Ol Proveb 30 - Bislama Bible Revised 2012

Ol waestok blong Aguru

1I gat ol waestok i stap, we i blong Aguru we papa blong hem Jake, mo ol tok ya i olsem. Hem i talem se,

“!God i no moa stap wetem mi!

!Hem i no stap nating wetem mi,

mo mi mi kam slak olgeta!

2Naoia mi mi no moa olsem man,

mi olsem anamol nomo.

Mi no moa gat paoa blong save ol samting

olsem we ol narafala man oli gat.

3Mi no lanem ol waestok nating.

God i tabu we i tabu,

be mi mi no save fasin blong hem.

4?Olsem wanem?

?I gat man finis we i go antap long heven,

nao i kamdaon bakegen,

i talemaot ol samting we hem i luk?

?I gat man finis we i holemtaet win

long han blong hem?

?I gat man finis we i karem wota long kaliko?

?I gat man finis we i makem ol ples

we wol i go finis long hem?

Sipos yu save we i gat man olsem i stap,

i gud yu talemaot nem blong hem long mi,

wetem nem blong pikinini blong hem,

blong mi mi save.

5“Olgeta promes we God i mekem,

hem i stap holem olgeta evriwan.

Olgeta man we oli stap kam long hem

blong faenem sefples long hem,

hem i stap lukaot gud long olgeta,

i stap blokemgud olgeta.

6Be sipos yu talem

se hem i talem wan samting

we neva hem i talem samtaem,

bambae hem i tok long yu,

mo bambae i soemaot long yu

we yu yu man blong giaman.”

Ol narafala waestok bakegen

7-9Hae God, yu yu God blong mi. I gat tu samting i stap we mi wantem blong yu letem mi mi kasem long taem ya we mi stap laef yet. Plis, mi wantem blong yu mekem we mi mi no moa save giaman, mo we mi no save kam puaman, mo mi no save kam rijman tu. Mi wantem blong yu givim kakae long mi we i stret nomo long mi, from we sipos mi gat plante kakae, maet mi save tok nogud long yu, se mi no save yu, mo sipos mi kam puaman, maet mi save stil, nao bambae mi spolem nem blong yu.

10Fren, sipos yu stap toktok wetem wan man, i nogud yu tok agens long man blong wok blong hem. Maet man ya blong hem i singaot* trabol i kam long yu, we bambae yu harem nogud from.

11I gat ol man we oli stap singaot trabol i kam long papa mo mama blong olgeta, mo we oli no glad nating long tufala.

12Mo i gat ol man we oli ting se laef blong olgeta i klin we i klin gud, be oli stap mekem ol samting nogud, we laef blong olgeta i nogud we i nogud olgeta.

13Mo i gat ol man we oli ting se oli gud tumas, oli stap leftemap olgeta, se oli gud moa i winim ol narafala man.

14Mo i gat ol man we oli stap mekem i strong tumas long ol puaman, mo long ol man we oli stap long trabol. Oli stap ravem olgeta, we oli stap spolemgud olgeta, mo fasin ya nao, oli stap laef long hem.

15Wom ya long bus we i stap dring blad, hem i gat tu dota blong hem, we oli putum nem long tufala se, “!Givim long mi!”. Mo i gat plante man oli stap mekem fasin ya.

Mo i gat ol samting i stap, we neva oli save talem se, “I naf ya.” Fo long olgeta i olsem.

16I gat Hom* blong ol Dedman,

mo woman we i no gat pikinini,

mo graon ya we oltaem i stap sot long ren,

mo bigfala faea we man i no save blokem.

17Man we i stap laf nogud long papa mo mama blong hem, mo i no wantem obei long tufala, i gud hem i ded, mo oli no berem hem, blong ol pijin ya we oli stap kakae dedbodi, oli kam kakae hem.

18I gat ol samting i stap, we oli strong tumas i bitim save blong mi. Fo long olgeta i olsem.

19I gat fasin blong pijin ya igel*

we i stap flae antap long skae,

mo fasin blong snek

we i stap ron antap long ston,

mo fasin blong sip

we i stap go olbaot long solwota,

mo fasin blong boe wetem gel

we tufala i stap laeklaekem tufala tumas.

20Fasin blong woman we i lego man blong hem i olsem. Hem i go slip wetem narafala man, mo biaen i swim, nao i stap talem se, “Mi mi no mekem wan samting nogud.”

21I gat ol samting i stap, we olgeta man long wol ya oli no wantem nating. Fo long olgeta i olsem.

22I gat slef* we i kam king,

mo man we i no gat hed,

be neva i sot long kakae,

23mo gel we ol man raonabaot long hem

oli no laekem hem,

oli agens long hem,

be hem i go mared long wan man,

mo woman slef

we i tekem ples blong misis blong hem.

24Mo i gat fo samting i stap, we oli smosmol nomo, be oli waes we i waes.

25Faswan, ol anis,

we oli no strong,

be oli save mekemrere ol kakae blong olgeta

blong rentaem.

26Mo sekenwan, ol anamol ya baja,*

we oli no strong nating,

be oli save mekem ples blong olgeta

long hol blong ston.

27Mo namba tri, ol lokis,*

we oli no gat king blong olgeta,

be taem oli wokbaot,

oli save muf wantaem olsem ol soldia.

28Mo namba fo, ol lised ya bigae,

we yu save holem long han blong yu,

be yu save luk olgeta tu

long haos blong king.

29Mo i gat ol samting i stap, we fasin blong olgeta blong wokbaot i nambawan. Fo long olgeta i olsem.

30I gat laeon,

we i strong moa

i winim ol narafala anamol,

mo i no save fraet nating,

31mo man nani,

mo man faol,

we i stap wokbaot

long fes blong ol woman faol,

mo king,

we i stap wokbaot

long fes blong ol man blong hem.

32Sipos yu stap mekem ol krangke fasin, we yu stap leftemap yu tumas no yu stap mekem plan blong mekem ol samting nogud, i moa gud yu stap kwaet, yu tingting gud.

33Sipos yu stap tantanem krim blong melek bambae i kam bata. Mo sipos yu faetem nus blong man, bambae blad blong hem i ron. Mo long sem fasin, sipos yu stap mekem man i kros, bambae yu kasem trabol from.