Josua 3 - Bislama Bible Revised 2012

Josua olgeta oli krosem Jodan Reva

1Nao long nekis dei, Josua olgeta oli girap long eli moning, oli aot long ples ya we oli stap long hem long Sitim, oli go stap klosap long Jodan Reva. Oli stap wet blong bambae oli gokros long narasaed.

2Oli stap tri dei, nao ol lida blong olgeta oli pasraon long ol man,

3oli talem long olgeta se, “Olgeta. Hae God i God blong yumi, mo ol pris* blong hem oli laen* blong Livae.* Taem yufala i luk we ol pris ya oli karem Bokis ya we i Saen blong Promes* blong Hae God oli wokbaot i go, yufala tu i mas biaen long olgeta.

4Neva yumi pas long ples ya samtaem, be olgeta ya bambae oli soemaot rod long yumi blong yumi folem. Be yufala i no mas go klosap blong Bokis ya, yufala i mas stap longwe long hem olsem wan kilometa.”

5Nao Josua i talem long olgeta se, “Yufala i mas mekem yufala i klin long fes blong Hae God fastaem, from we tumora, hem bambae i mekem ol merikel long medel blong yumi.”

6Mo long nekis dei, hem i talem long ol pris ya se, “Yufala i karem Bokis ya, yufala i go fastaem. Ol man bambae oli biaen long yufala.” Mo oli mekem stret olsem we hem i talem.

7Nao Hae God i talem long hem se, “Josua. Tede, bambae mi stat blong leftemap nem blong yu long fes blong ol man ya, blong soemaot long olgeta evriwan we yu yu wan lida. Olgeta ya oli mas ona long yu, mo oli mas save we mi bambae mi stap wetem yu oltaem, olsem we mi stap wetem Moses bifo.

8Yu talem long ol pris ya, se taem oli kasem reva ya, oli mas go stanap long wota klosap long saed blong hem.”

9-11Nao Josua i talem long olgeta man ya se, “Olgeta. Yufala i kam wanples blong harem ol tok we Hae God i wantem talem long yumi. Hae God ya, hem i laef, mo hem i God blong yumi. Hem i Masta* blong olgeta ples long wol. Tede, ol pris ya bambae oli karem Bokis ya we i Saen blong Promes blong hem, nao Bokis ya bambae i go fastaem long yumi, i gokros long Jodan Reva. Long taem ya nao, bambae yufala i save we Hae God ya, hem i stap long medel blong yumi. Mo bambae yufala i save tu, se taem yumi go insaed long kantri ya, hem bambae i ronemaot ol man we oli stap long kantri ya oli gowe long fes blong yumi. Hemia ol laen blong Kenan,* wetem ol laen blong Het, mo ol laen blong Hivi,* mo ol laen blong Perij bifo, mo ol laen blong Gigas, mo ol laen blong Amoro,* mo ol laen blong Jebus.

12Yumi ya, yumi evriwan i laen blong Isrel,* mo fastaem, yumi mas jusumaot twelef man wanwan long ol twelef laen blong yumi.

13Taem ol pris we oli karem Bokis ya oli purumbut long wota, long semtaem nomo, bambae reva ya i no moa ron. Wota we i stap ron i kamdaon bambae i stap fulap wanples nomo.”

14-15Long taem ya, i taem blong tekemaot kakae long garen,* we oltaem, Jodan Reva i stap ron bigwan.

Nao taem ol man ya oli aot long ples blong olgeta blong gokros long reva ya, ol pris oli karem Bokis ya, oli go fastaem, ol man oli kam biaen. Mo long semtaem ya we ol pris ya oli purumbut long wota,

16wota ya i no moa ron. Haf wota ya we i stap ron i kamdaon, hem i stap fulap longwe, klosap long taon ya Adam we i klosap long Jaretan. Mo nara haf we i stap ron i godaon kasem Ded* Si, hem i ron i go, nao ples ya i kam drae olgeta. Nao olgeta man oli gokros, oli kasem narasaed klosap long Jeriko.

17Mo taem olgeta oli stap gokros, ol pris ya oli stap stanap long medel blong ples ya we i drae finis, gogo kasem we olgeta man ya evriwan oli gokros.