Esikel 7 - Bislama Bible Revised 2012

Dei blong ol laen blong Isrel i kam klosap

1Hae God i Masta* blong yumi, mo hem i toktok long mi long wan vison bakegen,

2i talem se, “Man blong wol ya. Mi mi talem long yufala ol laen* blong Isrel,* se taem blong kantri blong yufala i stap kam nao.

3“Taem we bambae yufala i lus i kam klosap finis. Bambae yufala i haremsave kros blong mi from we mi stap jajem yufala from ol samting ya we yufala i mekem. Bambae mi panisim yufala from olgeta rabis fasin blong yufala.

4Bambae mi no save gat sore long yufala, mo mi no save sevem laef blong yufala. Bambae mi panisim yufala from ol rabis samting we yufala i mekem, blong bambae yufala i savegud we mi mi Hae God.”

5Mo hem i talem se, “I gat ol trabol i stap kam, we bambae wan i kam, i finis, narawan i kam, i finis, narawan bakegen i kam.

6Dei blong yufala i finis nao. Bambae yufala i lus. Janis blong yufala i finis.

7Taem i stap kam nao we yufala evriwan we i stap long kantri ya, bambae yufala i lus olgeta. Oltaem yufala i stap harem gud long ol lafet blong yufala long ol ples blong wosip blong yufala antap long ol hil, be taem blong hem klosap i finis. Bambae trabol i kasem yufala long ol ples ya, we bambae i mekem tingting blong yufala i paspas olbaot.

8“I no longtaem bambae yufala i luk paoa blong kros blong mi. Bambae mi jajem yufala from ol samting ya we yufala i mekem, mo bambae mi panisim yufala from ol rabis fasin ya blong yufala.

9Bambae mi no save gat sore long yufala, mo mi no save sevem laef blong yufala. Bambae mi panisim yufala from ol rabis samting we yufala i mekem, blong bambae yufala i savegud we mi mi Hae God, mo we mi nao mi stap panisim yufala.

10“!Yu luk! Ol man oli stap praod we i bitim mak, mo oltaem faet i stap gohed. !Be dei blong olgeta we bambae oli lus, klosap i kamtru!

11Fasin blong faet i kam bigwan we i stap mekem ol man oli stap mekem ol fasin we i nogud olgeta. Bambae i no gat wan long olgeta i save stap. Ol gudgudfala samting we i mekem olgeta oli rij, mo oli flas, mo oli gat hae nem, bambae i no moa gat.

12“Taem i stap kam, mo dei i stap klosap nomo we mi bambae mi panisim olgeta man evriwan. Nao man we i stap salem ol samting, bambae i no moa save soemaot se i harem nogud we i salem ol samting long smol praes nomo. Mo man we i stap pem ol samting, bambae i no moa save glad we hem i pem ol samting we praes i gud nomo.

13Bambae i no moa gat man i stap, we i save salem ol samting blong winimbak mane blong hem, from we mi mi kros long olgeta evriwan. Olgeta oli man nogud, mo bambae oli no moa save stap.”

Hae God bambae i panisim ol laen blong Isrel from sin blong olgeta

14Nao long vison ya, Hae God i talem long mi se, “Bambae pupu i krae, mo olgeta man oli mekemrere blong go faet. Be bambae i no gat man i muv, from we mi mi kros long olgeta, nao bambae mi panisim olgeta evriwan.

15Bambae i gat faet i stap gohed long ol bigfala rod long taon ya Jerusalem,* mo ol man we oli stap insaed long ol haos blong olgeta, bambae oli stap hanggri, mo bambae rabis sik i stap spolem olgeta. Olgeta we oli stap afsaed long taon bambae oli ded long faet. Mo olgeta we oli stap insaed long taon, bambae oli stap ded long hanggri, mo long rabis sik.

16Mo sam long olgeta bambae oli ronwe i go antap long ol hil, olsem ol sotleg* we oli stap daon long levelples, nao oli fraet, oli flae i go antap long ol hil. Olgeta evriwan bambae oli harem nogud, oli stap krae from ol sin blong olgeta.

17Olgeta man evriwan, bambae han blong olgeta i slak, mo leg blong olgeta i seksek bigwan.

18Bambae oli putum ol rabis klos, mo bambae oli stap seksek we i seksek. Bambae oli katemaot hea blong olgeta blong soemaot we oli sem we i sem, mo oli harem nogud tumas.

19Bambae olgeta oli luk ol silva mo ol gol blong olgeta olsem samting we i nogud we i nogud, mo bambae oli sakem olgeta olbaot long ol rod long taon. Taem we mi mi panisim olgeta from we mi kros we mi kros gud long olgeta, bambae ol samting ya i no save sevem olgeta. Oli no save yusum blong mekem olgeta oli harem gud long laef blong olgeta, mo oli no save pem ol kakae long hem, blong oli kakae oli harem gud. Ol gol mo ol silva ya nao i lidim olgeta blong oli mekem sin.

20Fastaem ol man ya oli stap glad tumas long ol flas ston blong olgeta, be oli girap, oli yusum olgeta blong wokem ol aedol blong olgeta we oli nogud we i nogud olgeta long fes blong mi. From samting ya nao, mi mekem ol man ya oli lukluk nogud long ol gudgudfala samting ya.

21“Bambae mi letem ol man blong ol narafala kantri we oli man blong brekem loa oli kam stil long ol man ya, mo oli kam tektekemaot ol gudgudfala samting ya blong olgeta, mo oli mekem ol samting ya i no moa tabu.

22Mi mi laekem haos* blong mi tumas, be sipos ol enemi ya oli go insaed long hem, oli mekem i no moa tabu, i kam doti long fes blong mi, bambae mi no save blokem olgeta.

23“Yu mas wokem ol jen blong fasem ol man long hem, from we olbaot long kantri ya ol man oli stap kilim ol narafala man, mo ol taon oli fulap long ol man we oli stap faet, oli stap kilkilim olgeta oli ded.

24Bambae mi tekem ol man blong ol narafala kantri we oli mowas olgeta, mi letem olgeta oli kam long ples blong yufala, nao bambae oli holem ol haos blong yufala i blong olgeta. Mo taem we mi letem olgeta oli mekem ol ples blong wosip blong yufala oli no moa tabu, bambae ol nambawan strong man blong yufala oli lusum paoa blong olgeta.

25Taem i stap kam we bambae tingting blong yufala i foldaon olgeta. Bambae yufala i lukaot pis, be bambae yufala i no save faenem.

26I gat ol trabol i stap kam, we bambae wan i kam, i finis, narawan i kam, i finis, narawan bakegen i kam. Long taem ya ol man bambae oli stap pasem ol badnius i go olbaot. Bambae oli go luk ol profet, blong askem long olgeta blong oli talemaot ol vison blong olgeta, be nogat. Ol pris* bambae oli no moa gat gudfala tingting blong tijim ol man long hem, mo ol elda* bambae oli no moa gat tok blong givhan long olgeta.

27Bambae king i harem nogud tumas, mo tingting blong pikinini blong hem bambae i foldaon olgeta, mo bambae olgeta man oli fraet, oli seksek. Bambae mi panisim olgeta from olgeta samting we oli mekem, mo bambae mi jajem olgeta sem mak nomo, olsem we olgeta oli stap jajem ol narafala man. Nao bambae oli savegud we mi mi Hae God.”