Sing Blong Solomon Sotfala stori blong Buk ya - Bislama Bible Revised 2012

Sotfala stori blong Buk yaBuk ya SING WE I GUD MOA I WINIM OL NARAFALA SING, hem i gat ol sing i stap long hem we oli talem tok blong man mo woman we tufala i laeklaekem tufala. From samting ya, plante tok blong buk ya i strong blong man i ridim insaed long jos haos, from we long kastom blong yumi, i tabu blong tokbaot ol samting ya long fes blong ol man. Long sam narafala Baebol, oli kolem buk ya, se SING BLONG KING SOLOMON, from we long lanwis blong ol laen* blong Isrel* bifo, buk ya i karem nem blong king ya, se sing ya i blong hem.Big haf blong tok blong buk ya i tok blong man wetem woman blong hem, we tufala i stap taltalemaot long tufala we tufala i laeklaekem tufala tumas, be long sam ples, i had blong makem se hu i stap tok long hu, from we fasin blong tok blong olgeta bifo i narafala long fasin blong tok long Bislama. Translesen ya i folem tingting blong plante man we oli stadi gud long lanwis blong ol laen blong Isrel bifo, we oli talem se long tok olsem ol sing ya, plante taem man i save talem se “hem” we tede yumi mas talem se “yu”.Plante man tede oli tekem bigfala mining blong buk ya, se i stap talemaot we fasin blong man wetem woman blong hem i klin mo i stret gud. Be antap long mining ya, plante taem ol laen blong Isrel bifo oli tekem spesel mining blong hem, se i stap tokbaot fasin we God i stap lavem tumas ol man blong hem, we oli olsem woman blong hem. Mo ol Kristin man tu, plante taem oli tekem se i stap tokbaot fasin we Kraes* i stap lavem tumas ol man blong hem, olsem we Niutesteman i tokbaot jos, se i woman blong Kraes.Ol haf blong buk yaFas sing 1.1—2.7

Seken sing 2.8—3.5

Namba tri sing 3.6—5.1

Namba fo sing 5.2—6.3

Namba faef sing 6.4—8.4

Namba sikis sing 8.5-14