Namba 29 - Bislama Bible Revised 2012

Ol kakae we i blong bonem wetem ol sakrefaes ya we oli mas mekem long Lafet blong Niu Yia(Levitikas 23.23-25)

1Nao Hae God i talem se, “Mo evri yia, long namba seven manis blong yia, long fas dei* blong hem, bambae yufala i mas kam wanples blong mekem wosip long mi, mo bambae i tabu blong yufala i mekem wok blong yufala long dei ya. Hemia i dei blong mekem Lafet* blong Niu Yia, mo i dei blong bloem ol trampet blong yufala.

2Long dei ya, bambae yufala i mas kilim wan yang bul, mo wan man sipsip, mo seven smol man sipsip we oli gat wan yia blong olgeta, mo olgeta anamol ya evriwan oli no mas gat wan samting i rong long bodi blong olgeta. Nao yufala i mas mekem sakrefaes ya long olgeta, we i blong bonem i bon evriwan, mo gudfala smel blong hem bambae i mekem mi mi glad tumas long hem.

3Mo kakae we i stret blong yufala i bonem wetem ol sakrefaes ya i olsem. Wetem bul ya, bambae yufala i mas bonem tri kilo flaoa we yufala i tantanem wetem olifoel,* mo wetem man sipsip ya, bambae yufala i mas bonem tu kilo flaoa olsem bakegen.

4Mo wetem ol seven smol sipsip ya, bambae yufala i mas bonem seven kilo flaoa olsem bakegen. Wan kilo wetem wan, wan kilo wetem wan.

5Mo bambae yufala i mas kilim wan man nani blong mekem spesel sakrefaes blong tekemaot sin blong yufala, blong yufala i save joen gud long mi bakegen.

6Ol sakrefaes ya bambae i antap long ol narafala sakrefaes we bambae yufala i stap mekem oltaem long fas dei blong manis wetem ol kakae we yufala i stap bonem wetem olgeta, mo antap bakegen long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala. Gudfala smel blong hem bambae i mekem mi mi glad tumas long hem.”

Ol kakae we i blong bonem wetem ol sakrefaes ya we oli mas mekem long Dei blong Stretem Sin(Levitikas 23.26-32)

7 Lev 16.29-34 Nao Hae God i talem se, “Mo evri yia, long namba seven manis blong yia, long namba ten dei* blong hem, bambae yufala i mas livim kakae, yufala i mas kam wanples blong mekem wosip long mi, mo long dei ya, bambae i tabu blong yufala i mekem wok blong yufala long hem.

8Long dei ya, bambae yufala i mas kilim wan yang bul, mo wan man sipsip, mo seven smol man sipsip we oli gat wan yia blong olgeta, mo olgeta anamol ya evriwan oli no mas gat wan samting i rong long bodi blong olgeta. Nao yufala i mas mekem sakrefaes ya long olgeta, we i blong bonem i bon evriwan, mo gudfala smel blong hem bambae i mekem mi mi glad tumas long hem.

9Mo kakae we i stret blong bonem wetem ol sakrefaes ya i olsem. Wetem bul ya, bambae yufala i mas bonem tri kilo flaoa we yufala i tantanem wetem olifoel,* mo wetem man sipsip ya, bambae yufala i mas bonem tu kilo flaoa olsem bakegen.

10Mo wetem ol seven smol sipsip ya, bambae yufala i mas bonem seven kilo flaoa olsem bakegen, wan kilo wetem wan, wan kilo wetem wan.

11Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala, we hemia i antap long narafala man nani ya we bambae yufala i mekem sakrefaes long hem long dei ya blong tekemaot ol sin blong olgeta man, mo i antap bakegen long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.”

Ol kakae we i blong bonem wetem ol sakrefaes ya we oli mas mekem long Lafet blong Wokem ol Wansaed Haos(Levitikas 23.33-44)

12 Lev 23.34; Dut 16.13-15 Nao Hae God i talem se, “Mo evri yia, long namba seven manis, long namba fiftin dei* blong hem, bambae yufala i mas kam wanples blong mekem wosip long mi, mo blong mekem lafet. Lafet ya bambae i stat long namba fiftin, mo bambae i stap go kasem namba twanti tu, mo long taem ya, bambae i tabu blong yufala i mekem wok blong yufala.

