Namba 30 - Bislama Bible Revised 2012

Ol rul blong ol promes we ol woman long laen blong Isrel oli save mekem long Hae God

1Nao bakegen, Hae God i givim tok blong hem long Moses, blong i go talemaot long ol lida blong ol laen* blong Isrel.*

2Dut 23.21-23; Mat 5.33Nao Moses i go talemaot long olgeta se, “Hae God i talem se sipos wan long yumi i mekem promes long hem, se bambae i givim wan samting i go long hem, no i livimaot wan samting long laef blong hem, man ya i no mas brekem promes ya blong hem bakegen, bambae hem i mas mekem evri samting we hem i promes blong mekem.

3“Mo sipos wan gel we i stap yet long haos blong papa blong hem i mekem wan promes olsem long Hae God,

4mo papa blong hem i harem promes ya, be i no tok, gel ya bambae i mas mekem evri samting we hem i promes blong mekem.

5Be sipos papa blong hem i harem, nao i blokem hem blong i no mekem ol samting ya we i promes blong mekem, gel ya bambae i no moa save holem promes ya. Mo Hae God bambae i fogivim hem, i tekemaot ol sin blong hem, from we papa blong hem i no letem blong hem i holem promes ya.

6-7“Mo sipos wan gel olsem i mekem wan promes olsem long Hae God, nao i mared, nao man blong hem i harem nius blong promes ya, be i no tok, nating we gel ya i minim promes ya no i no minim, be hem bambae i mas mekem evri samting we hem i promes blong mekem.

8Be sipos man blong hem i harem nius blong promes ya, nao i blokem woman ya blong i no mekem, woman ya bambae i no moa save holem promes ya. Mo Hae God bambae i fogivim hem, i tekemaot ol sin blong hem.

9“Be sipos wan wido no wan woman we man blong hem i mekem divos long hem finis i mekem wan promes olsem long God, hem bambae i mas mekem evri samting we hem i promes blong mekem.

10“Mo sipos wan woman we i mared i mekem wan promes olsem long God,

11mo man blong hem i harem nius blong promes ya be i no tok, woman ya bambae i mas mekem evri samting we hem i promes blong mekem.

12Be sipos man blong hem i harem nius blong promes ya, nao i blokem woman ya blong i no holem promes ya blong hem, woman ya bambae i no moa save holem promes ya. Mo Hae God bambae i fogivim hem, i tekemaot ol sin blong hem, from we man blong hem i blokem hem blong i no mekem promes blong hem.

13I nomata wanem promes woman olsem i mekem, be man blong hem i gat raet blong mekem promes blong hem i stanap, no blong brekem promes ya.

14Be sipos man ya i harem nius blong promes we woman blong hem i mekem, nao hem i no tok go kasem nekis dei, woman ya bambae i mas mekem evri samting we hem i promes blong mekem. Sipos man i no blokem promes blong woman blong hem long dei we hem i harem, be hemia i mekem promes blong woman ya i stanap strong.

15Be sipos woman i mekem promes long Hae God, nao biaen, man blong hem i girap, i blokem woman blong hem blong i no moa holem promes ya, bambae man ya i mas kasem panis, from we woman blong hem i no mekem ol samting we hem i promes long Hae God, se bambae i mekem.”

16Hemia ol rul we Hae God i givim long Moses long ol bisnes blong promes we woman i save mekem long Hae God. Ol rul ya i kavremap gel we i no mared, i stap yet long haos blong papa blong hem, mo woman we i mared finis.