Hae God i stap mekem hem i win.
15Nao hem i stap rul long olgeta ples long Isrel,* mo oltaem hem i stap lukaot gud long olgeta man blong hem, long fasin we i gud mo i stret.
16Long taem ya, Joab ya we mama blong hem Jeruia, hem i komanda blong ol soldia blong hem, mo Jehosafat, we papa blong hem Ahilud hem i stap lukaot long ol ripot blong hem.
17Jadok we papa blong hem Ahitub, mo Ahimelek, we papa blong hem Abiata, tufala i pris blong hem, mo Seraea, hem i sekretari blong hem.
18Benaea we papa blong hem Jehoeada, hem i kapten blong ol bodigad blong hem, mo i gat ol pikinini blong king ya tu we oli ol haeman.
Who We AreWhat We EelieveWhat We Do
2025 by iamachristian.org,Inc All rights reserved.
