Aesea 22 - Bislama Bible Revised 2012

God i tokbaot ol man Jerusalem

1-2Nao Profet Aesea i talem long ol man blong hem se, “Olgeta. Mi mi luk wan vison* mo long vison ya mi luk we God i talemaot ol samting we i hapen long “Krik ya blong Luk Vison” Hem i tok long yumi i talem se, ‘?Wanem ol samting ya? Olbaot long taon ya, yufala i glad tumas, yufala i stap singsingaot bigwan from. Ples ya i fulap long noes blong yufala. ?Yufala i go antap long ol ruf* blong ol haos blong yufala, yufala i stap mekem lafet, mo yufala i stap glad, be from wanem ya? Ol man blong yufala oli ded long taem blong faet, we ol enemi oli no kilim olgeta.

3Ol lida blong yufala oli ronwe long faet, mo nating we oli ronwe i go longwe finis, mo oli no sut long bonara yet, mo oli no mekem faet nating yet, be ol enemi oli kam holem olgeta.’ ”

4Mo profet i talem se, “Mi mi harem nogud tumas. Plis yufala i livim mi mi stap mi wan, blong mi save krae from ol man ples blong yumi we oli lus. Plis yufala i no traem blokem mi, yufala i no traem blong mekem mi mi harem gud bakegen.

5Naoia, long ‘Krik blong Luk Vison’, i taem blong yumi fraet we yumi fraet nogud. Naoia, i taem blong ol enemi blong yumi oli winim yumi, mo tingting blong yumi i lus. Hae God i gat olgeta paoa, mo hem i Masta* blong yumi, mo hem nao i tekem ol samting ya i kam long yumi. Bigfala stonwol blong taon ya blong yumi, ol enemi blong yumi oli brebrekemdaon finis, mo yumi stap krae, blong man i givhan long yumi, be taem krae blong yumi i kasem ol hil longwe, hem i stap kambak nating nomo long yumi.

6“Ol soldia blong kantri ya Elam oli holem ol bonara blong olgeta, oli sidaon long ol hos blong olgeta, oli wokbaot i kam. Ol soldia blong kantri ya Kiri oli holem ol sil* blong olgeta, oli rere blong faet.

7Olbaot long Juda,* kantri ya blong yumi, ol levelples long medel blong ol hil we i nambawan graon blong yumi, be i fulap gud long ol kat blong faet blong ol enemi blong yumi. Ol soldia blong olgeta we oli sidaon long hos, oli stap hivap long fran blong doa* blong stonwol blong taon ya blong yumi.

8Olbaot long kantri ya blong yumi, ol strong ples blong haed blong yumi, Hae God i tekemaot olgeta evriwan.

“Nao taem yufala i luk samting ya, yufala i resis i kam long haos ya long Jerusalem* we yumi stap putumgud ol samting blong faet blong yumi long hem, yufala i stap karem ol samting ya i kam.

9-11Nao mi luk we yufala i girap, yufala i go blong faenemaot ol ples we bigfala stonwol blong taon ya i brobrok long hem, mo yufala i go lukluk olgeta haos long taon ya, nao yufala i go brekemdaon sam long ol haos ya, yufala i karem ol ston blong olgeta, blong wokem stonwol blong taon ya i gud bakegen. Mo yufala i wokem wan bigfala wel long taon ya, long medel blong tufala stonwol blong hem, blong yumi no sot long wota, nao ol wota we i ronaot long Olfala Wel ya, i stap ron i kamdaon, i go insaed long Niufala Wel ya Daon. Be Hae God nomo i stamba blong ol samting ya we i stap kasem yumi. Hem i mekem plan blong olgeta longtaem finis, be yufala i no luk long hem, yufala i no tingbaot hem nating.

12“Hae God i gat olgeta paoa, mo hem i Masta blong yumi. Long taem ya, hem i stap singaot long yufala, blong yufala i krae we yufala i krae bigwan, mo blong yufala i katemaot hea blong yufala, mo blong yufala i putum ol rabis klos blong soemaot we yufala i stap harem nogud.

131 Kor 15.32!Be nogat! Yufala i stap laf, mo yufala i stap mekem lafet. Yufala i stap kilim ol buluk mo sipsip, nao yufala i stap kakae mit, mo yufala i stap dring waen. Yufala i stap talem se, ‘I moa gud yumi gohed, yumi kakae, yumi dring. Tumora, bambae yumi evriwan i ded.’

14“Be hem i talem long mi se, ‘Sin ya we olgeta ya oli mekem, bambae mi mi no save fogivim olgeta from. Samting ya bambae i stap olwe long olgeta gogo oli ded. Mi mi Hae God, mi gat olgeta paoa, mo mi Masta blong yufala, mo hemia tok blong mi.’ ”

Tok blong wekemap haeman ya Sebna

15Nao Profet Aesea i talem se, “Hae God i gat olgeta paoa, mo hem i Masta* blong yumi, mo hem i talem long mi blong mi go luk haeman ya Sebna, we i bos blong ol man blong wok long haos blong king. Mo hem i talem long mi blong mi go talemaot tok blong hem long Sebna se,

16‘!Sebna! ?Yu yu wanem man ya? ?Olsem wanem yu yu go katem wan hol long ston ya long saed blong hil, blong bambae oli berem* yu long hem?

17Maet yu yu wan haeman tru, be mi bambae mi pikimap yu, mi sakemaot yu olgeta.

18Bambae mi pikimap yu, mi sakemaot yu yu go long wan narafala kantri we i moa big olgeta, olsem we man i pikimap ston, i slingim i go longwe. Long ples ya, bambae yu yu ded klosap long ol kat blong faet ya, we fastaem yu stap flas tumas long olgeta. Yu yu man blong pulum sem nomo i kam long haos blong masta blong yu.

19Mi bambae mi tekemaot yu long wok ya blong yu, mo bambae mi tekemaot hae nem ya blong yu, mi mekem yu yu stap daon.

20“ ‘Sebna. Long taem ya, bambae mi mi singaot man ya blong wok blong mi Eliakim, we papa blong hem Hilkia.

21Nao taem hem i kam, bambae mi tekemaot kot ya blong yu wetem strap ya blong yu we tufala i soemaot we yu yu gat hae nem, nao bambae mi putum tufala long hem, mo bambae mi givim paoa long hem, blong i mekem olgeta wok ya blong yu. Nao hem bambae i kam olsem papa blong ol man Jerusalem,* mo blong ol narafala man Juda* tu.

22Rev 3.7Bambae mi mekem we hem i kam nambawan haeman blong king ya we i kamaot biaen long King Deved, mo bambae hem i wok aninit long hem. Hem nomo bambae i holem ol ki blong evri samting long wok blong hem. Ol samting we hem bambae i openem, narafala man bambae i no save satem, mo ol samting we hem bambae i satem, narafala man bambae i no save openem.

23Bambae mi putum hem i stap strong long ples blong hem, olsem we huk i fas strong long wol blong haos, mo from we hem i gat hae nem, olgeta famle blong hem tu bambae oli gat hae nem.

24“ ‘Be ol famle ya blong hem wetem ol laen blong hem, bambae oli kam olsem hevi samting, blong hem i karem. Bambae oli stap hang long hem, olsem we ol sospen mo ol besin oli hang long huk.

25Long taem ya, huk ya we fastaem i fas strong long wol, bambae i stap kam slak, gogo i kamaot, i foldaon. Mo taem hem i foldaon, olgeta samting we i stap hang long hem bambae oli foldaon wetem hem. Mi mi Hae God, mo hemia tok blong mi.’ ”