Esikel 43 - Bislama Bible Revised 2012

Hae God i kambak long haos blong hem

1Nao long vison ya blong mi, man ya i tekem mi, mitufala i go long doa blong haos* blong Hae God, we i lukluk i go long is.

2

6Nao man ya i stap stanap long saed blong mi long ples ya, mo mi harem voes blong Hae God i kamaot long haos blong hem,

7i talem long mi se, “Man blong wol ya. Hemia bigfala jea blong mi. Bambae mi stap long ples ya wetem yufala ol laen* blong Isrel* mo bambae mi rul long yufala, gogo i no save finis. Yufala wetem ol king blong yufala, bambae yufala i no mas lego mi bakegen, blong go biaen long ol narafala god. Mo bambae yufala i no mas berem ol dedbodi blong ol king blong yufala long ples ya bakegen, blong mekem sem long tabu nem blong mi.

8Bifo, ol king ya oli wokem ol haos blong olgeta long saed blong haos blong mi nomo. I gat wan wol nomo we i stap long medel, blong seraotem mifala, mo oli mekem sem long tabu nem blong mi, long ol samting nogud ya we oli stap mekem, nao mi kros tumas, mi spolem olgeta.

9Naoia, oli mas finis long fasin ya we oli lego mi, oli stap biaen long ol narafala god, mo yufala i mas tekemaot ol dedbodi ya blong ol king blong yufala i gowe long haos blong mi. Sipos yufala i mekem olsem, bambae mi stap wetem yufala oltaem nomo, gogo i no save finis.”

10Nao Hae God i gohed i talem se, “Yu talemaot plan ya blong haos blong mi long ol laen blong Isrel, mo yu letem olgeta oli stadi gud long hem, blong mekem olgeta oli sem from ol fasin nogud ya blong olgeta.

11Nao sipos oli sem long ol samting ya we oli stap mekem, bambae yu tokbaotgud ol plan blong haos ya long olgeta. Yu mas talemaot plan blong hem, mo ol doa blong kam insaed long hem, mo ol doa blong go afsaed long hem, mo saes blong hem, mo ol ples we oli stap putum ol samting long hem, mo yu mas talemaot ol loa mo ol rul blong hem long olgeta. Yu mas raetemdaon olgeta samting ya, blong olgeta bambae oli save luk weples ol samting oli stap long hem, nao bambae oli save folem ol rul blong hem.

12Loa blong haos blong mi i olsem. ‘Olgeta ples long top blong hil ya we haos blong mi i stap long hem oli tabu we i tabu.’ ”

Ol mak blong olta blong bonem sakrefaes

13 Eks 27.1,2; 2 Kron 4.1 Nao Hae God i talem se, “Olta blong bonem sakrefaes, ol mak blong hem bambae i olsem. Rula blong makem olta ya bambae i sem mak nomo long rula ya we man ya i yusum blong makem haos* blong mi. Long botom blong olta ya, bambae i gat wan drenwota i goraon long hem, we bambae i godaon kasem fifti sentemeta, mo bigfala blong hem bambae i kasem fifti sentemeta. Mo rel blong drenwota ya we bambae i raonem afsaed blong hem, hae blong hem bambae i kasem twanti faef sentemeta.

14Olta ya bambae i gat tri haf blong hem we haf blong hem daon bambae i bigwan, mo seken haf antap long hem bambae i smol lelebet, mo haf blong hem we i antap olgeta bambae i smol moa. Haf ya daon we bambae i sidaon long fandesen blong hem, hae blong hem bambae i kasem wan meta. Nekis haf blong hem bambae i sidaon antap stret long medel blong faswan, mo spes we i stat long saed blong faswan i go kasem stamba blong seken haf ya, bambae i kasem fifti sentemeta, mo hae blong hem bambae i kasem tu meta. Las haf blong hem antap bambae i sidaon antap stret long medel blong seken haf, mo spes we i stat long saed blong seken haf ya i go kasem stamba blong las haf ya bambae i kasem fifti sentemeta,

15mo hae blong hem bambae i kasem tu meta. Haf ya antap i blong bonem sakrefaes long hem. Mo bambae i gat fo samting olsem hon* blong buluk i stap stanap long ol fo kona blong hem antap we oli haf blong olta ya nomo.

