Aesea 5 - Bislama Bible Revised 2012

Sing blong talem stori blong plantesen blong Hae God

1 Mat 21.33; Mak 12.1; Luk 20.9 Nao Profet Aesea i sing long wan sing, i talem se,

“Mi mi wantem singsing long yufala

blong talemaot fasin

blong wan gudfala fren blong mi

we i wokem wan plantesen blong rop ya grep,*

long saed blong wan hil,

we graon blong hem i nambawan.

2Fastaem, hem i brebrekem graon long ples ya,

mo i tektekemaot ol ston long hem,

nao i planem ol gudfala rop long hem.

Long medel blong plantesen ya,

hem i wokem wan wajhaos* we i hae,

we ol gad oli save stap long hem,

blong lukaot gud long plantesen ya,

mo i digim wan hol tu long ston

we ol man oli save purumbut long frut blong ol grep ya

blong tekemaot wota blong hem.

Nao hem i stap wet long ol grep ya

blong oli karem gudfala kakae,

be taem ol frut ya oli raep,

oli konkon evriwan.

3“Nao fren ya blong mi i talem se, ‘!Ol man Jerusalem* mo ol narafala man Juda*! Mi mi gat poen agens long plantesen blong mi. Yufala i traem harem, nao yufala i jajem se i stret no i no stret.

4Mi mi mekem evri samting blong givhan long plantesen ya, i no moa gat wan samting nating i stap we mi no mekem. Be taem mi go blong tekem ol frut long hem, olgeta evriwan oli konkon nomo.

5“ ‘Plan blong mi we bambae mi mekem long plantesen ya i olsem. Bambae mi tekemaot fenis ya we i goraon long hem, wetem stonwol blong hem, nao bambae ol anamol oli save kam kakae ol grep ya, mo oli save purumpurumbut olbaot long hem.

6Bambae mi no moa save go katem ol gru blong olgeta bakegen blong klinim, mo bambae mi no moa save go klinim ol graon raonabaot long ol stamba blong olgeta. Bambae mi letem ol rabis gras mo ol grasnil oli gru olbaot long hem, oli kavremapgud ples ya. Mo bambae mi blokem ol klaod tu, blong i no ren long ples ya.’ ”

7Nao profet i gohed, i talem se,

“Fren ya blong mi,

Hae God ya we i gat olgeta paoa,

mo plantesen ya blong grep blong hem,

we hem nomo i planem,

yumi ya, ol laen* blong Isrel,*

we yumi stap long Juda.

Hem i stap luk long yumi,

se bambae yumi stap mekem ol gudfala fasin,

be yumi girap,

yumi stap kilim ol man oli ded.

Hem i stap luk long yumi,

se bambae yumi stap mekem ol stret fasin,

be ol man ya

we yumi stap mekem i no stret long olgeta,

oli stap krae i go long hem.”

Ol rabis fasin we ol man oli stap mekem

8Nao Profet Aesea i talem se, “Olgeta. Yufala ya we i stap griri tumas, nao yufala i stap pemaot ol haos long taon, wetem ol graon blong wokem garen long hem blong mekem we yufala i gat plante samting, sore tumas long yufala. Fasin ya blong yufala i stap spolemgud ol narafala man. I no longtaem, bambae i no moa gat ples blong olgeta, yufala nomo bambae i stap long ol ples ya.

9Hae God i gat olgeta paoa, mo hem i mekem wan strong promes finis agens long yufala, mo mi mi harem tok blong hem. Hem i talem se, ‘Ol bigbigfala haos ya blong yufala we oli gudwan tumas, bambae oli brokdaon evriwan, oli stap nating.

10Ol rop ya long ol plantesen blong yufala, long ten hekta blong hem, bambae yufala i kasem fifti lita waen nomo, mo ol garen wit* blong yufala, long graon we yufala i planem tu handred kilo wit, bambae yufala i kasem twanti kilo nomo.’

11“Yufala ya we i stap girap long eli moning blong go lukaot waen, nao yufala i stap dring go kasem medel naet, gogo yufala i hablok, sore tumas long yufala.

12Oltaem, long ol lafet* blong yufala, yufala i stap kilim ol gita mo mandolin mo tamborin blong yufala, yufala i stap blu long ol bambu paep blong yufala, mo yufala i stap gohed long ol waen blong yufala, be yufala i no save tingbaot ol samting we Hae God i stap mekem, yufala i no save luksave ol wok ya we hem i stap wokem.

13Nao from ol fasin ya blong yufala, Hae God i talem se bambae yufala i go wok slef* long narafala kantri we i longwe. Yufala ol haeman, bambae yufala i ded long hanggri, mo yufala ol narafala man, bambae yufala i ded long tosta.

14Yes, Hom* blong ol Dedman bambae i kam olsem anamol we i hanggri tumas, we maot blong hem i stap open bigwan, nao bambae i stap solemdaon yufala evriwan. Ol man ya blong mekem lafet we oli stap mekem noes olbaot long naet, wetem ol man ya blong drong we oli stap mekem faet, bambae oli lus evriwan.

