1 Samuel 5 - Bislama Bible Revised 2012

Ol man Filistia oli kasem trabol from Bokis ya we i Saen blong Promes blong Hae God

1Taem ol man Filistia oli holem Bokis ya we i Saen blong Promes* blong Hae God, olgeta oli karemaot long Ebenesa, oli tekem i go long wan taon blong olgeta, nem blong hem Asdod,

2nao oli go putum insaed long haos blong wan god blong olgeta we nem blong hem Dagon. Oli tekem i go klosap long wan pija blong Dagon ya we oli wokem long ston, nao oli putum i stap long ples ya.

3Nao long nekis dei, long eli moning, ol man blong taon ya oli go long haos blong god ya, nao oli sek we pija blong god ya i foldaon, we fes blong hem i go long graon, olsem we hem i bodaon blong Bokis ya. Nao oli leftemap pija ya, oli putumgud long ples blong hem bakegen.

4Mo long nekis dei long eli moning, oli go bakegen, be oli luk we pija ya i foldaon bakegen, olsem we i bodaon bakegen long Bokis ya. Be long taem ya, hed blong hem wetem tufala han blong hem i brokaot long hem, i stap olbaot long doa, bodi blong hem i stap hem wan.

5(Taswe, kam kasem tede, ol pris* blong god ya wetem ol man Asdod we oli kam blong mekem wosip long hem oli no save purumbut long ples ya long doa, oli stap pasraon long hem nomo.)

6Nao long taem ya, Hae God i panisim ol man Asdod wetem ol man blong ol ples raonabaot, we i meksavegud olgeta, nao oli fraet we oli fraet. Hem i mekem ol samting olsem boela i stap solap long bodi blong olgeta.

7Taem ol narafala man Filistia oli luk ol samting ya, oli talem se, “God blong ol laen* blong Isrel* ya i stap panisim yumi wetem god ya blong yumi. Yumi no moa save holem Bokis ya i stap long ples ya.”

8Nao oli sanem sam man oli go singaot ol faef king blong olgeta oli kam wanples. Nao oli askem long ol king ya se, “?Bambae yumi mekem olsem wanem long Bokis ya we i blong God blong ol laen blong Isrel?”

Ol king ya oli talem se, “Yufala i tekemaot long ples ya, yufala i karem i go long Gat.” Nao oli karem i go long ples ya, we i wan narafala taon long Filistia.

9Be taem oli tekem i go stap long ples ya, Hae God i panisim ol man blong taon ya tu, we i meksave olgeta, nao oli fraet we oli lusum hed. Hem i panisim olgeta man long taon ya. Hem i mekem ol samting olsem boela i stap solap long bodi blong olgeta, we ol yangyangfala wetem ol ololfala oli kasem sem mak nomo.

10Nao oli sanem Bokis ya i go long Ekron, we i wan narafala taon blong Filistia. Be taem oli karem Bokis ya i go kasem taon ya, ol man blong ples ya oli stap singsingaot se, “!Ei, olgeta! Oli tekem Bokis ya we i blong God blong ol laen blong Isrel i kam long ples blong yumi. !Ating oli wantem kilim yumi ya!”

11Nao oli sanem sam man i go long ol king blong Filistia blong talem long olgeta se, “!Yufala i tekemaot Bokis ya! Yufala i sanem i gobak long ples blong hem, blong hem i no moa kilim yumi wetem ol famle blong yumi.” Olgeta man blong taon ya evriwan oli fraet we oli lusum hed olgeta, from we God i stap panisim olgeta we i meksavegud olgeta.

12Olgeta we oli gat sik ya be oli no ded, oli stap krae i go long God blong i givhan long olgeta.