1Nao taem Modekae i harem nius blong samting ya, hem i harem nogud tumas, mo i terem* klos blong hem from. Nao hem i putum rabis klos, mo i sakem asis blong faea i go long hed blong hem, mo i stap go olbaot long taon, we i stap krae bigwan
2gogo i kam long doa* blong bigfala stonwol blong yad blong haos blong king. Hem i no go insaed, from we man we i putum rabis klos olsem i no save go insaed long ples ya.
3Long olgeta provins we oli talemaot tok ya blong king, olgeta laen* blong Isrel* oli stap harem nogud tumas, oli krae. Oli stap krae bigwan, mo oli livim kakae blong soemaot we oli harem nogud, mo plante long olgeta oli putum rabis klos, mo oli stap ledaon long asis.
4Nao taem ol gel blong wok blong kwin wetem ol man blong wok blong hem oli talemaot ol samting ya long hem we Modekae i mekem, hem i harem nogud tumas. Nao hem i tekem sam klos, i sanem i go long Modekae blong hem i jenisim klos blong hem blong i kam insaed, be hem i no wantem.
5Nao kwin i singaot wan man blong wok blong hem, we nem blong hem Hatak, we king i putumap hem blong i stap wok blong hem, nao i sanem hem blong i go luk Modekae, blong i faenemaot wanem samting i hapen, mo we hem i mekem olsem from wanem.
6Modekae i stap long bigfala ples ya blong mekem miting long medel blong taon, klosap long doa blong bigfala stonwol blong yad blong haos blong king, nao Hatak i go luk hem long ples ya,
7mo Modekae i talemaot ol samting ya long hem we oli bin mekem long hem, mo bigfala mane ya we Haman i promes finis long king, se sipos king i kilim olgeta laen blong Isrel oli ded, bambae i givim long hem.
8Modekae i gat wan kopi blong tok ya blong king, we oli stap putum olbaot long taon ya, we i talem se bambae ol man oli kilim olgeta laen blong Isrel oli ded. Nao hem i givim kopi ya long Hatak, mo i talem long hem blong i go talemaot ol samting ya long kwin, mo i givim kopi ya long hem. Mo i talem long hem tu se kwin i mas go krae long king, blong hem i gat sore long ol man ples blong hem.
9Nao Hatak i go mekem olsem we Modekae i talem.
10Be kwin i sanem hem i gobak blong talemaot long Modekae se,
11“I gud, be i gat loa blong samting ya i stap. Loa ya i talem se, ‘Sipos wan man no wan woman i go long yad ya blong haos blong king we i insaed olgeta, we king i no singaot hem blong i go, bambae oli mas kilim hem i ded.’ Loa ya i tabu, mo olgeta man, i stat long ol advaesa blong king i go kasem olgeta man long ol provins, oli save finis. I gat wan samting nomo i save sevem man we i go insaed olsem. King i gat wokingstik blong hem we oli wokem long gol, nao sipos hem i holem stik ya, i poenem man olsem long hem, man ya bambae i no ded, i save stap. Be i gat wan manis i pas finis we king i no moa singaot mi blong mi go luk hem.”
12Nao taem Modekae i harem tok ya blong kwin,
13hem i sanem narafala tok bakegen i go long hem blong givim woning long hem, i talem se, “Esta. I nogud yu ting se yu yu stap long haos blong king, nao bambae yu stap gud i winim mifala ol narafala laen blong Isrel.
14Naoia i gat wan hadtaem i kasem yumi ol laen blong Isrel, mo sipos yu yu stap kwaet olsem, bambae God i givhan long mifala, i sevem mifala, be yu bambae yu ded, nao famle blong papa blong yu bambae i finis. ?Be naoia, hu i save? Maet yu yu kam kwin long taem ya, blong bambae yu save givhan long yumi long hadtaem ya.”
15Nao kwin i sanem tok i gobak long hem bakegen,
16i talem se, “Plis, yu go singaot olgeta man ples blong yumi we oli stap long taon ya, oli kam wanples. Bambae yufala i stap prea from mi gogo kasem tri dei mo tri naet we yufala i no kakae, mo yufala i no dring. Mo mi wetem ol gel blong wok blong mi, bambae mifala tu i mekem sem samting. Nao long namba tri dei ya, nating we i agensem loa, be bambae mi mas go luk king. Mo sipos i min se mi mi mas ded from, be bambae i mas olsem.”
17Nao Modekae i go, i mekem evri samting, stret olsem we kwin i talem.
Who We AreWhat We EelieveWhat We Do
2025 by iamachristian.org,Inc All rights reserved.
