Prija 3 - Bislama Bible Revised 2012

Olgeta samting oli stap kamtru stret long taem we God i putum

1“Olgeta samting we oli stap kamtru long wol ya, oli stap kamtru stret long taem we God i putum.

2“Hem i putum taem blong man i bon,

mo i putum taem blong man i ded.

Hem i putum taem blong man i planem garen,

mo i putum taem blong man i tekemaot kakae long garen.

3Hem i putum taem blong man i kilim man i ded,

mo i putum taem blong man i wokem sikman i gud bakegen.

Hem i putum taem blong man i brekemdaon samting,

mo i putum taem blong man i wokem samting i gud bakegen.

4Hem i putum taem blong man i harem nogud,

mo i putum taem blong man i harem gud bakegen.

Hem i putum taem blong man i krae,

mo i putum taem blong man i danis.

5Hem i putum taem blong man i sakem ol ston i go olbaot,

mo i putum taem blong man i hivimap ol ston i stap wanples.

Hem i putum taem blong man i kis,

mo i putum taem blong man i no kis.

6Hem i putum taem blong man i faenem samting,

mo i putum taem blong man i lusum samting.

Hem i putum taem blong man i hivimap ol samting,

mo i putum taem blong man i sakemaot ol samting.

7Hem i putum taem blong man i terem* klos,

mo i putum taem blong man i somap klos.

Hem i putum taem blong man i stap kwaet,

mo i putum taem blong man i tok.

8Hem i putum taem blong man i laekem narafala man,

mo i putum taem blong man i no laekem narafala man,

i agensem hem.

Hem i putum taem blong man i go mekem faet,

mo i putum taem blong man i go mekem pis.

9“?Yumi stap kasem wanem long ol hadwok ya blong yumi?

10Mi mi savegud ol hevi samting we God i givim long yumi, blong yumi karem long laef ya blong yumi.

11Hem nao i putum stret taem blong ol samting ya oli kamtru. Mo hem i mekem yumi, we long tingting blong yumi, oltaem yumi wantem tumas blong save ol samting we bambae i kamtru long fiuja. Yumi wantem tumas blong savegud ol samting we hem i stap mekem, be neva hem i letem blong yumi save.

12Nao from samting ya, mi mi luksave se wan rod nomo i stap, we oltaem long laef ya blong yumi, yumi mas traehad blong stap long gudfala laef, mo blong mekem ol gudfala fasin.

13I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.

14“Fasin blong God i no save jenis. Olgeta samting we hem i mekem, mi mi save se bambae oli stap olwe, gogo i no save finis. Yumi no save ademap wan samting long hem, mo yumi no save tekemaot wan samting long hem tu. Mo God i stap mekem olsem blong mekem yumi tinghevi long hem, blong yumi ona long hem.

15Olgeta samting we oli stap kamtru long laef blong yumi, no we bambae oli save kamtru, be oli olsem ol samting ya nomo we oli stap kamtru bifo. Oltaem, ol samting we God i stap mekem i kamtru, oli stret olsem ol samting ya we hem i mekem olgeta oli kamtru finis.

Ol man oli stap mekem i no stret long ol narafala man

16“Nao i gat wan narafala samting bakegen we mi mi luk se i nogud. Long wol ya, ol man oli no wantem stret fasin, mo oli no wantem jajem man long stret fasin, oltaem oli stap folem ol rabis fasin nomo.

17Nao mi stap tingting mi wan se, ‘No, be oli no save win. God bambae i jajem olgeta man. Hem i putum taem blong olgeta samting, mo olgeta wok blong hem bambae oli mas kamtru. Ol stret man wetem ol man nogud bambae oli mas stanap long fes blong hem.’

18Be biaen, mi luk se God i stap mekem i strong long yumi blong traem yumi, blong soemaot long yumi we yumi sem mak nomo wetem ol anamol.

19Man mo anamol, tufala i sem mak nomo. Man i no save talem se hem i moa gud, i winim anamol, from we laef blong tufala i blong nating nomo. Rod blong ded i stap wet long tufala. Bambae tufala tugeta i mas ded.

20Bambae tufala tugeta i mas gobak long graon. Tufala i kamaot long graon, mo bambae tufala i gobak long hem bakegen.

21?Olsem wanem man i save talem se taem hem i ded, spirit blong hem bambae i go antap long heven, be taem anamol i ded, bambae spirit blong hem i godaon long graon?

22Nao from samting ya, mi mi luksave se wan rod nomo i stap blong yumi. I gud yumi stap glad long ol samting ya we yumi stap hadwok long hem. I no gat wan narafala samting we yumi save mekem. I no gat rod blong faenemaot ol samting we bambae i kamtru long ples ya, biaen long taem ya we bambae yumi ded.