13Long fas dei ya, bambae yufala i mas kilim totin yang bul, mo tu man sipsip, mo fotin smol man sipsip we oli gat wan yia blong olgeta, mo olgeta anamol ya evriwan oli no mas gat wan samting i rong long bodi blong olgeta. Mo yufala i mas mekem sakrefaes ya long olgeta, we i blong bonem i bon evriwan, mo gudfala smel blong hem bambae i mekem mi mi glad tumas long hem.

14Mo kakae we i stret blong bonem wetem ol sakrefaes ya i olsem. Wetem ol bul ya, bambae yufala i mas bonem toti naen kilo flaoa we yufala i tantanem wetem olifoel,* tri kilo wetem wan, tri kilo wetem wan, mo wetem tufala man sipsip ya, bambae yufala i mas bonem fo kilo flaoa olsem, tu kilo wetem wan, tu kilo wetem wan.

15Mo wetem ol fotin smol sipsip ya, bambae yufala i mas bonem fotin kilo flaoa olsem bakegen, wan kilo wetem wan, wan kilo wetem wan.

16Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

17“Mo long seken dei blong lafet ya, bambae yufala i mas mekem sakrefaes long twelef yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

18Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

19Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

20“Mo long namba tri dei blong hem, bambae yufala i mas mekem sakrefaes long leven yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

21Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

22Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

23“Mo long namba fo dei blong hem, bambae yufala i mas mekem sakrefaes long ten yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

24Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

25Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

26“Mo long namba faef dei blong hem, bambae yufala i mas mekem sakrefaes long naen yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

27Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

28Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

29“Mo long namba sikis dei blong hem, bambae yufala i mas mekem sakrefaes long eit yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

30Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

31Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

32“Mo long namba seven dei blong hem, bambae yufala i mas mekem sakrefaes long seven yang bul, mo tu man sipsip, mo fotin smol man sipsip, we olgeta ya bambae oli sem mak nomo long ol anamol ya long fas dei.

33Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

34Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

35“Mo long namba eit dei blong lafet ya, bambae yufala i mas kam wanples bakegen blong mekem wosip long mi, mo long dei ya, bambae i tabu blong yufala i mekem wok blong yufala long hem.

36Long dei ya, bambae yufala i mas mekem sakrefaes long wan yang bul, mo wan man sipsip, mo seven smol man sipsip, we olgeta ya bambae oli sem mak nomo long ol anamol ya long fas dei.

37Mo kakae blong bonem wetem ol sakrefaes ya bambae i olsem ol kakae we yufala i bonem wetem ol anamol ya wanwan long fas dei, mo waen we bambae yufala i kafsaedem i go wetem olgeta bambae i folem namba blong olgeta.

38Mo bambae yufala i mas kilim wan man nani blong mekem spesel sakrefaes ya blong tekemaot sin blong yufala. Mo ol sakrefaes ya bambae i antap long tufala sakrefaes ya we yufala i stap mekem evri dei, wetem ol kakae mo waen we yufala i stap bonem wetem tufala.

39“Hemia ol kakae we yufala i mas bonem wetem ol sakrefaes ya we yufala i mas mekem long ol lafet blong yufala. Ol rul ya oli kavremap ol sakrefaes ya we yufala i kilim anamol, no yufala i tekem kakae blong garen* blong yufala, yufala i bonem blong givim i kam long mi, no yufala i tekem waen, yufala i kafsaedem i go long Olta blong givim i kam long mi, no yufala i kilim anamol blong mekem sakrefaes ya we pris i bonem haf, yufala i kakae haf blong soemaot we yufala i stap fren gud wetem mi. Ol kakae ya i antap long ol samting we bambae yufala i mas givim i kam long mi blong fulumap promes we yufala i mekem long mi, mo i antap tu long ol presen we bambae yufala i givim i kam long mi long gladhat blong yufala nomo.”

40Nao Moses i go talemaot olgeta tok ya we Hae God i talem, blong ol man oli harem.