Job 3 - Bislama Bible Revised 2012

Job i harem nogud tumas nao i talemaot trabol blong hem long God

1 Jer 20.14-18 Nao Job i stat tok, mo i tok nogud long dei ya we hem i bon long hem.

2Hem i talem se,

3“God blong heven.

Sipos yu bin spolem naet ya

we papa mo mama blong mi

tufala i stap wanples long hem,

mo yu bin singaot* trabol

i kam long dei ya

we mi mi bon long hem,

bambae i moa gud.

4Sipos yu bin mekem dei ya i kam tudak,

we yu no moa save tingbaot bakegen,

mo yu no letem laet i saen long hem,

bambae i moa gud.

5Sipos yu bin letem tudak we i tudak olgeta

i kam holem dei ya i blong hem,

no yu bin kavremapgud hem long klaod,

mo yu bin blokem san,

blong i no saen long hem,

bambae i moa gud.

6Mo sipos yu bin letem naet ya

i kam tudak we i tudak olgeta,

mo yu bin tekemaot dei blong hem

i gowe long kalenda,

we yu no moa save kaontem bakegen,

bambae i moa gud olgeta.

7Sipos yu bin mekem we long naet ya,

mama mo papa blong mi,

tufala i no save harem gud,

mo mama blong mi i no save gat bel,

bambae i moa gud.

8Sipos yu bin talem long ol kleva

mo long ol man we oli save toktok

wetem bigfala anamol ya Leviatan*

blong oli spolemgud dei ya,

9mo sipos yu bin blokem moning sta

blong i no saen long naet ya,

mo yu bin mekem we naet ya i no save tingbaot se delaet bambae i kamtru,

bambae i moa gud.

10Sipos yu bin spolemgud naet ya,

bambae i moa gud.

Hem nao i mekem we mi mi bon,

nao mi kasem ol trabol ya

we naoia,

mi stap harem nogud tumas from.

11“Sipos mi mi ded

long bel blong mama blong mi,

no mi ded

long sem taem we mi mi bon,

bambae i gud tumas long mi.

12?Blong wanem mama blong mi

i putum mi mi stap gud

long leg blong hem?

?Blong wanem hem i givim titi long mi?

13Sipos mi ded long taem ya we mi mi bon,

naoia bambae mi stap spel gud.

14Bambae mi stap slip gud,

stret olsem ol king mo ol haeman

we oli bin wokem bakegen

ol olfala haos ya blong ol king bifo,

we naoia

olgeta oli stap spel gud.

15Bambae mi stap slip gud

olsem ol haeman

we ol haos blong olgeta

oli fulap gud long gol mo silva,

16no bambae mi stap slip gud

olsem pikinini we i bon we i ded finis.

17Long beregraon,

ol man nogud oli no moa mekem sin,

mo olgeta we oli taed tumas

from ol hadwok long wol ya

oli stap spel.

18Nating we man i slef* fastaem,

be long ples ya,

hem i stap harem gud,

from we i stap long pis,

i no moa save harem ol strong tok blong masta blong hem.

19Ples ya i ples blong evrikaen man.

Olgeta we oli gat nem,

wetem olgeta we oli no gat nem,

olgeta evriwan oli stap.

Mo ol slef tu oli fri

oli no moa stap

aninit long masta blong olgeta.

20“God.

?From wanem yu letem ol man

we oli stap harem nogud tumas

oli laef i stap?

?From wanem yu stap letem

laet i kam long ol man

we oli stap trabol tumas?

21 Rev 9.6 Oltaem oli wantem ded,

be oli no save ded.

Oltaem oli wantem beregraon moa

i winim we oli wantem

ol gudgudfala samting blong wol ya.

22Olgeta oli no save hapi,

gogo oli ded,

oli go long beregraon,

nao oli harem gud.

23God,

yu yu stap haedem fiuja

blong ol man oli no luk,

mo yu stap blokemgud olgeta

long evri saed.

?Be blong wanem yu givim laef

long olgeta?

24Long taem blong kakae,

mi mi no wantem kakae,

mi stap krae nomo.

Oltaem mi stap harem nogud,

mi stap krae, we mi no save spel.

25Ol samting we mi mi fraet long olgeta,

be oli stap kamtru nao,

oli kasem mi.

26Ol trabol blong mi,

bambae oli no save finis samtaem.

Mi mi no gat pis,

mo mi no save spel nating.”