15Nating we man i gat nem no i no gat, be Hae God bambae i mekem tingting blong man ya i stap daon. Olgeta man blong flas, hem bambae i mekem tingting blong flas blong olgeta i finis.

16Hem i gat olgeta paoa, mo hem i God blong yumi. Long ol stret fasin ya we hem i mekem, bambae hem i soemaot we hem i hae we i hae, mo long ol stret fasin ya blong jajem man, bambae hem i soemaot we hem i tabu we i tabu.

17Long ples ya, we taon ya i stap long hem naoia, ol smosmol sipsip bambae oli stap kakae gras long hem, mo ol smosmol nani tu bambae oli stap kasem ol gudfala kakae blong olgeta long hem.

18“Yufala ya, oltaem fasin blong giaman blong yufala i stap pulum ol fasin nogud i kam long yufala, olsem we man i yusum bigfala rop blong pulum hevi samting i kam, be sore tumas long yufala.

19Yufala i stap talem se, ‘I gud Hae God i hareap, i mekem ol samting ya we i stap talem se bambae i mekem, blong yumi save luk. Sipos hem i God blong yumi, mo hem i tabu tumas, i gud hem i wokem ol samting we i stap long plan blong hem, mo i gud hem i soemaot ol tingting blong hem, blong yumi save.’ !Yufala we i stap tok flas olsem, sore tumas long yufala!

20“Yufala ya, we i stap talem ol fasin we oli nogud, se oli gud nomo, mo ol fasin we oli gud, se oli nogud, sore tumas long yufala. Yufala i stap talem tudak, se i delaet nomo, mo yufala i stap talem delaet, se i tudak. Yufala i stap talem ol samting we oli konkon, se oli swit nomo, mo yufala i stap talem ol samting we oli swit, se oli konkon. !Sore tumas long yufala!

21“!Yufala ya we i ting se yufala i waes, yufala i man blong wokem trik, sore tumas long yufala!

22“Yufala ya we long taem blong dring waen, yufala i jampion blong hem, mo long taem blong miksimap ol defrenkaen dring, yufala i prapa larikenman blong hem, sore tumas long yufala.

23Fasin blong yufala long kot, sipos man we i mekem i no stret i pem yufala, yufala i stap jajem hem, se i mekem i stret nomo, mo sipos man we i mekem i stret nomo i kam long kot, be yufala i stap mekem we hem i no save win nating.

24Hae God i gat olgeta paoa, mo hem i tabu we i tabu. Hem i God blong yumi ol laen* blong Isrel,* mo hem i talemaot ol tok blong hem long yumi, be yufala i stap ting rabis long ol tok ya. Hem i givim ol loa blong hem long yumi, be yufala i stap tanem baksaed long ol loa ya. From samting ya, bambae yufala i kam olsem waetgras we faea i stap kakae, nao ol stik blong hem oli bendaon, oli brok. Bambae yufala i kam olsem wan wud we ol rus blong hem oli stat kam drae, mo ol flaoa blong hem oli foldaon.

25Yumi ol man blong Hae God, be from ol samting ya, hem i kros finis long yumi, hem i leftemap han blong hem finis blong kilim yumi. Ol bigbigfala hil ya raonabaot long yumi, bambae oli seksek, mo bodi blong ol dedman bambae oli stap olbaot long taon ya olsem doti nomo long rod, be ol samting ya bambae i no mekem se kros blong hem i finis, bambae hem i stap kros yet long yumi. Hem i leftemap han blong hem finis blong panisim yumi, mo han blong hem i stap rere yet blong mekem samting ya.

26“Hem i mekem saen finis long ol soldia long wan narafala kantri we i stap narasaed wol, mo i singaot olgeta blong oli kam. !Yufala i luk! Naoia olgeta oli stap spid i kam, mo i no longtaem bambae oli kamtru.

27I no gat wan long olgeta we i stap tektaem, no i stap stambol long rod, i stap foldaon. I no gat wan long olgeta we i stap slip, no we bodi blong hem i stap kam hevi blong i slip. I no gat wan long olgeta we strap blong hem i slak, no we strap blong sandel blong hem i brok.

28Olgeta oli sapenem finis ol ara blong olgeta, mo ol bonara blong olgeta, oli taetemrere evriwan. Leg blong ol hos blong olgeta oli strong olsem ston, mo ol wil blong kat blong faet blong olgeta oli stap tantanem olsem waelwin.

29Olgeta bambae oli stap singaot bigwan olsem woman laeon. Bambae oli stap singaot strong, olsem ol yang laeon we oli holem ol kakae blong olgeta, oli karem i go, mo i no gat man we i save tekemaot kakae long olgeta bakegen.

30Long taem ya, bambae ol man ya oli singaot bigwan agens long yumi. Bambae oli mekem bigfala noes, olsem noes blong solwota we i brok long rif long taem blong hariken. Long taem ya, sipos man i lukluk long kantri ya blong yumi, bambae hem i talem se, ‘!Tudak nomo i stap! !Trabol nomo i stap! !Naoia, tudak i kavremap delaet finis!’ ”