Sekaraea 7 - Bislama Bible Revised 2012

Prapa fasin blong livim kakae blong mekem wosip long God

1Nao Profet Sekaraea i talem se, “Long namba fo yia we King Darias i king long Pesia, long manis ya Kislef* we i namba naen manis,* long namba fo dei blong hem, Hae God i givim tok blong hem long mi blong mi go talemaot.

2“Hae God i gat olgeta paoa, mo long taem ya, ol man Betel oli bin sanem Sareja mo Regemelek mo ol man blong tufala i go long haos* blong hem, blong oli go prea long hem blong i blesem olgeta.

3Mo oli go blong askem kwestin long ol pris* mo long ol profet long ples ya. Oli talem se, ‘?Fasin ya we yumi stap holem i kam longtaem finis, we long namba faef manis, yumi stap livim kakae, yumi stap krae from haos ya, bambae yumi stap holem fasin ya yet, no yumi lego?’

4“Nao Hae God i givim wan tok long mi from bisnes ya.

5Hem i talem long mi blong mi go talemaot long ol pris, mo long ol man blong kantri ya se, ‘Long seventi yia we oli pas finis, oltaem long namba faef manis, mo bakegen long namba seven manis blong ol yia ya, yufala i stap livim kakae blong yufala, mo yufala i stap krae from haos blong mi, be long ol samting ya, yufala i no ona long mi nating.

6Mo taem yufala i stap kakae mo yufala i stap dring, be yufala i mekem, blong yufala nomo i harem gud.’ ”

7Mo Profet Sekaraea i talem se, “Hemia sem tok ya we Hae God i bin talemaot long ol profet bifo, taem Jerusalem* ya i stap gud, i fulap long ol gudgudfala samting, mo i gat plante man oli stap insaed long taon ya, mo long ol narafala taon we oli stap raonabaot long hem. Mo long taem ya, i gat plante man tu oli stap long saot, mo long botom blong ol hil long saed i go long wes.”

Ol laen blong Isrel oli go wok slef from we oli no obei long Hae God

8Nao Profet Sekaraea i talemaot we Hae God i talem long hem se,

9“Mi mi Hae God, mo mi gat olgeta paoa. Bifo, mi mi bin givim tok blong mi long ol man blong mi, mi talem se, ‘Ol laen* blong Isrel.* Yufala i mas soemaot stret fasin blong jajem man, mo yufala i mas kaen, yufala i mas gat sore long ol narafala man.

10Yufala i no mas mekem i strong tumas long ol wido, mo long ol pikinini we papa blong olgeta i ded, mo long ol strenja we oli stap wetem yufala. Yufala i mas givhan long ol puaman, mo yufala i no mas mekem plan blong spolem narafala man.’

11“Be ol man blong mi oli mekem stronghed, oli no laekem nating blong lesin long tok blong mi. Oli blokemgud sora blong olgeta,

12oli mekem tingting blong olgeta i kam strong olsem ston. Nao mi mi kros tumas long olgeta, from we oli no wantem nating blong obei long ol tok ya we Spirit blong mi i bin talemaot long ol profet bifo.

13Taem we oli prea long mi, mi mi no ansa long olgeta, from we taem mi mi tok, oli no obei nating long tok ya blong mi.

14Nao from we oli mekem olsem, mi mi kam olsem hariken, mi ronemaot olgeta oli go stap long ol narafala kantri. Nao gudfala graon ya we oli stap long hem fastaem, hem i stap nating, i no moa gat man i stap long hem.”