Ol Proveb 21 - Bislama Bible Revised 2012

1I isi nomo blong Hae God i mekem reva i ron i folem rod we hem i wantem, mo long sem fasin, i isi nomo blong hem i holem tingting blong king, i lidim hem long rod we hem i wantem.

2Maet yu ting se ol samting we yu stap mekem i stret nomo, be yu mas save we Hae God i stap skelem ol tingting blong yu, mo hem i savegud blong wanem yu stap mekem ol samting ya.

3Yu mas mekem ol fasin we i stret, mo yu mas mekem i sem mak long olgeta man. Hemia bambae i mekem Hae God i glad moa, i winim we yu stap bonem ol sakrefaes blong mekem wosip long hem.

4Ol man nogud, fasin blong flas blong olgeta wetem tingting ya se olgeta nomo oli nambawan, hem i stap holem olgeta, be fasin ya i sin ya.

5Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.

6Ol samting we yu winim long giaman toktok oli save mekem yu yu rijman, be blong smoltaem nomo. Mo bambae oli tekem yu yu go klosap long doa blong Hom* blong ol Dedman.

7Ol man nogud bambae oli kasem panis from we oli stap mekem i strong tumas long ol man. Oli no wantem mekem ol samting we i stret.

8Man we i stap mekem i no stret, rod blong hem i kruked olbaot, be man we laef blong hem i klin, fasin blong hem i stret gud.

9I moa gud blong man i go slip hem wan afsaed, i winim we i stap long haos wetem woman blong hem we oltaem i stap toktok tumas.

10Ol man nogud, oltaem nomo oli stap wantem tumas blong oli mekem ol samting nogud. Olgeta oli no gat sore nating long man.

11Sipos yu panisim man we i stap tok flas mo i stap leftemap hem, bambae man we save blong hem i smol nomo i save lan long hem. Mo long sem fasin, sipos yu tijim man we i waes, be man olsem tu bambae i save lan.

12Fasin blong Hae God i stret oltaem. Hem i save olgeta samting we i stap long haos blong ol man nogud, mo bambae hem i spolem ol man ya.

13Sipos yu blokem sora blong yu blong yu no harem puaman we i stap krae long yu blong yu givhan long hem, nao biaen, yu yu trabol, mo yu krae blong man i givhan long yu, be bambae i no gat man i save lesin long yu.

14Sipos wan man i kros tumas long yu, nao yu tekem wan presen, yu go givimhaed nomo long hem, presen ya bambae i mekem kros blong hem i finis.

15Taem kot i stap jajem man long stret fasin, ol gudfala man oli glad, be ol man nogud oli stap harem nogud, tingting blong olgeta i foldaon.

16Man we i no moa yusum hed blong hem, hem i stap finis long rod blong ded.

17Sipos yu stap yusum mane blong yu oltaem blong pem ol flas kakae mo dring mo ol narafala flas samting, bambae yu no save kam rijman samtaem.

18Oltaem ol man nogud oli stap traem blong mekem ol gudfala man oli kasem trabol, be trabol ya i stap kasem olgeta bakegen nomo.

19I moa gud man i go stap hem wan long draeples, i winim we i stap wetem woman blong hem we oltaem i stap toktok tumas, mo i stap krae from evri samting.

20Ol waes man oli gat ol gudgudfala samting i stap long ol haos blong olgeta, be ol man we oli no gat hed oli stap spenem mane blong olgeta kwiktaem nomo.

21Man we i kaen gud long ol man, mo i stap mekem i stret long olgeta, hem bambae i gat longfala laef. Bambae ol man oli mekem i stret long hem, mo oli ona long hem.

22Komanda we i gat hed, hem i save go mekem faet long taon we i gat ol strong man oli stap long hem, mo i save brekemdaon bigfala stonwol blong taon ya we ol man blong taon ya oli stap trastem, nao i save holem taon ya i blong hem.

23Sipos yu no wantem trabol i kasem yu, yu mas lukaot gud long ol tok blong yu.

24Man we i ting se hem nomo i nambawan, sipos yu lukluk gud long hem, bambae yu luksave we hem i stap flas tumas, i no gat sore long ol narafala man, mo i no save givhan long olgeta nating.

25Sipos man i les, i no wantem wok, fasin ya bambae i stap pulum ded nomo i kam long hem.

26Tingting blong hem i stap olwe long ol samting we hem nomo i wantem. Be man we fasin blong hem i stret, hem i save givim presen long gladhat blong hem, mo i stap givim plante samting long ol narafala man.

27Hae God i no laekem nating we ol man nogud oli bonem sakrefaes blong mekem wosip long hem, hem i agens long fasin ya. Mo sipos oli mekem long tingting we i nogud, hemia i mowas olgeta.

28Tok blong wan witnes we i man blong giaman, man i no save bilif long hem, be tok blong witnes we i tingting gud long ol samting we bambae i talem, olgeta man oli save lesin gud long hem.

29Stret man, oltaem hem i tingting gud fastaem, nao biaen i mekem samting, be man nogud, hem i mekem olsem we i savegud ol samting, nao i jes gohed nomo.

30Nating we yu yu waes, mo yu gat gud hed, mo yu save luksave ol samting we i haed, be sipos Hae God i agens long yu, bambae yu no save win.

31Yu yu save mekemrere ol hos blong go mekem faet, be Hae God nomo i save mekem yu yu win.