16Top blong olta ya bambae i skwea, we evri saed blong hem wanwan i kasem sikis meta.

17Mo haf ya long medel bambae i skwea, we evri saed blong hem wanwan i kasem seven meta. Mo long top blong hem, bambae i gat wan rel i goraon long hem, we hae blong hem bambae i kasem twanti faef sentemeta. Mo drenwota blong hem, bigfala blong hem bambae i kasem fifti sentemeta. Ol step we i go antap long olta ya bambae i stap long saed i go long is.”

Fasin blong mekem olta i tabu

18-19 Eks 29.35-37 Hae God i Masta* blong yumi, mo hem i talem long mi se, “Man blong wol ya. Yu lesin long tok we bambae mi talem long yu. Yufala ol pris* we i kamaot biaen long Jadok ya bifo, we hem i wan laen blong Livae,* yufala nomo i gat raet blong stanap long fes blong mi blong mekem wok blong mi. Taem yu wokem olta ya finis, bambae yu mas bonem ol sakrefaes long hem, mo yu mas tekem blad blong ol anamol blong mekem ol sakrefaes ya, yu mas saksakem i go long hem, blong mekem olta ya i kam tabu, i blong mi. Bambae yu tekem wan yang bul, nao yufala i mekem sakrefaes long hem blong tekemaot sin.

20Bambae yu tekem sam blad blong hem, yu ravem long ol fo hon* long ol kona blong olta ya, mo long top blong ol kona blong haf blong olta ya daon, mo yu ravem i goraon long ol rel blong olta ya tu. Long fasin ya, bambae yu mekem olta ya i kam klin, mo yu mekem i kam tabu, i blong mi.

21Mo bambae yu tekem bul ya we i blong mekem sakrefaes blong tekemaot sin, nao yu bonem long spesel ples ya, we yufala i makemaot finis, afsaed olgeta long graon ya blong haos* blong mi.

22Nao long nekis dei blong hem, bambae yu tekem wan man nani we i no gat wan samting nating i rong long bodi blong hem, yu kilim blong mekem sakrefaes long hem blong tekemaot sin. Bambae yu tekem blad blong hem, yu saksakem i go long olta ya, blong mekem i kam klin long fes blong mi, i kam tabu, i blong mi. Mo bambae yu mekem sem samting nomo, olsem we yu mekem long bul ya.

23Taem yu mekem hemia finis, bambae yu tekem wan yang bul bakegen wetem wan yang sipsip we tufala tugeta i no gat wan samting nating i rong long bodi blong tufala,

24nao yu tekem tufala i kam long mi. Mo bambae yufala i kilim tufala, yufala i saksakem sol i go long bodi blong tufala, nao yufala i bonem blong givim i kam long mi.

25Evri dei, go kasem seven dei, bambae yu tekem wan bul mo wan nani mo wan sipsip, yu mekem sakrefaes ya long olgeta blong tekemaot sin. Ol anamol ya oli mas klin, oli no mas gat wan samting nating we i rong long bodi blong olgeta.

26Nao long fasin ya, bambae yufala i mekem olta ya i kam tabu, i blong mi, nao i rere blong yufala i yusum.

27Nao biaen long ol seven dei ya, bambae yufala i save bonem sakrefaes long olta ya. Hemia ol sakrefaes ya we i blong bonem i bon evriwan, mo ol sakrefaes ya we oli bonem haf oli kakae haf blong soemaot we oli stap fren gud wetem mi. Nao bambae mi harem gud, mi glad long yufala evriwan. Mi mi Hae God, mi Masta blong yufala, mo hemia tok blong mi.