Ol Proveb 26 - Bislama Bible Revised 2012

1Sipos yu stap presem man we i no gat hed, hemia i olsem we i gat hariken long koltaem, no we man i go bonem garen blong hem long big ren.

2Sipos wan man i singaot* trabol i kam long yu, be yu yu no mekem wan samting we i stret blong trabol i kasem yu from, trabol ya bambae i no save kasem yu. Tok blong man ya bambae i olsem ol smosmol pijin ya we oli stap flaflae olbaot, we oli no save sidaon samtaem.

3Hos, oltaem yu mas wipim hem blong i obei long yu, mo dongki, yu mas putum aean long maot blong hem, mo long sem fasin, man we i no gat hed, yu mas wipim baksaed blong hem long stik.

4Sipos yu stap givim ansa long ol sili kwestin, hemia i soemaot we yu tu yu wan sili man, yu sem mak nomo long man ya we i stap askem ol kwestin ya long yu.

5Be sipos yu givim sili ansa long sili kwestin, bambae yu mekem man we i askem kwestin ya i save we hem i no waes olsem we hem i stap tingbaot.

6I nogud yu sanem man we i no gat hed i karem tok blong yu i go long narafala man. Sipos yu mekem olsem, yu stap lukaot trabol nomo. I moa gud yu katemaot tufala leg blong yu.

7Man we leg blong hem i nogud, hem i no save wokbaot, mo long sem fasin, man we i no gat hed i no save talem ol waestok.

8Fasin ya we man i stap presem man we i no gat hed, hem i olsem we man i fasemtaet ston long sling, nao ston ya i no save flae i go.

9Man we i no gat hed, we i stap traem talemaot wan waestok, hem i olsem man we i drong, we nil blong grasnil i stikim han blong hem, nao i stap traem blong pulumaot.

10Man we i stap givim wok long man we i no gat hed, mo long ol man olbaot nomo, hem i stap spolem hem nomo, wetem ol man raonabaot long hem.

11 2 Pita 2.22 Man we i no gat hed we i mekem wan krangke samting finis, nao biaen i mekem sem samting bakegen, hem i olsem dog we i traot, we biaen i gobak, i kakae traot blong hem bakegen.

12I moa isi blong yu lanem man we i no gat hed, i winim we yu lanem man we i ting se i waes, be i no waes nating.

13Man blong les, oltaem hem i stap nomo insaed long haos blong hem, from we hem i talem se, “Mi no wantem go long big rod, from we i gat bigfala laeon i stap klosap nomo.”

14Man blong les i stap tantanem hem long bed blong hem, olsem we doa i stap swing long hinsis blong hem.

15Sam man oli les tumas, oli no save putum kakae i go long maot blong olgeta.

16Man blong les, hem i save ting se tok blong hem i waes moa, i winim tok blong plante man we oli save talemaot ol gudfala poen blong olgeta, blong soemaot from wanem oli stap holem ol tingting blong olgeta.

17Sipos yu go joen long wan rao we yu yu no gat bisnes long hem, hemia i olsem we yu go wokbaot long big rod, nao yu kasolem wan dog long sora blong hem.

18-19Man we i giaman long narafala man, nao i mekem hem i go rong, be biaen i talem se i stap mekem blong laf nomo, hem i olsem man we i no gat hed, we i stap pleplei long ol tul blong faet we i save kilim man i ded.

20Sipos i no moa gat faeawud, bambae faea i ded, mo long sem fasin, sipos i no moa gat man i stap talem ol tok olbaot blong spolem narafala man, rao tu bambae i finis.

21Faeawud i stap mekem faea i laet strong, mo long sem fasin, man blong mekem trabol i stap mekem rao i gohed moa.

22Fasin ya we man i go talem ol tok olbaot we i spolem nem blong narafala man, hem i olsem wan samting we i swit we i swit, we yumi wantem tumas blong solemdaon.

23Tok we yu talem nomo blong haedem ol samting we i stap long tingting blong yu, hem i olsem pen we oli putum long rabis graonpot blong mekem i naes we i naes, be graonpot ya i rabis yet.

24Man we i gat tu tingting, sipos hem i no laekem yu, i agens long yu, bambae hem i save tok swit long fes blong yu oltaem blong haedem tingting ya blong hem.

25Nating we ol tok ya blong hem i gud we i gud, be yu no mas bilif long hem, from we hem i stap giaman nomo, tingting blong hem i fulap gud long tingting ya we i no laekem yu.

26Maet hem i traem haedem tingting ya blong hem, be olgeta man bambae oli save luk ol samting nogud ya we hem i stap mekem.

27Man we i stap digim hol blong narafala man i foldaon long hem, hem bambae i foldaon long wan hol olsem. Mo man we i stap rolem ston i godaon long hil blong flatem narafala man, ston olsem bambae i flatemgud hem bakegen.

28Sipos yu wantem tumas blong spolem wan man long ol giaman toktok blong yu, hemia i soemaot we yu yu no laekem hem nating, yu agens long hem. Ol swit toktok ya we yu stap talem, hem i no save mekem wan gud samting nating, i stap spolem ol samting nomo.