Dutronome 16 - Bislama Bible Revised 2012

Lafet blong Pasova(Eksodas 12.1-20)

1 Eks 12.1-20; Lev 23.5-8; Nam 28.16-25 Nao Moses i talem se, “Olgeta. Hae God i God blong yumi, mo evri yia, long manis* ya Abib,* bambae yufala i mas mekem Lafet* blong Pasova* blong ona long hem.

2Yufala i mas go long ples ya we hem bambae i jusumaot blong yufala i mekem wosip long hem, we hem bambae i stap oltaem long hem. Mo long ples ya, evri famle long yufala oli save kilim wan long ol sipsip no nani no buluk blong olgeta, blong kakae long lafet ya, mo blong ona long Hae God.

3Mo taem yufala i mekem kakae blong lafet ya, bambae yufala i no save yusum bred* ya we i gat is long hem. I stat long fas dei blong lafet ya, bambae yufala i mas kakae bred nomo we i no gat is long hem, i go kasem seven dei, stret olsem we yumi kakae long taem ya we yumi aot long Ijip, we yumi hareap nomo. Bred ya, bambae yufala i talem se kakae blong taem ya we ol bubu blong yumi oli harem nogud. Long Ijip, yumi stap harem nogud tumas, mo oltaem long laef blong yufala, bambae yufala i mas kakae bred olsem long lafet ya, blong tingbaot taem ya bakegen.

4Long ol seven dei ya, olbaot long kantri blong yufala, bambae i tabu blong man i holem is i stap long haos blong hem. Mo ol mit blong ol anamol ya we yufala i kilim long fas dei blong lafet ya long sapa, bambae i tabu blong i stap go kasem moning, yufala i mas kakae evriwan long naet ya nomo.

5“Taem yufala i stap long kantri ya we Hae God bambae i givim long yufala, bambae yufala i no save kilim ol anamol blong kakae long lafet ya olbaot long ol taon blong yufala,

6yufala i mas go kilim olgeta long ples ya nomo blong mekem wosip, stret long taem we san i stap go daon, from we hemia nao stret taem we yumi aot long Ijip.

7Mo taem yufala i kilim olgeta, yufala i mas rusum, nao yufala i mas kakae long ples ya blong mekem wosip, mo long moning, bambae yufala i save gobak long ol haos tapolen blong yufala.

8Nao long ol narafala sikis dei ya we i stap, bambae yufala i mas kakae bred ya we i no gat is long hem, mo long namba seven dei, bambae yufala i kam wanples long ples ya bakegen blong mekem wosip long Hae God, mo bambae yufala i no mas mekem wok blong yufala long dei ya.”

Lafet blong Tekemaot Kakae long Garen(Eksodas 34.22; Levitikas 23.15-21)

9 Lev 23.15-21; Nam 28.26-31 Nao Moses i talem se, “I stat long taem ya we yufala i stat tekemaot ol kakae long garen* blong yufala, bambae yufala i mas kaontem ol wik go kasem seven,

10nao long fas dei blong namba eit wik, bambae yufala i mas mekem Lafet* blong Tekemaot Kakae long Garen. Hae God i God blong yumi, mo yufala i mas tekem haf blong ol samting ya we hem i blesem yufala long hem, yufala i mas givim i go long hem bakegen long gladhat blong yufala nomo. Presen ya blong yufala i blong soemaot we yufala i stap ona long hem, mo fasin blong yufala blong givim presen ya bambae i folem fasin blong hem blong blesem yufala.

11Yufala wetem ol pikinini blong yufala, mo olgeta we oli stap wok blong yufala, mo olgeta we oli stap wetem yufala, olsem ol Livaet,* mo ol strenja, mo ol pikinini we papa blong olgeta i ded, mo ol wido, yufala evriwan i mas go long ples ya blong mekem wosip we Hae God i stap long hem, mo yufala evriwan i mas glad.

12Yufala i mas lukaot gud blong obei long ol tok ya, mo oltaem, yufala i mas tingbaot we bifo, yumi stap wok slef* long Ijip.”

Lafet blong wokem ol Wansaed Haos(Levitikas 23.33-43)

13 Lev 23.33-36,39-43; Nam 29.12-38 Mo Moses i talem se, “Oltaem, taem yufala i klinimaot ol doti blong wit* blong yufala, mo yufala i purumpurumbut long ol grep* blong yufala blong mekem waen, biaen, bambae yufala i mas mekem Lafet* ya blong Wokem ol Wansaed* Haos, we lafet ya bambae i stap kasem seven dei.

14Yufala wetem ol pikinini blong yufala, mo olgeta we oli stap wok blong yufala, mo olgeta we oli stap wetem yufala, olsem ol Livaet,* mo ol strenja, mo ol pikinini we papa blong olgeta i ded, mo ol wido, bambae yufala evriwan i mas glad.

15Yufala i mas kam long ples ya blong mekem wosip, we Hae God bambae i jusumaot mo yufala i mas mekem lafet ya go kasem seven dei, blong ona long hem. Bambae yufala i mas glad from we hem i stap blesem ol garen* blong yufala, wetem ol wok blong yufala.

16“Evri yia, yufala ol man, yufala i mas kam tri taem long ples ya we Hae God bambae i jusumaot, blong yufala i mekem wosip long hem. Trifala taem ya, hemia Lafet blong Pasova,* mo Lafet blong Tekemaot Kakae long Garen, mo Lafet blong ol Wansaed Haos. Long trifala lafet ya, olgeta man evriwan oli mas karem presen i kam,

17we fasin blong man blong givim presen bambae i folem fasin we Hae God i stap blesem hem.”

Prapa fasin blong jajem man

18Nao Moses i talem se, “Bambae yufala i mas jusumaot ol man. Yufala i mas putumap olgeta blong sam oli jaj mo sam oli man blong givhan long jaj long ol taon ya we Hae God bambae i givim long yufala. Mo sipos ol jaj ya oli mekem kot, bambae oli mas jajem ol man long stret fasin, we oli no wok wan saed.

19Eks 23.6-8; Lev 19.15Oli mas folem stret fasin blong Loa, mo oli no mas saed wetem samfala man. Ol jaj ya bambae oli mas man we oli no save kasem mane long man, blong haedem rong blong hem. Rabis fasin ya i save mekem jaj we i waes mo i stret, i kam olsem blaenman nomo, nao i stap jajem ol man long fasin we i no stret nating.

20Oltaem, fasin we yufala i stap mekem long ol man i mas stret gud. Sipos yufala i stap mekem olsem, bambae yufala i save holem kantri ya we Hae God bambae i givim long yufala, mo bambae yufala i save stap longtaem long hem.

21 Eks 34.13 “Hae God i God blong yumi, mo sipos yufala i mekem wan olta blong hem, bambae yufala i no mas wokem wan pija blong woman god ya Asera* blong stanemap long saed blong hem.

22Lev 26.1Mo bambae yufala i no mas stanemap wan longfala ston we i pija blong narafala god, blong yufala i mekem wosip long hem, from we Hae God i no laekem fasin ya nating, i agens long hem.