Sam 61 - Bislama Bible Revised 2012

Prea blong man we i stap afsaed long kantri blong hem mo i no save gobak(Sing ya, Deved i wokem. Hemia i blong sing wetem stringban.)(Tok i go long God.)

1God.

Plis yu harem krae blong mi,

yu lesin long prea blong mi.

2Mi mi stap longwe tumas long ples blong mi,

tingting blong mi i foldaon,

nao mi stap singaot long yu.

Plis yu tekem mi mi go

long wan strong ples blong haed,

3from we oltaem,

yu yu stap lukaot gud long mi,

yu stap blokem ol enemi blong mi.

4Plis yu letem mi mi stap

long tabu ples blong yu

oltaem long laef blong mi,

yu letem mi mi faenem sefples long yu,

olsem we pikinini blong faol i faenem sefples

aninit long wing blong mama blong hem.

5God,

yu yu harem ol promes blong mi finis,

mo ol samting ya we i blong man

we i ona long yu,

yu yu givim long mi finis.

6Plis yu mekem

we king blong mifala i gat longfala laef,

mo yu letem hem i stap longtaem we longtaem.

7God.

Prea blong mi,

we bambae hem i rul long fes blong yu

oltaem long laef blong hem,

mo we oltaem bambae yu yu lavem hem tumas,

tingting blong yu i stap strong long hem,

nao bambae yu stap lukaot gud long hem,

yu blokemgud hem.

8Evri dei,

bambae mi stap givim ol samting ya long yu

we mi promes blong givim,

mo oltaem,

bambae mi sing blong presem yu.