1Nao king ya wetem Haman, tufala i go kakae wetem kwin bakegen.
2Mo taem trifala i stap dring waen, king i talem long kwin bakegen se, “Kwin, sipos yu talemaot long mi wanem samting we yu yu wantem, bambae mi save givim long yu naoia. Nating sipos yu askem haf blong olgeta samting we mi mi gat, be bambae mi save mekem olsem we yu yu wantem.”
3Nao kwin i talem se, “King. Sipos i tru we yu yu glad blong givim samting we bambae mi askem long yu, plis mi wantem tumas blong yu sevem laef blong mi wetem laef blong ol man ples blong mi, blong bambae mifala i no ded.
4Mi wetem ol man ples blong mi, wan man i bin pemaot mifala blong i save kilim mifala i ded. Sipos hem i bin pemaot mifala blong mekem mifala i kam slef* nomo, bambae mi save stap kwaet, mi no save mekem yu yu trabol from. Be naoia taem blong mifala i kam klosap we bambae man ya i kilim mifala evriwan i ded, we bambae i no gat wan long mifala i stap.”
5Nao king i askem long kwin se, “?Hu ya i wantem mekem samting ya? ?Man ya i stap wea?”
6Kwin i talem se, “Enemi ya blong mifala we i wantem spolem mifala, man nogud ya Haman.”
Nao Haman i stap lukluk long tufala, we i fraet we i fraet.
7Be king i kros we i kros, nao hem i girap, i aot long rum ya, i go long yad. Mo Haman i savegud we king bambae i kilim hem i ded from samting ya, nao hem i stap insaed blong askem long kwin blong i sevem laef blong hem.
8Nao king i kam insaed long haos bakegen, stret long taem we Haman i foldaon antap long longfala jea ya we kwin i stap ledaon long hem, i stap krae long kwin blong i gat sore long hem. Mo taem king i luk hem, hem i talem se, “!Ei! ?Man ya i mekem wanem ya? ?Hem i stap traem fosem woman blong mi blong slip wetem hem insaed long haos blong mi, stret long fes blong mi?”
Nao taem king i tok, wantaem nomo ol man blong wok blong hem oli kam kavremap fes blong Haman.
9Nao wan long olgeta we nem blong hem Habona, i talem se, “King. Man ya i jes wokem wan ples blong hangem man klosap long haos blong hem, we i hae we i hae i kasem twanti faef meta. Hem i wokem blong hangem Modekae long hem blong kilim hem i ded. Be man ya nao i sevem laef blong yu.”
Nao king i talem se, “!Ale! !Yufala i go hangem Haman long hem!”
10Nao oli tekem Haman, oli go hangem hem long ples ya we hem nomo i wokem blong hangem Modekae long hem. Nao king i no moa kros.
Who We AreWhat We EelieveWhat We Do
2025 by iamachristian.org,Inc All rights reserved.
